د. داليا يحيى إبراهيم ''دليلك للرضاعة الطبيعية وتغذية الطفل''

25/08/2026

الشهر ده كان معانا ٢ من الاأمهات الجميلات لتوأم ثنائي، بحييهم على صبرهم وإصرارهم مع أطفالهم التوأم ❤️

بدأنا معاهم رحلة الرضاعة الطبيعية خطوة بخطوة…

وما بين أطفال بقوا عمر شهرين لـ ٣ شهور، وصلنا معاهم في النهاية إلى رضاعة طبيعية مطلقة للتوأم🤍

مع الصبر، والإصرار، والدعم الصح… قدرنا نوصل لهدفنا.

الرضاعة الطبيعية للتوأم مش مستحيلة ❤️
ورضاعة التوأم من الأم هي الأساس.

لكل أم لتوأم:
ما تستسلميش من البداية… اطلبي الدعم، وخدي الرحلة خطوة بخطوة. 🌷

د/ داليا يحيى
استشاري دولي الرضاعة الطبيعية (IBCLC)

21/08/2026

🤱 إمتى تزوري عيادة الرضاعة الطبيعية؟
مش لازم تستني لحد ما المشكلة تكبر…
ولأن دايمًا الوقاية خير من العلاج، المساعدة بدري بتفرق جدًا في نجاح الرضاعة الطبيعية. 💜

👶 أثناء الحمل
علشان تستعدي للرضاعة، وتتعرفي على الأوضاع المختلفة، والالتقام الصحيح، وإيه المتوقع في أول أيام بعد الولادة.

🤱 بعد الولادة مباشرة
لو طفلك مش عارف يمسك الثدي كويس، أو واجهتك أي مشكلة في بداية الرضاعة.

😣 لو الرضاعة مؤلمة
أو عندك تشققات أو جروح بالحلمة، أو ألم أو تورم أو التهابات في الثدي.

🤱 لو طفلك بيرفض الثدي
أو الرضاعة مش ماشية بشكل طبيعي، ومحتاجة تعرفي السبب والطريقة المناسبة للتعامل مع المشكلة.

📉 لو في مشكلة في وزن الطفل
أو وزنه مش بيزيد بالشكل المتوقع، ومحتاجة تقييم للرضاعة وطريقة حصول الطفل على اللبن.

💧 لو قلقة إن اللبن قليل
قبل ما تبدأي لبن صناعي أو أي تدخلات، الأفضل تقييم السبب أولًا والتأكد من وجود مشكلة فعلية في إدرار اللبن.

🔄 لو حصل توقف أو قلّت الرضاعة
ومحتاجة ترجعي للرضاعة الطبيعية أو تزودي إدرار اللبن، ممكن يتم وضع خطة مناسبة حسب حالتك وحالة طفلك.

🍼 لو طفلك بيستخدم زجاجة أو Ni**le Shield
ومحتاجة تعرفي إيه البدائل، ومتى وكيف يتم الاستغناء عنهم بطريقة مناسبة.

👶 لو طفلك مولود قبل ميعاده أو عنده ظروف خاصة
ويحتاج خطة رضاعة ومتابعة مناسبة تساعده على الحصول على احتياجاته من اللبن.

👩‍🍼 لو بتكفلي طفل وعايزة ترضعيه طبيعيًا
حتى لو ما حصلش حمل أو ولادة، ممكن في بعض الحالات العمل على Induced Lactation ووضع خطة مناسبة لتحفيز إدرار اللبن.

💊 لو بتاخدي أدوية أو عندك مشكلة صحية ومحتارة تكملي الرضاعة ولا توقفيها
ما توقفيش الرضاعة من نفسك… اسألي المتخصص لتقييم الدواء أو الحالة الصحية وتأثيرها على الرضاعة والطفل.

💜 وأهم نصيحة: ما تستنيش المشكلة تكبر.
كل ما طلبتي المساعدة بدري، كان التعامل مع المشكلة أسهل.

