عيادة دكتور أمير جميل لطب الأطفال وحديث الولادة

19/09/2026

عوده العمل بالعياده بعد مشاركتي ف مؤتمر عن صحه الام و الطفل والمقام في مركز حمايه صحه الام و الطفل (د.فوكان تشوييتس) ف العاصمه الصربيه بلجراد واعتذر عن صعوبه التواصل تليفونيا خلال تلك الفتره ولكن بصفه عامه برجاء التواصل ع الواتس فقط وياريت مش فويس عشان بشوف الرساله اسرع وبرضه برد اسرع بقدر الامكان وشكرا لتفهمكم

19/08/2026

من اهم السلوكيات اللي لازم نعلمها لأطفالنا هي ثقافه الاعتذار .مش عيب انك تغلط كلنا بنغلط وبنتعلم من اخطاءنا لكن العيب انك لما تغلط ماتعتذرش أو ماتعترفش انك غلطان وتكابر ع ده .مهم أننا نعلمهم مهاره الاعتراف بالخطأ وتحمل النتائج أيا كانت مهم مراجعه النفس ومحاسبتها عشان لما يكبر يعرف يعتذر ويراجع نفسه سواء مع شريك حياته أو حد من أصدقاؤه ومهم يعرف أن ده مش ضعف منه بالعكس هو كده بيحافظ ع علاقاته الخاصه والاجتماعيه وكمان بيطورها وبيطور نفسه معاها اللي بيعرف يعتذر ويتأسف ده شخص راقي ومتحضر اللي يعرف يراضي غيره ويطيب خاطر اللي حواليه ده حد ف قمه النضج والاحترام لانه بيعرف يكسب غيره ويحتويه بقول كده لان شفت ف عيادتي ام أحد الأطفال بتعتذر وتتاسف للسكرتيره علي خطأ أو تجاوز حصل من حماتها اللي جايه معاها ياااااه يعني في وسطينا ناس ممكن تعتذر ع خطأ غيرها ايه الجمال ده والعظمه دي أكيد الام دي ف بيتها بتعرف تعتذر وتطيب خاطر اللي حواليها كويس اكيد بيتها مليان سلام وتسامح وعارفه تعلم ده لأطفالها .....فعلا الاعتذار ومراجعه النفس من شيم الكبار

18/08/2026

تحذير هام
ممنوع منعا باتا ف النزلات المعويه الحاده وخاصه المصحوبه بجفاف واسهال شديد أو ترجيع شديد استخدام خوافض الحراره زي الديكلوفيناك والايبوبروفين والمسموح فقط هو ماده الباراسيتامول فقط وذلك منعا لاصابه الكلي بفشل حاد لاقدر الله .للاسف النهارده شفت حاله طفله عمرها سنه ونص اخدت علبه لبوس كامله من ماده الديكلوفيناك خلال يومين ودي جرعه خطر جدا ممكن تعمل فشل كلوي حاد أو قرحه بالمعده والافضل للحالات الطارئة استخدام ادويه تحتوي ع ماده الباراسيتامول لحين زياره الطبيب المعالج

16/08/2026

من طرق التربيه السيئه انك تربي ابنك علي الانانيه وحب الذات وعدم مراعاه مشاعر أو مصالح الغير انك تربي فيه أنه اهم حاجه مصلحته حتي لو حيعتدي ع حقوق غيره أو يدوس ع غيره عشان ينجح أو يطلع من موقف معين بعد كده ماتستكرش عليه أنه يعمل اي حاجه غلط عشان يوصل للي هو عاوزه حتي لو حياذي غيره ربي ابنك أنه يفكر ف غيره ويبدي مصلحه غيره ع نفسه عشان يعيش انسان مش حيوان بيصارع غيره وبيقتل غيره عشان هو يعيش ربيه ع حب المجتمع اللي عايش فيه ربيه ع الانتماء ليه عشان يطلع يخدم مجتمعه وناسه وأهله عشان كده ف حياتنا بنشوف الناس الخيره اللي بتحب تعمل الخير ف اي مكان واي وقت وبرضه بنشوف الناس الجشعه الطماعه اللي بتدوس ع مصالح الناس وبتاكل مال اليتيم والنوعيه دي زي اللي بيغسل عربيته ف الشارع ويغرق الشارع ميه مش مهم أو اللي بيرش ميه ف عرض الشارع ومش بيراعي الماره أو العربيات وزي االي بيرمي زباله تحت العماره بتاعته ومكسل يوديها الصندوق أو اللي بيلعب كوره ومش مقدر واحد تعبان أو طالب عنده امتحان أو زي اللي عنده فرح أو سبوع أو طهور ومعلي الكاسيت ع الآخر دون مراعاه لشعور الجيران أو ازعاجهم أو البياع اللي يتصحي من احلي نومه ع صوته المجلجل أو اللي راكب موتوسيكل اوتوكتوك ومدي كلكسات براحته مع أنه محدش قدامه هو عايز يعمله جو وزيطه وبس مايهمهوش غيره والأمثلة كتيييير لا يتسع المقال لها .دور ع التربيه هي الأساس وبعدين قول اللي انت عايزه

