عيادة د/ محمد الصعيدى أستشاري الباطنه والسكر والكبد والجهاز الهضمي

10/09/2026

🔬 إيه هي الأعراض اللي تستدعي الفحص ومنظار المعدة ؟!

1️⃣ صعوبة أو ألم عند البلع (Dysphagia / Odynophagia) :
لما تحس إن الأكل بيتحشر في زورك أو صدرك ومش بينزل بسهولة، أو فيه ألم شديد مع بلع اللقمة.

2️⃣ فقدان الوزن غير المبرر (Unexplained Weight Loss) :
إنك تخس بشكل ملحوظ وسريع من غير ما تكون عامل دايت أو مجهود.

3️⃣ قيء مستمر أو خروج دم :
سواء كان قيء متكرر مبيتحسنش بالعلاج، أو ترجيع متخالط بدم (أو لون شبه القهوة)، أو ملاحظة أن لون البراز بقا أسود داكن جدا.

4️⃣ أنيميا ونقص هيموجلوبين بدون سبب واضح :
الشعور بإرهاق مستمر وشحوب بالوجه، وتكتشف بالتحليل إن فيه نقص في الحديد .. ده وارد يكون نتيجة نزيف خفي من المريء أو المعدة.

5️⃣ ألم الصدر الممتد للظهر أو الذراع :
خاصة لو الالم شديد ومستمر، لازم نستبعد الأول أي مشكلة في القلب (Cardiac origin) قبل ما نقول إنه مجرد ارتجاع!

6️⃣ عدم الاستجابة لأدوية الحموضة :
بتاخد أدوية تثبيط الحمض (زي الـ PPIs) بانتظام لمدة أسبوعين أو أكتر وما زالت الأعراض مزعجة ومستمرة.

دمتم سالمين بكل خير وصحة وعافيه 🌹💙

عيادة د_محمد_الصعيدى
إستشاري الباطنه والسكر والكبد والجهاز الهضمي _ كلية الطب جامعة عين شمس
العيادة : بيلا - كفر الشيخ شارع المحكمه امام صيدلية د. رضا شاور بجوار أسواق أبو غريب.

للحجز والاستعلام :
عيادة : 01023315120
واتس : 01119602095

09/09/2026

08/09/2026

مرض سيلياك ( حساسية قمح/جلوتين ) ..
10 علامات لازم تخليك تشك في حساسية القمح ...

- السيلياك مش مجرد مرض بيعمل إسهال وانتفاخ ..
ده مرض مناعي ذاتي، الجسم فيه بيتعامل مع الجلوتين الموجود في القمح والشعير كأنه خطر، وده مع الوقت بيحصل التهاب وتلف في بطانة الأمعاء الدقيقة، وبالتالي مشكلة في امتصاص مواد غذائية مهمة جدا.
والأغرب إن بعض المرضى ممكن يعيشوا سنين بأعراض بسيطة أو بأعراض مالهاش علاقة واضحة بالبطن أصلا.

1️⃣ إسهال مزمن أو متكرر :
خصوصا لو الإسهال مستمر لفترة طويلة، أو مصحوب بانتفاخ وغازات وألم بالبطن.
وفي الغالب البراز نفسه بيكون لزج زي المخاط، دهني أو حجمه كبير أو صعب التنظيف، بسبب سوء امتصاص الدهون.
- لكن مش كل إسهال مزمن = سيلياك.
السيلياك مجرد واحد من الأسباب التهابات الامعاء والقولون.

2️⃣ انتفاخ وغازات وألم بطن بدون تفسير واضح :
تلاقي المريض يقولك
- أنا كل ما آكل بطني تنفخ.
- بطني طول الوقت مليانة غازات.
أو عندي مغص متكرر ومش عارف سببه.
وأحيانا المريض يتشخص قولون عصبي ويعيش سنين على إنه قولون عصبي، وهو في الحقيقة سيلياك.
وده سبب مهم إن تشخيص السيلياك ماينفعش يعتمد على الأعراض لوحدها.

3️⃣ أنيميا نقص الحديد اللي مش بتتحسن :
ودي من أهم العلامات.
- مريضة عندها أنيميا نقص حديد...
تاخد الحديد...
وبالرغم من العلاج، التحسن ضعيف أو الأنيميا ترجع تاني.
- هنا لازم نسأل:
هل هي بتخسر دم؟
هل الدورة شديدة؟
هل فيه نزيف من الجهاز الهضمي؟
ولا المشكلة إن الحديد أصلا مش بيتمتص كويس؟
- لأن السيلياك ممكن يعمل سوء امتصاص للحديد، وبالتالي الأنيميا ممكن تكون أحيانا هي أول حاجة تلفت نظرنا للمرض.

