Elixerna Pharmacies - صيدليات إلكسيرنا

31/07/2026

لما تزن على ماما عشان تنزل معاها الصيدلية.. وتدخل تسأل بنفسك 😂

​الطفل: عندكو بامبظ؟ 👶🍼

​إحنا في صيدليات إليكسيرنا: عندنا كل اللي تحتاجه وبأحسن العروض.. بس ياريت تجيب ماما تدفع المرة الجاية 😂

25/07/2026

25/07/2026

04/07/2026

دخلت الصيدلية أم شايلة ابنها الرضيع اللي مكملش خمس شهور وشها مخطوف وبتقولي: الحقني يا دكتور الولد مناخيره مسدودة ومش عارف يرضع بقالي يومين بستخدم شفاط الأنف ومفيش فايدة بالعكس ده بيصرخ أول ما أقربه منه وبيقعد يشد في مناخيرةده ويهرش فيها إديني أي نقط تفتح مناخيره بسرعة

طلبت منها تهدى وسألتها: بتستخدمي الشفاط كام مرة في اليوم؟
قالت: كل ما أحس إن مناخيره مقفولة أو بيخنفر بشفطله عشان يرتاح

هنا كان لازم أتدخل فوراً وأشرحلها الكارثة اللي بتحصل من غير ما تقصد

فهمتها إن الأغشية المخاطية داخل أنف الرضيع رقيقة وحساسة جداً والشفط المستمر والقوي ده بيعمل (كدمات وتهتك) في الغشاء من جوه.
نتيجة الجرح ده الأغشية بتلتهب وتورم أكتر كرد فعل طبيعي.. يعني بدل ما بنريحه إحنا بنسد مناخيره بالكامل وبنسبب له ألم شديد بيخليه يصرخ ويرفض الرضاعة

طب الحل ايه يا دكتور؟

الحل العلمي والآمن جداً لحالته كان بسيط:

١. نوقف الشفاط ده فوراً عشان الأغشية ترتاح من الالتهاب.

٢. نعتمد بس على (نقط ماء البحر) المخصصة للرضع لأنها بتدوب المخاط وتنضف الأنف بلطف شديد جداً من غير أي جروح.

٣. لو اضطرينا نستخدم الشفاط بيكون للضرورة القصوى (لو الطفل رافض الرضاعة تماماً) وميزيدش عن مرة أو مرتين في اليوم بألطف سحبة ممكنة.

٤. ترطيب الجو والحفاظ على تهوية المكان وتزويد الرضاعة بيساعد جداً في طرد المخاط طبيعياً.

🚨 مش كل أداة بنشتريها عشان نريح ولادنا بيكون استخدامها المفرط صح.. أحياناً الراحة بتكون في الاستخدام المقنن مش في الاستخدام العمال على بطال

قولولنا بقى في التعليقات.. مين فيكم كانت مدمنة لاستخدام شفاط الأنف مع طفلها واكتشفت إنها كانت بتعمله مشكلة؟

03/07/2026

يا ترا هنغلب الارجنتين كام 🤔 💪🏻
الف مليون مبرووووووك لمصر 🇪🇬

03/07/2026

كارثة صامتة في بيوت كتير .. إدمان لبوس الجلسرين للرضع.. ووهم الإمساك

​أكبر غلطة ممكن تدمر الجهاز الهضمي لطفلك الرضيع هي استعجالك على الحمام

أم تلاقي طفلها (4 أو 5 شهور) بدأ يدوق الأكل زي الخضار أو الزبادي وغاب يومين تلاتة معملش حمام .. فتقلق وتجري تديله (لبوس جلسرين) عشان تريحه .. وهنا بتبدأ الكارثة الطبية

​من واقع مراجعتنا اليومية للحالات في صيدليات إليكسيرنا دي 3 حقائق طبية لازم كل أم تعرفهم:

​١. طبياً .. الطفل الرضيع ممكن يغيب في الحمام لعدة أيام وده طبيعي جداً طالما بطنه مش متحجرة والبراز بينزل طري مش ناشف ومحجر ده مش إمساك مرضي .. دي مجرد أمعاء بتكبر وبتاخد وقتها عشان تتعود على الإنزيمات وهضم الأكل الجديد.

​٢. استخدام لبوس الجلسرين عمال على بطال بيعمل للطفل حالة طبية اسمها (الاعتمادية وكسل الأمعاء) يعني أعصاب الإخراج بتتبلد والطفل حرفياً بينسى إزاي (يحزق) ويعمل حمام طبيعي لوحده ومعدته بتفضل مستنية التحفيز الصناعي بتاع اللبوس عشان تتحرك إنتي كده بتعالجيه من إمساك وهمي وبتجيبيله إمساك مزمن حقيقي.