10/08/2026

ليا فتره كبيره ملاحظ أن الأطفال بقيت عصبيه زياده مجرد ماتنام ع سرير الكشف وللاسف مابقاش ينفع معاهم تحايلهم ولا بمصاصه ولا بالونه ولا شخليله هنا بتكلم عن اطفال ف حدود السنه اللي هو لازم يتفاعل وينبسط بالحاجات دي معرف الجينات بتاعتهم اتغيرت ولا مودهم اتغير ولا اتاثروا بحاله النكد والعنف الأسري والعصبيه والصوت العالي اللي بقي ف اغلب البيوت دلوقتي ولا بقي اللي يسكتهم ويلهيهم الشاشات اللي عودناهم عليها من صغرهم لدرجه ان الطفل مش بيسكت غير لما يسمع الاغنيه اللي متعود عليها بس كمان لاحظت أن في علاقه وثيقه بين هدوء الاب والام ف البيت وظهور العصبيه والصراخ المبالغ فيه ف الاطفال لأن الطفل بيقلد اللي بيشوفه ف البيت للاسف وده اتاكدلي كمان لما بلاقي طفل أثناء الكشف وده بقي حاله نادره أنه بيضحك لي ومتجاوب معايا ومتقبل الكشف بكل سهوله وده بيخليني اقول ياريت كل العيال زيك وبقول كده لمامته ولاحظت عندي كذا حاله يتعدوا ع الاصابع زي كده صدقوني بلاقي الاب والام ف قمه الهدوء النفسي والتفاهم والسلام وطريقتهم وصوتهم وسلامهم الداخلي واضح عليهم وعلي حوارهم وكلامهم يابخت الاطفال دول بوالديهم اللي مشبعينهم حب وحنان وامان حيطلعوا احسن اطفال وعندهم استقرار نفسي وشبع عاطفي لما يكبروا .أما الطفل النكدي يفضل يبكي من اول الكشف لاخره حتي بعد م الدكتور يخلص كشف ويسيبه ده اكيد ضحيه النكد والعنف الأسري والصوت العالي ف البيوت ده من وجهه نظري سبب رئيسي اللي عنده سبب تاني يكتبلي وياريت نخلي بالنا من الصوت العالي والعصبيه ف البيوت عشان خاطر ولادنا وامانهم واستقرارهم النفسي وتلحق نفسنا قبل فوات الاوان

08/08/2026

المرافق اللي جاي مع المريض ايا كانت صفته وداخل اوضه الكشف وبيتكلم ف التليفون أو سايب تليفونه يرن كل شويه بخلاف ان ده عيب ومايصحش وفيه عدم احترام للطبيب والمكان فده بيضر بمصلحه المريض بتاعه ضرر كبير لأن جزء كبير من تشخيص المرض بيعتمد ع سماع التاريخ المرضي للطفل المريض وسماع شكوي الام بكل دقه واهتمام ومراعاه الهدوء وعدم تشتيت الطبيب أثناء الكشف ده دور وواجب أساسي ع كل مرافق لازم يلتزم بيه حرصا ع مصلحه المريض والوصول الي التشخيص السليم باذن الله .وشكرا لتفهمكم

06/08/2026

الطفل بعد السنه مش بيستغني عن اللبن وبيعتمد ع الاكل يبقي اللبن سواء الرضاعه الطبيعيه أو اللبن الصناعي رقم ٣ أساسي لبناء العظام والأسنان وتكوين طفل صحي قوي لغد افضل ومشرق حتي عمر سنتين ع الاقل
والام اللي ناويه تفطم ابنها عن الرضاعه الطبيعيه تعمل حسابها أنها حنستخدم لبن صناعي رقم ٣ وده لان افضل بديل للبن الام اول سنتين من العمر هو اللبن الصناعي التكميلي رقم ٣ وده عشان اللبن ف الفتره دي من العمر مش بس غذا لا ده مهم وضروري عشان النمو العقلي والتطور الإدراكي ومعدل ذكاء الطفل ف ماينفعش نضحي بلبن الام وكل فوائده وندي لبن حليب بقري أو جاموسي أو حتي المعلب ف الفتره الحرجه دي من العمر لغايه عمر سنتين ع الاقل والافضل كمان يكمل حتي عمر ٣سنوات لضمان اقصي فائده واعلي درجات التطور العقلي والحركي والادراكي لأطفالنا من أجل مستقبل أفضل لهم صحيا وعقليا وبدنيا

