07/06/2021
خلينا دايما فاكرين اننا ممكن نخلي الاكتئاب مصدر للقوة والابداع بدلا من التدهور واليأس واننا لما نعبر ونتكلم ونفهم مش هيبقى فيه اكتئاب ..
عايزيين في الأول نفرق بين المزاج الاكتئابي والاكتئاب عشان كتير ناس فاكرين ان عندهم اكتئاب وهو لا يتعدى أنه أحيانا يقوم من النوم مش مبسوط أد كده ويقول كلمات زي مش طايق نفسي ومش طايق حد وملوش نفس يتكلم أو مش عايز يقوم من السرير وده بيستمر ممكن ساعات أو يوم أو يومين ثلاثه وينتهي وبيكون ناتج عن أسباب كتيرة اهمها ضغوط عمل أو مذاكره كتير أو تراكم أشياء المفروض انجازها واحيانا يكون الجلوس مع أشخاص سلبيين واجواء من الخبرات السيئة او اسباب عده وده كله بيعدي وبيرجع الشخص كويس جدا وده اللي بنسميه مزاج اكتئابي مش اكتئاب وبيحصل ومفيش منه مشكله أما الاكتئاب فكما عرفه الإصدار الخامس للاضطرابات النفسية (DSM-5) يتمثل في عدة مظاهركالمزاج الحزين وفقدان المتعة في الأنشطة المعتادة، قلة النوم أو الإفراط فيه، إعاقة او تثاقل في الجهاز النفسي الحركي، فقدان الوزن أو تغيير الشهية، فقدان الطاقة، الشعور بالتفاهة أو بالذنب الشديد، صعوبة في التركيز أو التفكير أو اتخاذ القرار، تكرار التفكير في الموت أو الانتحار. وتظهر الأعراض يوميا تقريبا لمعظم اليوم ولمدة لا تقل عن أسبوعين. فالأعراض مميزة، وتصبح أكثر حدة و ترتفع من مجرد استجابة مؤقتة لتصبح خطرة.
ويمكن أن نعرف الاكتئاب باختصار وببساطة بأنه إحساس الفرد بمشاعر حزينة للدرجة التي قد تؤثر على أداء الفرد في مهامه اليومية وغالبا تكون في البداية على شكل أعراض بدنية زي همدان وجع في الجسم كله صداع مستمر وغيرها من الأعراض لا تشخص من قبل الأطباء بأي مرض عضوي ودي بنسميها أعراض نفسجسمية يعني المريض بيشتكي عن طريق جسمه .. وبنلاقي الأشخاص ممكن ياكلوا كتير أو مياكلوش خالص..يناموا كتير أو ميناموش خالص..مش عايزيين يتحركوا من مكانهم مش عايزيين حتى يغيروا هدومهم مبيهتموش بالنظافة الشخصية وتستمر لأكثر من اسبوعيين متتاليين .. أتمنى أن أكون استطعت توصيل صورة بسيطة عن تعريف الاكتئاب والفرق بينه وبين المزاج الإكتئابي ...
#علاج #طب #الأكتئاب