4️⃣ نقص وزن أو صعوبة في الحفاظ على الوزن :
خصوصا لو معاه إسهال مزمن، انتفاخ، نقص فيتامينات أو علامات سوء تغذية.
- لكن برضه ... السيلياك مش لازم يخلي المريض نحيف.
فيه مرضى عندهم وزن طبيعي، وفيه مرضى عندهم زيادة وزن أصلا.
فشكل الجسم لوحده مش بيشخص السيلياك.

5️⃣ نقص فيتامينات ومعادن بدون سبب واضح :
لما تلاقي المريض عنده أكثر من مشكلة في نفس الوقت
حديد قليل...
فيتامين د قليل...
فيتامين ب12 أو حمض الفوليك قليل...
كالسيوم قليل...
أو علامات سوء تغذية...
- لازم نفكر:
هل المشكلة في الأكل؟
ولا في الامتصاص؟
لأن الأمعاء الدقيقة هي المكان الأساسي لامتصاص عدد كبير من العناصر الغذائية، ولما يحصل فيها التهاب وتبوظ الأهداب المسؤولة عن الامتصاص فيها بسبب السيلياك، ممكن تظهر مجموعة من النواقص الغذائية.
وعشان كده بعد تشخيص السيلياك بنقيم النواقص الغذائية ونعالجها حسب احتياج كل حالة.

6️⃣ هشاشة أو ضعف في العظام في سن صغير :
ودي نقطة مهمة جدا ان مرض السيلياك ممكن يؤدي إلى سوء امتصاص الكالسيوم وفيتامين د، ومع استمرار المشكلة يحصل اضطراب في توازن العظام.
- أحيانا المريض ييجي يقول :
أنا عندي هشاشة وأنا لسه صغير...
هنا السيلياك ممكن يكون واحد من الأسباب اللي لازم تتراجع حسب الحالة.

7️⃣ ارتفاع إنزيمات الكبد بدون سبب واضح :
- مريض عنده ALT وAST مرتفعين...
تحاليل الفيروسات كويسة...
السونار مش مفسر الصورة...
ومفيش سبب واضح.
- السيلياك ممكن يكون مرتبط بارتفاع إنزيمات الكبد عند بعض المرضى، وده من المظاهر اللي ممكن تظهر بعيدا عن الجهاز الهضمي.
وطبعا ده مش معناه إن أي ارتفاع في إنزيمات الكبد يبقى سيلياك.
لكن في الصورة المناسبة، المرض بيبقى على قائمة الاحتمالات.

8️⃣ أعراض عصبية أو إرهاق شديد :
- تنميل...
شكشكة في الأطراف...
صداع...
إرهاق مستمر...
صعوبة في التركيز...
إحساس بالـتوهان...
- في بعض المرضى ممكن تظهر مشاكل عصبية أوضح.
وده بيأكد لنا مرة تانية إن السيلياك مش مرض أمعاء فقط.
هو مرض مناعي ممكن يكون له مظاهر خارج الجهاز الهضمي.

9️⃣ تقرحات الفم المتكررة أو أعراض جلدية معينة :
بعض المرضى ممكن يكون عندهم تقرحات فموية متكررة.
وفيه مرض جلدي مرتبط بالسيلياك اسمه Dermatitis herpetiformis.
وده مرض جلدي مميز ممكن يظهر في صورة حكة وطفح جلدي، ووجوده لازم يخلينا نفكر بقوة في السيلياك.

🔟 والأهم ... المريض يكون عنده مرض مناعي ذاتي آخر :
زي مرض هاشيموتو أو أمراض الغدة الدرقية المناعية الذاتية.
لأن السيلياك وهاشيموتو الاتنين أمراض مناعية ذاتية.
يعني المشكلة مش إن الجلوتين بيعمل هاشيموتو بشكل مباشر.
لكن الشخص اللي عنده استعداد مناعي ذاتي ممكن يكون أكثر عرضة لظهور أكثر من مرض مناعي ذاتي في نفس الوقت.
وعشان كده وجود هاشيموتو، التهاب الغدة الدرقية مع أعراض هضمية أو أنيميا نقص حديد أو نقص فيتامينات أو هشاشة أو أعراض غير مفسرة، ممكن يكون سبب يخلي الطبيب يفكر في فحص السيلياك.
والعكس صحيح.
المريض اللي عنده سيلياك يستحق متابعة مناسبة للغدة الدرقية حسب حالته، خصوصا إن أمراض الغدة المناعية الذاتية من الأمراض المرتبطة بالسيلياك.

