Dr Mohammad Ahmad Abd-errazik - دكتور محمد أحمد عبد الرازق

27/08/2026

فاكرين لما قلنا إن فيه أمراض جراحية مش بالضرورة تتعالج بعملية؟

الفتق واحد منها، في بعض الحالات طبعا.

مثلا فتق إربي صغير ومن غير أعراض، ينفع نتابعه بأمان — و ده استناداً على دراسات مقارِنة عالمية.

وفيه فتق تأجيله خطر مش لأنه بيوجع أكتر، لكن لأن اللي جوّاه ممكن يتخنق.

والفرق بين الاتنين مش في حجم البروز، ولا في قد إيه بيضايقك. الفرق في نوعه ومكانه و محتواه — وده اللي بيتحدد مع الكشف.

علامة واحدة عايزك تحفظها: لو البروز ما رجعش مكانه، ومعاه ألم شديد أو قيء أو لون الجلد فوقه اتغيّر — ده معناه نتوجه للطوارئ فورا دون أنتظار، لان الوقت هنا بيتحسب بالدقيقة.

20/08/2026

قلنا قبل كده إن مش كل عقدة في الغدة الدرقية محتاجة عملية.

بس لما نقرر ندخل — نجاح العملية مش بيتقاس بشكل الجرح.

بيتقاس بصوتك وإنت بتتكلم بعد شهر، وبكالسيوم مظبوط، وبرجوعك لحياتك بأقل أثر ممكن.

والحاجات دي مش بتتحدد في غرفة العمليات بس. كمان بيتحدد في الأيام اللي بعدها.
فيه حاجتين ما تستناش عليهم ولا تتصل وتنتظر رد: تورم سريع في الرقبة، أو ضيق في النفس. دول تروح طوارئ حالاً!

وفيه علامة تالتة تستاهل نفس الجدية: تنميل حوالين الفم أو في الأطراف. دي أول إنذار إن الكالسيوم نازل، ولو اتأجلت ممكن توصل لتشنجات. كلّمني في يومها.

والباقي — زي بحة أو تغيّر في الصوت أو شرقة بسيطة مع السوائل— أغلبه بيتحسّن لوحده مع الوقت، بس لازم يتقيم فى زيارات المتابعة.

الجراحة قرار. والتعافي شراكة.

شوف الفيديو ده كمان فيه تفاصيل أكثر:
https://youtu.be/nnnRtD91o20?si=gnxJ6MOcMeW6OU4L

13/08/2026

أنا #جراح. علشان كده عارف و متأكد إن الجراحة مش هى الحل لأمراض كتير
— و منها أمراض جراحية!

فما تستغربش لو قلتلك بلاش عملية و نمشى على علاج أو حولتك لأحد الزملاء فى تخصص آخر.

صحيح «السيف أصدق أنباءً من الكتب» زي ما بيقول أبو تمام، بس لا كل مشكلة معركة، ولا كل معركة محتاجة سيف.

في أحيان كتير بنصح مرضايا بتعديل في نمط الحياة: الأكل، الوزن، الرياضة، والنوم.
وكل دي حاجات ممكن تحلّ المشكلة من غير عملية، أو على الأقل تسهّل الجراحة لو احتجناها.

وكده كده السيف - أو المشرط - موجود، وله وقته.

06/08/2026

https://www.facebook.com/share/v/194XHKKfiD/

16/02/2026

بمناسبة الأجواء الثقافية في هذه الصورة، سأتقمص دور الأديب وأحكيلكم قصتها بصورة أدبية📝 مقالية.

"خاطبوا الناس على قدر عقولهم." 💬
أؤمن جدًا بهذه المقولة، وأعمل بها كثيرًا. وعلى عكس الكثيرين، لا أفسرها التفسير السطحي بأن أتباسط في الكلام مع من لم ينل حظًّا من العلم أو الذكاء...بالعكس، أرى أنها قد تكون أكثر أهمية مع من أوتي الحكمة أو العلم، وأيضًا مع من هو مختلف في ثقافته أو مرجعيته.

كثيرًا ما ضبطني زملائي وأنا أتحدث مع مرضاي عن أنواع الطعام المناسبة للشخصية النارية 🔥 حسب التقاليد الصينية، أو عن الـ blue chips للبورصة المصرية 📈، أو حتى عن مصاعب الحياة في غواصة حربية في أعماق البحر لمدة أسابيع ⚓.
حتى و إن لم أكن على دراية بكل تفاصيل هذه العوالم، يكفيني ويكفي مريضي أني أهتم بعالمه وأخاطبه على قدر عقله.

