16/07/2026
كتير من الأهالي بيفتكروا إن الطفل اللي عنده فرط حركة لازم نمنعه من الجري والحركة، لكن الحقيقة العكس تمامًا!
الرياضة من أهم الحاجات اللي بتساعد أطفال فرط الحركة وتشتت الانتباه، لأنها بتفرغ طاقتهم بطريقة صحية، وبتحسن تركيزهم، وبتقلل الاندفاع والعصبية.
الطفل اللي عنده فرط حركة بيكون عنده طاقة كبيرة جدًا، ولو الطاقة دي متوجهتش بشكل صح، ممكن تظهر في صورة حركة زيادة، أو تشتت، أو اندفاع، وأوقات كمان سلوك عدواني.
ليه الرياضة مهمة لطفل فرط الحركة؟
° بتفرغ الطاقة الزايدة بشكل صحي.
° بتساعد على زيادة التركيز والانتباه.
° بتقلل التوتر والعصبية والاندفاع.
° بتزود ثقة الطفل بنفسه.
° بتعلمه الالتزام بالقواعد واحترام الدور والتعاون مع غيره.
° وبتساعد كمان على تحسين النوم، وده بينعكس بشكل كبير على سلوكه وتركيزه طول اليوم.
إيه أفضل الرياضات؟
الأفضل نختار رياضات بتشغل المخ والعضلات مع بعض، علشان الطفل يفكر ويركز وهو بيتحرك، زي:
السباحة:
من أفضل الرياضات لأنها بتحرك معظم عضلات الجسم وبتساعد الطفل يهدأ ويحسن التوافق الحركي.
الجمباز:
بينمي التوازن والتركيز والتحكم في حركة الجسم.
تنس الطاولة:
ممتازة لتنمية سرعة الانتباه والتركيز والتوافق بين العين والإيد.
التنس:
بيحسن سرعة الاستجابة والتركيز واتخاذ القرار.
ركوب العجلة:
بينمي التوازن والانتباه والثقة بالنفس.
كرة القدم وكرة السلة:
بيعلموا الطفل العمل الجماعي، والانتباه، وسرعة التفكير أثناء اللعب.
وهل الكاراتيه والتايكوندو والجودو مناسبين؟
الرياضات دي بتساعد أطفال كتير على الانضباط وضبط النفس، لكن لو الطفل عنده سلوك عدواني أو بيضرب اللي حواليه وقت الغضب، فمن الأفضل نأجل ممارستها في البداية، ونختار رياضة تانية لحد ما يقدر يتحكم في انفعالاته بشكل أفضل، ويكون ده تحت إشراف المختصين.
الرياضة لوحدها مش كفاية
رغم إن الرياضة ليها دور مهم جدًا، إلا إن أفضل النتائج بنشوفها لما تكون مع جلسات تنمية مهارات التركيز والانتباه والإدراك مع أخصائي تربية خاصة أو أخصائي نفسي.
الجلسات دي بتدرب الطفل على إنه يركز لفترة أطول، يقلل التشتت، يحسن الذاكرة والانتباه، ويتحكم في اندفاعه، وبالتالي بيستفيد من الرياضة بشكل أكبر.
ولما نجمع بين الرياضة المناسبة، وجلسات تنمية المهارات، ودور الأسرة في البيت، بنوصل لأفضل نتيجة ممكنة، سواء في السلوك أو التركيز أو التحصيل الدراسي.
رسالة لكل أب وأم
بدل ما نحاول نوقف حركة الطفل... لازم نوجهها صح.
لا تحاول إيقاف حركة طفلك، بل ساعده على توجيهها في الطريق الصحيح. فالرياضة المناسبة، مع التدريب العلاجي والمتابعة المستمرة، يمكن أن تحدث فرقًا حقيقيًا في حياته، وتمنحه فرصة أفضل للتعلم والنجاح والاندماج مع الآخرين.
افتكروا دايمًا... الطاقة مش مشكلة، المشكلة بس في إنها تتوجه في المكان الصح علشان تحقق النجاح .
بقلم: د. مي باسم دكتورة تربية خاصة وتخاطب كتير من الأهالي بيفتكروا إن الطفل اللي عنده فرط حركة لازم نمنعه من الجري والحركة، لكن الحقيقة العكس تمامًا! الرياضة من أهم ا....