👩‍⚕️ د. داليا يحيى
استشاري الرضاعة الطبيعية بمستشفى الأطفال التخصصي ببنها
📅 موعد عيادة الرضاعة الطبيعية:
كل يوم سبت – الساعة 12 ظهرًا في العيادات الخارجية – مستشفى الأطفال التخصصي ببنها

20/08/2026

جمله بتتقال تبان بسيطه
لكنها بتكون بدايه لمشاكل الرضاعه اللى فى المنهج
ما بين التباس حلمات
لقله لبن الام
لرفض الطفل للثدى
لحساسيه الالبان

ومشاكل كتير بتبدأ من قرار اتاخد بسرعة…
من غير ما نسأل: هو الطفل فعلًا محتاج لبن صناعي؟ وليه؟

اللبن الصناعي علاج… وليس قرارًا يُؤخذ من تلقاء أنفسنا او عن وصف الغير متخصصين.
يُستخدم عند وجود داعٍ طبي حقيقي، وبعد تقييم الطفل ووصف طبيب الرضاعه الطبيعيه

17/08/2026

نزول وزن المولود في أول أيام… إمتى طبيعي وإمتى يحتاج متابعة؟ 👶⚖️

بعد الولادة، من الطبيعي إن معظم المواليد يفقدوا جزءًا من وزنهم خلال الأيام الأولى، وده مش معناه تلقائيًا إن لبن الأم غير كافٍ. 🤱

🟢 النزول الطبيعي:
غالبًا يفقد المولود حوالي 5–7% من وزن الولادة، وقد يصل في بعض الحالات إلى نحو 10%، خاصةً مع الولادة القيصرية.
ويستعيد الطفل وزن الولاده ما بين اليوم ١٠ : ١٤

🔴 إمتى نحتاج متابعة؟
لو فقد الطفل اكثر من 10% من وزن الولادة، أو كان النزول مستمرًا، أو ظهرت علامات تدل على عدم كفاية الرضاعة، مثل:
• قلة عدد مرات الرضاعة
• قلة البلل والبراز بما يتناسب مع عمر الطفل وهو ما يحدده الطبيب طبقا لعمر الطفل
• خمول أو صعوبة في إيقاظ الطفل للرضاعة

📌 المهم: ما ناخدش قرار إدخال اللبن الصناعي لمجرد رقم على الميزان.
الأهم هو تقييم الطفل بالكامل، وطريقة الرضاعة، وفعالية مصّ الطفل، وعدد مرات التبول والتبرز، ومتابعة الوزن.

وفي كثير من الحالات، لا تكون المشكلة في كمية اللبن، وإنما في طريقة الرضاعة نفسها؛ فقد يكون السبب وضعًا غير صحيح أو التقامًا غير فعّال للثدي، وتصحيح وضع الرضاعة والتقام الطفل بشكل صحيح قد يساعد على تحسين الرضاعة وزيادة كفاءتها

🤍 كل طفل له ظروفه… والمتابعة المبكرة تساعدنا نكتشف أي مشكلة في الرضاعة قبل ما تكبر.

لو عندكِ قلق بشأن وزن طفلك أو رضاعته، استشيري متخصصًا في الرضاعة الطبيعية.

27/07/2026

19/07/2026

هو ينفع أكفل طفل وأرضعه طبيعي؟” 🤍

الإجابة بكل بساطة: أيوه… ينفع جدًا.

كتير من الناس فاكرة إن الرضاعة الطبيعية لازم تكون بعد الحمل والولادة، لكن الحقيقة إن الأم تقدر ترضع طفل مكفول حتى وان لم يسبق لها الحمل او الرضاعه.

النجاح بيعتمد على عوامل مهمة، منها:
🌸 عمر الطفل.
🌸 وجود رغبة وصبر والتزام من الأم.
🌸 المتابعة مع طبيب أو استشاري رضاعة طبيعية.
🌸 استخدام الطرق المناسبة لتحفيز إنتاج اللبن، وقد تحتاج بعض الحالات لأدوية يحددها الطبيب.