⬅ لو شكينا في السيلياك ...
أول حاجة لازم تعرفها :
أوعى توقف الجلوتين من نفسك قبل ما تعمل الفحوصات.
دي من أهم النقاط في الموضوع كله.
لأن تحاليل السيلياك بتعتمد على إن الجسم بيكون لسه بيتعرض للجلوتين.
لو المريض بطل العيش والمكرونة والمخبوزات قبل التحاليل، ممكن الأجسام المضادة تقل، وممكن الصورة التشخيصية تبقى أقل وضوح.
يعني ممكن تعمل لنفسك أكل خالي من الجلوتين ووتدخل بعدها في دوامة:
أنا اتحسنت...
يبقى عندي سيلياك؟
مش بالضرورة.
تحسن الأعراض بعد إيقاف الجلوتين لا يثبت وحده إن عندك سيلياك.
طيب بنعمل إيه؟
التحاليل الأساسية في البداية غالبا :
Total IgA
tTG-IgA
وده الاختبار الأساسي في أغلب البالغين والأطفال الأكبر سنا.
ليه بنعمل Total IgA؟
لأن فيه مرضى عندهم IgA ناقص بشكل طبيعي..
وفي الحالة دي ممكن اختبار tTG-IgA يطلع سلبي كاذب.
وساعتها بنلجأ لاختبارات تعتمد على IgG، زي DGP-IgG أو tTG-IgG حسب الحالة.
ولو النتيجة إيجابية أو الشك الإكلينيكي عالي، بنكمل التقييم بالطريقة المناسبة.

⬅ هل تحليل الدم لوحده كفاية ؟!
في البالغين... غالبا لا.
- التشخيص المؤكد في كثير من الحالات بيحتاج منظار علوي وأخذ عينات متعددة من الاثني عشر لتقييم بطانة الأمعاء.
لأن السيلياك ممكن يعمل تغيرات مميزة في الأمعاء، منها ضمور الأهداب الماصة وزيادة الخلايا الالتهابية وتغير شكل الـ crypts.
والمنظار مش مجرد إن الدكتور يبص على الأمعاء ويقول شكلها كويس.
الجزء المهم جدا هو أخذ الخزعات وفحصها تحت الميكروسكوب.
وتوصيات الكلية الأمريكية للجهاز الهضمي الحديثة بتأكد دور المنظار والخزعات في تأكيد التشخيص عند البالغين.

⬅ العلاج الأساسي لحد دلوقتي هو :
- وقف الجلوتين تماما
Gluten-free diet
ودي مش معناها: أبطل العيش وخلاص.
الموضوع أكبر من كده.
القمح...
الشعير...
الجاودار...
وكل المنتجات اللي تحتوي عليهم لازم تتراجع بعناية.
وفيه مشكلة مهمة جدا اسمها Cross-contamination.
يعني ممكن الأكل نفسه مفيهوش جلوتين، لكن اتلوث أثناء التصنيع أو التحضير بأكل يحتوي على جلوتين.
وعشان كده المريض محتاج يتعلم قراءة المكونات، ويعرف إزاي يختار أكله، وإزاي يتعامل مع المطاعم والمطبخ.

والعلاج :
- أولا : نمنع جلوتين من أكلنا تماما عشان الهجوم المناعي على الأهداب المسؤولة عن الامتصاص في الأمعاء يقف والجسم يرجع يجدد الأمعاء من تاني...

- ثانيا : لازم نشوف الجسم خسر إيه بسبب المرض.
لو فيه نقص حديد، نعالجه.
ولو فيه نقص فيتامين د، نعالجه.
يعني بنعالج المريض كله...
مش مجرد نتيجة تحليل السيلياك.
CBC
Iron studies
Vitamin B12
Folate
Vitamin D
Calcium

- ثالثا : لو فيه مشكلة في الغدة الدرقية، تتعالج بشكل مستقل.
وهنا نرجع تاني لهاشيموتو...
لأن دي نقطة بشوفها مهمة جدا.
مريضة عندها هاشيموتو...
ومعاه أنيميا نقص حديد...
وانتفاخ وتعب...
أو نقص فيتامينات...
أو هشاشة...
هل كل حاجة لازم تتفسر على إنها من الغدة؟
لا.
ممكن يكون فيه سبب تاني مصاحب.
وممكن السيلياك يكون واحد من الأسباب اللي محتاجين نستبعدها.
وفي المقابل، مريض السيلياك لو عنده تعب مستمر أو تغير في الوزن أو أعراض تشبه الخمول، مش لازم نفترض إن السبب كله من السيلياك.
ممكن يكون عنده هاشيموتو أو قصور بالغدة ويحتاج تقييم وظائف الغدة.
وده مثال مهم جدا على إن الطب مش مجرد ربط عرض واحد بتشخيص واحد.

