18/08/2025
تعالي أقولك بيحصل إيه لابنك لما تصرخي في وشه أو تزعقيله..
عارفة اللحظة اللي بتكوني متعصبة فيها وبتزعقي بصوت عالي لابنك؟ وانا عارف ان اللحظة دي في امهات كتير بتحس انها ضرورية علشان إبنك يسمع الكلام؟
بس عايزك تفهمي ان اللي بيحصل لابنك في اللحظة دي صدقيني بيكون أكبر بكتير من مجرد دمعة بتنزل أو خوف بيبان في عينه
أولاً: نفسياً:
الصوت العالي والصراخ بيدخل دماغ الطفل زي الصفارة الحادة، بيخليه يحس إنه مش آمن حتى مع الشخص اللي هو المفروض يحس معاه بالأمان
الطفل بيتولد وهو شايفك مصدر الحنان والاحتواء، ولما بتزعقيله، دماغه بتترجم ده كـ خطر ويتكون عنده شعور داخلي اسمه "أنا مش محبوب"
يتولد عنده خوف من الغلط مش حب للصح، يعني بدل ما يتعلم ويعمل الصح علشان هو مقتنع، بيعمله علشان هو خايف أو علشان ماما ماتزعقش
ثانياً: إدراكيا:
عارفة إن في لحظة الصراخ دي، مخه بيتوقف تماماً عن الفهم؟
الجهاز العصبي عنده بيدخل في حالة اسمها (قاوم أو اهرب) والمخ وقتها ما بيقدرش يستوعب ولا يتعلم حاجة
يعني كل كلمة بتقوليها وهو خايف، ما بيدخلش منها غير صوتك العالي بس ، والرسالة اللي بتوصله: أنا غلط، أنا وحش ، حتى لو ظاهر انه بيضحك أو مش متأثر
تكرار ده بيأثر على قدرته على التركيز وعلى استيعابه، لأنه دايمًا دماغه مشغولة بالخوف أكتر من الفهم.
بيغير طريقة نمو الدماغ ، يعني بدل ما الطفل يفكر إزاي يتصرف وازاي يبني ده ويعمل ده ويتصرف هنا إزاي( وده اللي بينمي قدراته العقلية)
بيخليه طول الوقت يفكر في رد فعل ماما وبس ، وهنا طريقة نمو الدماغ والتفكير بيتغير تماماً.
ثالثاً: جسدياً:
الصراخ المستمر بيرفع (هرمون التوتر) عند الأطفال لدرجة كبيرة، وده بيأثر على النمو الطبيعي للمخ والجسم.
ممكن تلاقي ابنك بيشتكي من وجع بطن، صداع، قلة نوم، أو تبول لا إرادي، وكل ده سببه الضغط اللي بيحس بيه من الصراخ.
رابعاً: سلوكياته وشخصيته:
الطفل اللي بيتعرض للصراخ كتير، بيبقى عنده واحد من طريقين:
يا إما يبقى عنيد جداً لأنه عايز يثبت نفسه ويقاوم الصوت العالي.
يا إما يبقى منطوي وخجول، لأنه فقد الثقة في نفسه وخايف يغلط.
والأصعب إن الصراخ بيعلم ابنك لغة العنـ ف، يعني لو إنتي بتزعقي فيه، هو هيزعق في أخوه وغيره ، وهيفتكر إن ده الأسلوب الطبيعي في حل المشكلات.
عارف إن الموضوع ساعات بيكون صعب على الأم خاصة لو عندها اكتر من طفل أو لو كانت بتشتغل بس صدقيني كل حاجة بتزرعيها في ابنك النهاردة هتريحك كتير بكره إن شاء الله
أنا مش بقولك كلام مثالي أو محفوظ أنا بقولك كلام ملموس من أطفال كتير بتجيلي للاسف بسبب النقطة دي حرفياً محتاجين شهور وممكن سنين عشان يتعالجوا منها
وصدقيني ابنك مش محتاج أم مثالية ما بتغلطش، هو محتاج بس أم تحتويه حتى وهو غلطان، تحضنه وهو خايف، وتعلمه من غير ما تكسره.
الصوت العالي يمكن يوقف الغلط لحظتها، لكنه بيبني جوا قلب ابنك جدران من الخوف، بدل جسور من الحب والثقة
