03/05/2025
🔸ليه ابني كل ما أكلمه يعاند ويعلي صوته؟
🔸ليه كل اتفاق بينا بيتكسر؟
🔸ليه مش بيسمع الكلام زي اخوه ؟
📌الحقيقية ان ابنك هيفضل يعلي صوته، يصرخ، يعيط، يزق، يضرب، يكسر، ومايسمعش الكلام، ومش هيلتزم بأي اتفاق… طول ما إحنا بنتعامل معاه بالزعيق او التهديد او العقاب ، أو بنتجاهله ومتوقعين انه يكون "ولد عاقل ومؤدب"
كده من نفسه وحتى لو حصل وسَمِع الكلام، وكان "مؤدب" في الظاهر… فده في حد ذاته مش دايماً علامة كويسة
⬅️لأن لما بنزعق او نعاقب الطفل ممكن يحس بالخوف و عدم الأمان ،
وده بيخلي جهازه العصبي بيستجيب بطريقة من ال 4 اما
⚠️Fight – قتال:
⚠️أول ما يسمع الزعيق أو يتعرض لعقاب، يعاند أكتر، يزعق ويتخانق
أو
⚠️ Flight – هروب:
⚠️ ينسحب، ينعزل، يسكت، يهرب من الموقف، يكتم جواه لحد ما ينفجر فجأة بعدين.
أو
⚠️ Freeze – تجمُّد:
⚠️ يتجمد في مكانه، يبان عليه الهدوء التام، مايتحركش، مايردش مهما حاولتي...
وساعات إحنا كأهل بنفتكر إنه "ولد بارد" أو "مش فارقة معاه"، لكن الحقيقة إنه جسمه وعقله دخلوا في حالة شلل بسبب الخوف.
أو
⚠️ Fawn – تملُّق:
⚠️ يبان إنه "بيسمع الكلام" و"مؤدب جدًا"، بس هو في الحقيقة بيعمل كده خوفًا من رد فعلنا، من الزعيق أو العقاب أو الإيذاء…
مش لأنه فاهم أو مقتنع.
أو انه يكون في حالة من الحالات دي طول الوقت
وده بينتج عن شعوره الدائم بعدم الأمان
وفي الحالات دي الاماكن المسؤولة عن التعلم و التفكير المنطقي في المخ 🧠
زي ال القشرة الجبهية الأمامية prefrontal cortex
و الحُصين Hippocampus
شبه "بتقف" مؤقتًا
فبالتالي الطفل 👇
❌ مش هيفهم المنطق اللي بنقوله وقت الخناق أو الصراخ
❌ مش هيقدر يسمع أو يستوعب التعليمات أو النصائح
❌ مش هيتعلم حاجة جديدة لأنه حرفيًا مش في "وضع تعلم"
اللي هيشتغل وقتها هو رد الفعل التلقائي: يعلي صوته، يضرب، يصرخ، يهرب، أو يسكت ويتجمد
لانه حاسس بعدم الأمان
🔷 يبقى الحل؟
قبل ما أعلّم أو أشرح أو أوجّه:-
✅ أرجّع الطفل لحالة أمان
✅ أهدّيه
✅ أساعده يحس إنه مسموع ومفهوم
وقتها بس المخ هيبقى مستعد يستقبل معلومة ويتعلم منها
كلنا بنغلط ونتشد… بس دايمًا في فرصة نبدأ تاني، ونقرب من ولادنا بشكل أهدى وأعمق
وكل خطوة صغيرة في طريق الهدوء، بتقربك من علاقة أعمق مع ابنك.♥️