طيب بعد ما نبدأ العلاج...
هل خلاص؟
برضه لا.
السيلياك مرض مزمن، والمتابعة جزء أساسي من العلاج.
بنتابع:
الأعراض...
الوزن...
التحاليل اللي كانت غير طبيعية...
الأنيميا...
الحديد والفيتامينات حسب الحالة...
والالتزام بالغذاء الخالي من الجلوتين.
وفي المتابعة بنستخدم أيضًا تحاليل الأجسام المضادة كجزء من تقييم الاستجابة والالتزام.
ولو المريض لسه عنده أعراض رغم الالتزام...
مش أول حاجة نقول:
يبقى السيلياك شديد.
لا.
نسأل الأول:
هل التشخيص الأصلي كان مؤكد؟
هل فيه جلوتين مستخبي في الأكل؟
هل فيه عدوى هضمية؟
هل فيه عدم تحمل لاكتوز (حساسية ألبان)؟
قولون عصبي؟
التهابات قولون؟
أو مشكلة تانية مصاحبة؟
وبعد استبعاد الأسباب الأكثر شيوعا، نبدأ نفكر في الحالات النادرة زي Refractory celiac disease.

لو فيه نقص حديد، نعالجه.
ولو فيه نقص فيتامين د، نعالجه.
يعني بنعالج المريض كله...
مش مجرد نتيجة تحليل السيلياك.

⬅ الخلاصة...
السيلياك مش مجرد إسهال.
ومش مجرد حساسية من العيش.
ومش مجرد إنك تبطل جلوتين هتحس إنك أحسن.
السيلياك مرض مناعي ذاتي له تأثير على الأمعاء وعلى امتصاص الحديد والفيتامينات والعناصر الغذائية، وممكن يظهر في صورة أنيميا، هشاشة، ارتفاع إنزيمات الكبد، أعراض عصبية أو جلدية، أو أعراض عامة جدا تخليك تدور على أسباب تانية.

- والأهم... إنه ممكن يتواجد مع أمراض مناعية تانية، وعلى رأسها أمراض الغدة الدرقية المناعية الذاتية زي هاشيموتو.
فلو عندك:
انتفاخ وإسهال مزمن...
أنيميا نقص حديد مش مفهومة...
نقص فيتامينات متكرر...
هشاشة في سن صغير...
ارتفاع إنزيمات كبد بدون تفسير...
أعراض عصبية أو إرهاق مزمن...
أو عندك هاشيموتو ومعاه أعراض من النوع ده...
ما تفترضش إن كل حاجة بسبب القولون أو الغدة.
أحيانا تشخيص واحد صح يفسر لك سنين كاملة من الأعراض.

دمتم سالمين بكل خير وصحة وعافيه 🌹💙

عيادة د_محمد_الصعيدى
إستشاري الباطنه والسكر والكبد والجهاز الهضمي _ كلية الطب جامعة عين شمس
العيادة : بيلا - كفر الشيخ شارع المحكمه امام صيدلية د. رضا شاور بجوار أسواق أبو غريب.

للحجز والاستعلام :
عيادة : 01023315120
واتس : 01119602095

06/09/2026

تأثير جرثومة المعدة على أمراض المناعة الذاتية، ووجود علامات كثيرة خارج الجهاز الهضمى لجرثومة المعدة منها :

1️⃣ اضطرابات المناعة الذاتية (Autoimmune disorders).
2️⃣ نقص الصفائح (Immune thrombocytopenia).
3️⃣ نقص الحديد المزمن.
4️⃣ الصداع النصفى.
5️⃣ أمراض الجلد مثل Chronic urticaria
6️⃣ تأثيرات على القلب والأوعية.
7️⃣ نقص فيتامين ب.12
8️⃣ اضطرابات الغدة الدرقية فى بعض الحالات.
9️⃣ بعض الأمراض النفسية مثل القلق والتوتر والاكتئاب.

دراسة منشورة عام 2006 فى مجلة
(Journal of Clinical Endocrinology & Metabolism) تبين :
- أن مرضى التهاب الغدة الدرقية Hashimoto thyroiditis المصابين بجرثومة المعدة ـ H. pylori (خصوصا من النوع CagA-positive) لديهم مستويات أعلى من Anti-TPO، وأن بعضهم شهد انخفاضا فى الأجسام المضادة ودراسات أخري صغيرة بينت تحسنا نسبيا فى وظائف الغدة بعد علاج جرثومة المعدة.

