28/07/2025
(الخيال بلا علم كإنسان بأجنحة ولكن بلا قدمين)
جملة حلوة وعميقة بس ايه علاقتها بالجلسات النفسية!؟
وليه بنحتاج خطة واضحة في العلاج النفسي أصلا؟؟
لما بنتكلم عن العلاج النفسي Psychotherapy كتير ناس للأسف ممكن يفتكروا أن دي مجرد سلسلة من الجلسات اللي بنقعد وبنتكلم فيها ونفضفض والموضوع بيخلص على كده!!
ولكن ...
الحقيقة إن العلاج النفسي (الفعال) (وبغض النظر عن مدته) لازم يكون مبني على خطة واضحة
ولو مفيش خطة فالموضوع ممكن يتحول لأجنحة بتطير بينا في كل مكان ونتنقل من موضوع لموضوع وتقلب قعدة فضفضة فعلاً!
لأن خلاص مبقاش فيه قدمين نعرف هترسي بينا فين بالظبط؟؟؟
وجود خطة للعلاج النفسي مهم جداً زي بالظبط ما بيقولوا بلغة السياسة خارطة طريق أو الـ Roadmap
الخطة دي مش بس بتحدد الأهداف العلاجية
لكن كمان بتحدد إزاي هنوصل للأهداف دي
والمعالج النفسي أو Therapist أو الدكتور بيشتغل معاك علشان يبني الخطة دي بس بناءا على احتياجاتك أنت والـ Diagnosis أو التشخيص بتاعك بالتحديد
وجود خطة واضحة = يساعدك على تحقيق أهداف واضحه
زي تقليل أعراض القلق (Anxiety) أو تحسين المزاج (Mood) أو التعامل مع الضغوط في البيت أو الشغل (Stress) أو بناء علاقات صحية برضه في البيت أو الشغل (Healthy Relationships) أو علاج الصدمات النفسية (Trauma Healing) وغيره وغيره من الأهداف النفسية
فكل هدف من دول ليه مسار وطريق وتكنيكات وتدريبات وليلة كبيرة
وطبعاً فيه مرونه في الخطط وحسب سرعة كل إنسان وحسب ظروفه وحاجات تانيه كتير الخطة بتتغير وتتعدل على مقاسه
ولكن اللي بيخلي الجلسات اكتر فاعلية أصلا هو الخطة الجيدة وبعدها المعالج يقدر يعدل عليها بناءا على الـ Response أو استجابتك للعلاج أو أي ظروف جديدة ممكن تحصل
وده بيضمن حاجه مهمه جدا وهي أن العلاج بيفضل Relevant يعني متعلق باحتياجاتك المتغيرة
لذلك أنا مثلا بوقف جلسات لبعض الناس معايا!
ليه!؟
علشان قرر ياخد الموضوع لفضفضه وشايف أنه عاوز يتكلم براحته!
وفاكر أنه الجلسات معايا هتبقى لمصلحته بالشكل ده!
وناسي أنه علاج زي أي علاج وان أي طبيب أو معالج أو دكتور أو ميكانيكي أو نجار عاوز يسمعك ويخليك تتكلم براحتك (علشان يحدد المشكلة وطريقة العلاج أو الحل أو التصليح) مش لمجرد الرغي وخلاص
عارفين إنك متألم
عارفين إنك خسران
عارفين إنك موجوع
عارفين إنك مجروح
عارفين إنك مظلوم
عارفين إنك مدبوح
وعارفين أن ٨٠% من العلاج في انك تتكلم وتطلع وتعبر وتنضف
ولكن مش ١٠٠%!!!!
نصيحتي والخلاصة ...
سواء كان العلاج قصير الأجل لـ Specific Issue (مشكلة محددة) أو طويل الأجل للتعامل مع Complex Trauma (صدمات معقدة) أو Chronic Conditions (حالات مزمنة)
امسك في خطتك العلاجية وتبت فيها بايدك واسنانك وبلاش تحاول تمشي الجلسات بدماغك
لأن الخطة هي اللي بتدينا القدمين اللي بنقف بيهم على أرض ثابتة حتى واحنا بنستخدم أجنحة الخيال والمرونة والتكيف والصدر الواسع لأن الهدف حياة أفضل إن شاء الله مش شوية فضفضه!!!
دُمتم بصحة ووعي وسعادة وراحة بال
ادعيلي ولك مثل دعوتك وأكثر إن شاء الله تعالى
• For Questions or Reservation please send a Message.
• Sessions are available IN Center and Online.
#جراح.العقل.الباطن #كبسولةجمال