​٣. أكبر غلط إنك تدي الطفل أعشاب (زي الينسون أو الكراوية او بيبي درينك) عشان تليني بطنه .. التوصيات الطبية الحديثة بتمنعها تماماً لأن بعضها بيسبب مشاكل عصبية للرضع غير إنها بتملى بطن الطفل بسوائل وهمية وتخليه يرفض الرضاعة اللي هي مصدر نموه الأساسي.

طب ايه الحل يا دكتور؟

​✅ الحل الطبي والآمن جداً:

• ​الرضاعة ثم الرضاعة لأن اللبن (طبيعي أو صناعي) هو الملين الطبيعي الأول.

• ​الماء لو الطفل بدأ أكل صلب فعلاً مسموح بحوالي معلقتين كبار بعد وجبة الأكل لمساعدة الأمعاء على الهضم.

• ​الحركة الدودية .. اعملي مساج دافي لبطنه وتمرين (العجلة) لرجله.

• ​الصبر .. سيبيه يعمل حمام براحته وبطبيعته بدون أي تدخل أو أدوية.

طب ​امتى نقلق ونكشف؟ لو الطفل غاب أكتر من الحد الآمن أو البراز كان قاسي جداً والطفل بيبكي بألم مستمر وقتها فحص طبيب الأطفال ضرورة.

​صحة أطفالنا مش مجال للاستسهال أو تجارب ❌

اعملي (منشن / شير) لكل أم عندها طفل رضيع وأنقذي أمعاءه من اللبوس

01/07/2026

المضاد الحيوي مش خافض للحرارة .. كل جرعة بتديها لابنك عشان سُخن بتدمر مناعته وتربي بكتيريا أشرس

01/07/2026

أم دخلت الصيدلية باين عليها القلق جداً وبتقولي:

​= يا دكتور ابني حرارته عالية بقالها ٣ أيام ومابتنزلش .. مع إني والله منتظمة على دواء الشرب (المضاد الحيوي) اللي كتبه الدكتور بالساعة ومفيش أي تحسن هو الدواء ده مبقاش يجيب نتيجة ولا إيه؟

​سألتها سؤال طبيعي جداً: ألف سلامة عليه .. الدواء ده حضرتك لسه حلاه (مضيفة عليه المياه) من تلات أيام؟

= ردت بتلقائية شديدة: لأ طبعاً الدواء ده كان متبقي نُصه في التلاجة من دور التعب بتاع أخوه الشهر اللي فات فقولت ألحقه بيه أول ما سخن بدل ما أشتري علبة جديدة وهو لسه مليان حرام يترمي

​هنا ابتسمت بهدوء وقولتلها: يا فندم الدواء طبيعي الدواء ميجبش نتيجة لأن حضرتك حرفياً بتدي لابنك (مياه بسكر) ومفيش أي مادة فعالة بتدخل جسمه عشان تحارب البكتيريا

​= اتصدمت وقالتلي: إزاي يا دكتور؟! ده أنا شايلاه في باب التلاجة ومحافظة عليه

​قولتلها: أدوية الشرب بتاعت الأطفال (خصوصاً المضادات الحيوية اللي بتتحل بمياه) ليها عُمر افتراضي صارم جداً بعد الفتح وإضافة المياه .. غالباً بيكون من اسبوع لـ اسبوعين بالكتير أوي.
بعد المدة دي المادة الفعالة بتتكسر تماماً وبتفقد تأثيرها ده غير إنها ممكن تكون بيئة لنمو بكتيريا جديدة يعني إنتي متخيلة إنك بتعالجيه لكن في الحقيقة البكتيريا في جسمه بتاخد راحتها وبتزيد

​ببساطة استبعدنا العلبة القديمة وصرفت لها علبة جديدة ونبهت عليها تكتب تاريخ الفتح بقلم واضح على العلبة من برة عشان متتلخبطش تاني

*️⃣ ​الأدوية اللي بتتحل بمياه مش بواقي أكل هنشيلها في التلاجة للوجبة الجاية.
التوفير في الدواء المفتوح ممكن يكلفك صحة ابنك وفلوس أكتر بكتير في علاج مضاعفات إحنا في غنى عنها.

​بصراحة كده.. كام واحد فيكم عنده متحف لأدوية الشرب المفتوحة في باب التلاجة ومستخسر يرميها؟ 👀👇🏻