ومفتاح أبواب🔑 كل هذه العوالم غالبًا ما يكون:
"حضرتك بتشتغل إيه؟"
وبطبيعة الحال قد أحتاج مفاتيح (أسئلة) أخرى، على حسب كل واحد قافل بابه بكام ترباس! 🔒🔒🔓

وعندما سألتها: "حضرتك بتشتغلي إيه؟"
فاجأتني بالرد: "معالجة نفسية وكاتبة وأشياء أخرى." 😲
قلت: "طيب، ألفتي إيه؟ عشان أدور على كتبك."
قالت: "أربع محاولات للحياة، الأخرى، قهوة صباحية مع النفس..." 📚
بدأت أبحث 🔍 عن هذه الكتب في برنامج الكتب المسموعة الذي أستخدمه. أبحث لكي أعرف: هل هي فعلاً كاتبة مشهورة، أم مثل الكثيرين اللي بيطلعوا طلعة "إنت مش عارفني.. أنا فلان الفلاني"، وفي النهاية يكونوا كغثاء السيل؟

ولكني وجدتها ووجدت كتبها، وعرفت من هي.

وكعادتي مع كل مرضاي.. أتحدث معهم عن عالمهم.
وكعادتي مع بعض مرضاي.. أشاركهم عالمهم.

د نشوى صلاح - Nashwa Salah

أشكرك على كتبك.. وعلى إهداءاتك الرقيقة داخل كل كتاب 🙏.
أشكرك أننا تحدثنا عن عالمك.. وأنني شاركتك فيه 💫.

09/08/2025

رغم اني جراح مش دكتور تغذية...بس بقالي فترة بانصح بعض عيانيني بثلاث حاجات....
انهم يغيروا طريقة اكلهم كالتالي:

زيرو دقيق ابيض....يعني مفيش عيش و لا مكرونة و لا مخبوزات.

زيرو سكر ابيض......علي المشروبات او في الاكل.

زيرو سوائل مسكرة.....حتي لو مشروبات محلاه بسكر رجيم او حتي عصير طبيعي بدون إضافة سكر.

كل نصيحة من دول ليها سببها العلمي و الأبحاث الكتيرة اللي تدعمها و الأسباب اللي تخليني انصح العيان أنه يعملها.

وطبعا كل شخص علي حسب حالته و علي قد ما يقدر ينفذ.

الفديو ده بيتكلم علي موضوع الدقيق الأبيض.

تدور الحلقة حول الخبز، باعتباره أحد أقدم الأطعمة التي صنعها الإنسان، وكيف ساهمت تلك الوجبة في صناعة الحضارات القديمة وتطور المسيرة الانسانية ولكنها في العصر ...

24/05/2025

؟

ملاحقة التطورات في مجال شغلنا بقى صعب جداً... صحيح الإنترنت خلى التواصل أسهل، بس سرعة التطور بقت رهيبة وكل يوم العلم بيزيد وبيكبر 📚🚀
السفر ✈️ بيخلي الواحد يواكب التطورات دي لأنه بيوفرلك الاحتكاك المباشر مع العقول العبقرية اللي بتخترع المستقبل، وزيارة المراكز العالمية دي بتحول طريقة تفكيرك بالكامل!

النهاردة هاحكيلكم عن واحدة من الرحلات المهمة في حياتي المهنية - رحلتي لبوسطن 🇺🇸 بالولايات المنحدة الأمريكية🇺🇸 عام ٢٠١٨ لحضور مؤتمر جمعية الجراحين الأمريكية واللي كانت فيها لحظة مهمة بالنسبالي... حفل تنصيبي كعضو في جمعية الجراحين الأمريكية! 🎓

بوسطن 🇺🇸 - مدينة العلم والعلماء 🏛️
بوسطن هي عاصمة ولاية "ماساتشوستس" (Massachusetts) أكبر الولايات من حيث عدد السكان. مدينة جامعاتها العريقة (زي هارفارد و MIT) ومستشفياتها المتطورة زي مستشفي "ماساشوستس" خلت منها "عاصمة الطب بالولايات المتحدة".

المؤتمر... 🤯
كان مليان بآخر الأبحاث والتقنيات الجراحية ( و هنتكلم عن مؤتمرات جمعية الجراحين فى بوست قادم)، بس اللي ممكن أقوله إنه بيغير طريقة تفكيرك بالكامل في التعامل مع الحالات.

