د.محمد صلاح Dr.Mohamed Salah

04/11/2025

العلاج النفسي مش دوره يخليك تبطل تغضب
أو تحزن أو تقلق..
ولا هيعلمك تلغي مشاعرك أو تمنعها..
العلاج النفسي هيساعدك تفهم مشاعرك.. وتنظمها..
وتعبر عنها من غير ما تؤذي نفسك أو غيرك.

04/09/2025

18/08/2025

من المشاكل الموجودة في الاكتئاب الطريقة اللي بتتكلم بيها مع نفسك.. كلامك لنفسك وفكرتك عن نفسك ليهم دور كبير أوي في التأثير على مشاعرك وقراراتك.

04/06/2025

فيه نظرية نفسية مهمة جدًا في فهم العلاقات اسمها "نظرية التعلق"، بتقول إن طريقة تعامل أهلنا معانا، وإحساسنا بالأمان معاهم وإحنا صغيرين، بتأثر جدًا على شكل علاقاتنا وإحنا كبار.

الطفل اللي اتعامل باحتواء واهتمام وقت الخوف أو الزعل، بيكبر حاسس بالأمان، وبيعرف يحب ويثق في اللي حواليه.
أما اللي اتعامل بتجاهل أو قسوة أو لخبطة، ممكن يكبر عنده مشاكل في علاقاته، سواء بيخاف يفقد الناس، أو بيبعد عنهم من الأول.

فيه كذا نمط من أنماط التعلق:
١- التعلق الآمن:
بيحس بالأمان وسط الناس، بيحب وبيتحب، وبيعرف يطلب الدعم وقت ما يحتاجه.
٢- التعلق المتجنب:
بيحس إن الاعتماد على حد ضعف، فبيبعد عن الناس، ومابيعرفش يطلب مساعدة، دايمًا عامل نفسه مش محتاج.
٣- التعلق القلق:
عنده خوف من إن اللي بيحبه يسيبه، بيطلب حب زيادة، وبيقلق بسرعة، وبيبقى مش واثق في الناس.
٤- التعلق غير المنظم:
ده غالبًا بيكون نتيجة تجارب صعبة زي الإهمال الشديد أو العنف، وسلوك صاحبه بيكون متلخبط، ساعات يقرب وساعات يبعد من غير سبب واضح.

مهم جدًا تعرف إن حتى لو علاقاتك وانت صغير كانت مؤذية، وتعلقك أصبح غير آمن سواء تجنبي أو قلقي، إنت ممكن تتعافى، وتتغير.
العلاقات الآمنة، والوعي، والعلاج ممكن يغيروا حاجات كتير.

التعلق مش ضعف.. التعلق احتياج إنساني أساسي.
كلنا محتاجين نتحب، ونتشاف، ونتطمن إننا مش لوحدنا.

يا ترى أنت شايف نفسك أقرب لأي نمط من دول؟ وهل عمرك حسيت إنك بتتصرف بطريقة مش فاهمها بسبب جرح قديم؟

كل نمط وراه قصة.. يمكن قصتك فيها وجع، لكن الأكيد إنها ممكن تكمل بالوعي مش بالوجع.

30/03/2025

كل عام وأنتم بخير بمناسبة عيد الفطر المبارك.. أسعد الله أيامكم، وأعاده عليكم بالخير واليمن والبركات. تقبل الله منكم الصيام والقيام، وجعل العيد فرحة تملأ قلوبكم وسعادة تغمر أرواحكم.. عيد سعيد.