الرضاعة الطبيعية مش مجرد غذاء، لكنها كمان:
🤍 تقوي العلاقة العاطفية بين الأم والطفل.
🤍 تمنح الطفل الشعور بالأمان والاحتواء.
🤍 تقدم فوائد صحية ومناعية للام والطفل.

لو بتفكري في كفالة طفل ونفسك يرضع طبيعي، اعرفي إن ده ممكن، ومع التخطيط والمتابعة فرص النجاح بتكون أفضل.

الأمومة مش بس حمل وولادة… الأمومة حب واحتواء،
والرضاعة ممكن تكون جزء جميل من الرحلة دي. 🤍�@

24/06/2026

الجدات الجميلات من الأمهات والحموات 💛

ماذا كنتم فى الماضى فاعلات؟
قبل اختراع الصناعات،
أكان لبن الأم لا يكفى؟
أم كان كافى فى أغلب الأوقات؟

سيبوا الأمهات فى حالها… منهم للطبيبات.
ليه متخيلين إنهم لأولادهن غير كافيات؟ 🙃😇

لا تجعلوا الأم تشعر أنها غير كافية لطفلها، فالكلمات قد تهز ثقتها أكثر مما تتخيلون.

في معظم الحالات، الرضاعة الطبيعية تكفي إذا كانت تُدار بشكل صحيح، ويُقيَّم الطفل بالمتابعة الطبية وزيادة الوزن، وليس بالآراء أو الضغوط.

كونوا سندًا للأم، لا سببًا في قلقها. 🤍

د/ داليا يحيى
استشاري دولي الرضاعة الطبيعية (IBCLC)

21/06/2026

🔴 فقدان الطفل للوزن خلال الأسبوع الأول من الولادة لا يساوي إدخال لبن صناعي.

👶 هل تعلم أن معظم الأطفال حديثي الولادة يفقدون حتى 10% من وزن الولادة خلال الأسبوع الأول؟

وهذا أمر طبيعي في أغلب الأطفال، ولا يعني أن لبن الأم غير كافٍ.

🟢 بعد ذلك، يبدأ الطفل في استعادة وزنه تدريجيًا، ويصل إلى وزن الولادة مرة أخرى في عمر أسبوعين تقريبًا إذا كانت الرضاعة الطبيعية تسير بشكل جيد

✅🔅تذكري…
ليس كل طفل يفقد وزنًا في الأيام الأولى يحتاج إلى لبن صناعي، بل يحتاج أولًا إلى تقييم صحيح ودعم للرضاعة الطبيعية

19/06/2026

🔴 مش كل عدم زياده فى الوزن تساوي لبن صناعي

🎯 Ni**le feeder

مصطلح شائع لكن أحيانًا نتجاهله.

معناه إن الطفل بيرضع على الحلمة فقط.

مشكلته الأشهر بتكون تشقق الحلمات وألم الأم مع الرضاعة.

لكن فيه مشكلة تايهة في النص…

الحالات دي بتيجي أحيانًا، بل كثيرًا، بأن وزنها مش بيزيد.

تفتكروا إيه أول خطوة؟

للأسف أول خطوة بتكون إننا بندخل لبن صناعي، اعتقادًا أن لبن الأم غير كافٍ.

في حين أن ضبط وضع الرضاعة فقط يحل المشكلة عند الأم، ويزيد الوزن.

قبل ما نحكم إن اللبن غير كافٍ… لازم نتأكد أولًا إن الرضاعة نفسها ماشية بشكل صحيح. �

للحجز :
ت: 0133268388
للتواصل واتس : 01060547504

📍 العنوان:
بنها اول شارع عطا من اتجاه شارع العدلي
بجوار اوسكار للاحذيه

🕓 المواعيد:
📅السبت والاثنين والاربعاء
⏰ من ٥ مساءً حتى ٨ مساءً