04/08/2026

من كام يوم حد بعتلي سكرين شوت لموقع الناس بتسال ع دكتور اطفال شاطر وحابب اشكر كل اللي رشحوني ف البوست واد ايه كميه الحب والتقدير منكم لدرجه ان كل اللي ردوا ع البوست بنسبه ٩٠٪ رشحوني مع باقي الزملاء بس مش ده المهم اللي عايز اتكلم فيه وارد عليه واحده من المتابعين الافاضل ذكرت أنها بطلت تكشف عندي عشان كل مره يطلع التهاب أذن وسطي ولما راحت لزميل تاني قالها ميكروب ف الدم وردي عليها حيكون من خلال النقاط التاليه
١-تشخيص التهاب الاذن من أصعب وأدق التشخيصات اللي بتغيب عن كتير من الزملاء الأفاضل وللاسف العيان بيجيلي باي تشخيص ومش بيخف غير لما يتشخص كويس وياخد علاج التهاب الاذن
٢ـ السنتين اللي فاتوا من اكتر السنوات اللي مرت عليا (وانا شغال ليا حوالي ١٥سنه ف العياده )اللي شخصت فيها التهاب إذن وسطي وكأنه وصل لدرجه الوباء
٣-سهل عليا اوي أقوللك تشخيص زي ماقاللك الزميل الفاضل أنه ميكروب ف الدم بس امانتي وضميري يخليني لازم ابلغ المريض باللي شوفته وشخصته أما تشخيص ميكروب ف الدم ده تشخيص مبهم ومش محدد لأن أي التهاب ف الجسم زي الحلق أو اللوزتين أو الاذن الوسطي هو اكيد سببه ميكروب ف الدم في الاول وبعدين عمل التهاب اللوزتين أو الاذن الوسطي سهل نضحك ع العيان ونقول اي كلام لكن الصعب انك تكون واثق ف تشخيصك وماتقدرش تغيره تحت اي ظرف أو ضغط خاصه اني باسجل. التشخيص السابق وسهل اني اغير فيه عشان ارضي الام او الاب
٤ـ تكرار التهاب الاذن الوسطي ده وارد جدا ف وجود اب أو ام مدخن أو حتي الجد أو الخال ووارد لو الطفل عنده كمان حساسيه الجيوب الأنفية ودي منتشره جدا وكمان سبب تاني لتكرار التهاب الأذن هو وجود لحميه متضخمه لازم تتشال جراحي ف بدل مانستغرب تكرار التشخيص ندور ع السبب مش تغير الدكتور ونروح لحد يطمنا أو يسكن ضميرنا باي تشخيص والسلام
٥-تشخيص ميكروب ف الدم لازم يعتمد ع تحليل دم وماينفعش نقول التشخيص ده الا ف غياب أي بؤره صديديه زي التهاب الحلق أو الاذن او اللوزتين الا إذا كان المقصود تسمم دموي لاقدر الله وده مكانه ف العنايه المركزه
٦-حالات كتير. بتيجي العياده من زملا أفاضل بسألهم عن تشخيص الطبيب السابق للاسف مش بيعرفوا وهنا احب أكد أن من حقك كمريض تعرف تشخيص ابنك بالظبط ايه وايه مضاعفات المرض أو العلاج لاقدر الله عشان كده لازم تطلع من عند طبيك وانت عارف تشخيص حاله ابنك كويس
اسف ع الاطاله ولكن لزم التوضيح حرصا ع مصلحه المريض واحتراما لثقته وتقديره

27/05/2026

23/05/2026

تعلن العياده عن عوده العمل بها اليوم السبت الموافق 23/5 بعد عوده الطبيب من السفر لحضور مؤتمر يختص بأمراض الجهاز الهضمي للاطفال وسوء التغذيه والمنعقد في العاصمه الهولنديه امستردام ف الفتره من 14الي 17مايو بمشاركه نخبه من اساتذه طب الاطفال في مصر والوطن العربي ومناقشه احدث السياسات والتوصيات في علاج أمراض الجهاز الهضمي وسوء التغذيه ف الاطفال وحديثي الولاده حرصا منا علي مواكبه التقدم والتطور في مجال طب الاطفال وحديثي الولاده دعما وخدمه لأطفالنا ووفاء لثقتكم بنا التي هي وسام ع صدورنا