- في هذه الحالة توضح العلاقة بين H. pylori وأمراض المناعة الذاتيه (Autoimmune Molecular Mimicry)
وهو تشابه بين بروتينات الجرثومة وبروتينات الغدة الدرقية مما قد يرفع المناعة الذاتية ضد الغدة، جهاز المناعى يخلط بين “العدو” و“الذات” بسبب التشابه فى الشكل الجزيئى، فينشأ مرض مناعى ذاتى، حيث تقوم بعض سلالات H. pylori (خاصة CagA-positive) بتحفيز جهاز المناعة وتسهيل تكوين Anti-TPO antibodies عبر التفاعل المناعى ، مما يؤثر على ثبات وظيفة الغدة ويجعلها غير مستقرة.
- بعد القضاء على الجرثومة يختفى أو يقل هذا التحفيز المناعى، فتتحسن وظيفة الغدة مباشرة.

دمتم سالمين بكل خير وصحة وعافيه 🌹💙

عيادة د_محمد_الصعيدي
إستشاري الباطنه والسكر والكبد والجهاز الهضمي _ كلية الطب جامعة عين شمس
العيادة : بيلا - كفر الشيخ شارع المحكمه امام صيدلية د. رضا شاور بجوار أسواق أبو غريب.

للحجز والاستعلام :
عيادة : 01023315120
واتس : 01119602095

02/09/2026

ألم المعدة وألام الصدر ..
حموضة وارتجاع مريء ولا من القلب ؟!

01/09/2026

تحليل صورة الدم من التحاليل المهمة ..

أول تلات أرقام ممكن نبص عليها هي :
- العد الكلي لكرات الدم البيضاء.. وهي جزء من جهاز المناعة..
- رقم الهيموجلوبين اللي بيعكس الأنيميا..
- رقم الصفائح المسؤولة عن حماية الجسم من النزيف..

التلات أرقام دول هما الواجهة السريعة للتحليل، بس التفاصيل اللي تحتهم مهمة..

- ​يعني كرات الدم البيضاء مش مجرد رقم كلي وخلاص..
دي متقسمة من جواها لجيوش صغيرة، كل نوع ليه مهمة معينة..

نوع بيزيد مع العدوى البكيرية اللي هو النتروفيلز ، ونوع بيزيد مع الفيروسات أو مع أورام الدم اللي هو الليمفوسايتس، ونوع تاني بيعلى لو في حساسية أو طفيليات في الجسم اللي هو الايزينوفيلز ..

- ​نفس الكلام في الهيموجلوبين.. إحنا مش بس بنبص على رقمه عشان نعرف في أنيميا ولا لأ، إحنا كمان بنبص على "حجم" كرات الدم الحمراء نفسها..
لو حجمها صغير ده غالباً بيكون مؤشر لأنيميا نقص الحديد.. ولو حجمها كبير بنفكر في أسباب تانية زي نقص فيتامين ب12 أو حمض الفوليك..

- ​أما الصفائح الدموية، فدي الحارس بتاعنا.. لو عددها قل عن الطبيعي، الجسم بيكون عُرضة لسهولة النزيف، أو ظهور كدمات زرقا تحت الجلد من غير أي خبطات..

وطبعاً دي معلومات عامة لكن لازم تخضع للتقييم الكلي ..

التحليل في الصورة ظاهر فيه ارتفاع حاد في كرات الدم البيضاء..
وأغلب الارتفاع ده ناتج من زيادة النتروفيلز..
ودي أقرب إلى عدوى حادة مع الأعراض زي التعرق الشديد بسبب ارتفاع الحرارة..
والمريض يحتاج إلى الكشف الطبي بشكل عاجل لمعرفة السبب وبدأ العلاج اللازم..
مع سوايل أكتر لتعويض الفقد الناتج عن ارتفاع الحرارة ..

دمتم سالمين بكل خير وصحة وعافيه 🌹💙

عيادة د_محمد_الصعيدي
إستشاري الباطنه والسكر والكبد والجهاز الهضمي _ كلية الطب جامعة عين شمس
العيادة : بيلا - كفر الشيخ شارع المحكمه امام صيدلية د. رضا شاور بجوار أسواق أبو غريب.

للحجز والاستعلام :
عيادة : 01023315120
واتس : 01119602095

30/08/2026

إمتي تحتاج تشيل الزايدة حتي لو هي سليمة ؟!
Incidental or Prophylactic Appendectomy