حفل التنصيب 🎉
كان حفل مهيب في قاعة ضخمة مليانة أسماء لامعة في عالم الجراحة!
و جمعية الجراحين الأمريكية واحده من أهم جمعات الجراحين على مستوى العالم و الإنضمام ليها من أهداف الجراحين المتميزين من مختلف بلدان العالم.
قابلت فى حفل التنصيب جراحين من معظم أنحاء العالم و مختلف المراحل العمرية و استغربت لما لقيت منهم جراحين كبار فى السن لسه بيحاولوا يحققوا خطوة جديدة، و فهمت ساعتها إن التميز في الطب مش مجرد شهادة أو مهارة اكتسبتها و خلاص... دي رحلة عمر بنسعى فيها دايما للأفضل، و السعى نفسه يعتبر هدف مش بس وسيلة.


الصور من حفل تنصيب كلية الجراحين الأمريكية، بوسطن 2018

بخصوص صورة الـ AI 🤖🤓:
جربت برنامج جديد يحسن الصور... طلعت مضحكة شوية 😅
قولولي رأيكم: الصورة العادية ولا المعدلة أحلى؟
و مرضيتش ألعب فى الصورة اللي فيها العلم 🇪🇬
(هاحط لينك البرنامج في أول كومنت)

01/04/2025

؟
ملاحقة التطورات في مجال شغلنا بقى صعب جدا...صحيح الإنترنت خلي التواصل أسهل بس سرعة التطور بقت رهيبة و كل يوم العلم بيزيد و بيكبر
✈️السفر بيخلي الواحد يعرف يواكب التطورات دي لأنه بيوفرلك الاحتكاك المباشر مع الخبرات العالمية اللي ابتكرت التطور ده و كمان زيارة الجامعات المرموقة علي مستوى العالم بيغير في طريقة التفكير و بيخليك تتبني طرق تشخيص و علاج جديدة.
كل مرة في مجموعة البوستات دي هنتكلم عن مكان زرته و اتعلمت فيه.

زيارة "محافظة ناجانو" في كوكب اليابان 🇯🇵 كانت تجربة مختلفة جدا...
ناجانو معروفة بطبيعتها الخلابة والجبال اللي بتغطي معظم المنطقة 🏔️، وكمان اشتهرت باستضافتها لدورة الألعاب الأولمبية الشتوية سنة 1998. بس اللي مش كتير يعرفوه إن ناجانو فيها، زي معظم اليابان، نظام رعاية صحية متقدم جدًا، حتى في المناطق الريفية و الوعرة علي الجبال!

بدأت الزيارة لمدينة "ساكو" المعروفة بمناظرها الطبيعية الخلابة ثم زرنا بعض المدن الأخري و القرى الصغيرة في ناجانو، اللي بالرغم من إنها مناطق ريفية، لكنها بتقدم خدمات طبية متكاملة. النظام الصحي هناك مبني على فكرة إن كل فرد في المجتمع يستحق رعاية صحية ممتازة، بغض النظر عن مكان سكنه.
خلال الزيارة أتعرفت علي بعض العادات اليابانية المنتشرة، منها استخدام الحمامات العامة و الينابيع الدافئة بصورة منتظمة....خلوني أحكيلكم بالتفصيل.....

الينابيع الدافئة (أونسن - 温泉) ⛲
الأونسن بيكون فيها مياه طبيعية مصدرها الينابيع الساخنة من باطن الأرض. المياه دي غنية بالمعادن المفيدة الجسم. غالبًا بتكون في أماكن طبيعية خلابة، زي الجبال أو الغابات. و هي واحدة من أجمل الحاجات اللي ممكن تشوفها و خصوصا لو وقت وجود الثلج.
اليابانيين بيحبوا يزوروا الأونسن بشكل منتظم. الينابيع الدافئة مش بس مكان للاسترخاء، لكنها كمان بتعتبر جزء من العلاج الطبيعي، بسبب طبيعة المياه.

السنتو (銭湯)
بتكون حمامات عامة بتستخدم مياه عادية متسخنة. منتشرة أكتر في المدن، وبتعتبر مكان للاستحمام والراحة اليومية. أسعارها بتكون أرخص من الأونسن، وبتعتبر جزء من الحياة اليومية لليابانيين. غالبًا بتكون مزينة برسومات جدارية تقليدية بتعكس الثقافة اليابانية.

الأونسن و السنتو جزء أصيل من ثقافة اليابانية.

زيارتي لساكو و ناجانو خلتني أتعرف على مفاهيم مختلفة فى الطب و طرق جديدة للتعامل مع التحديات الصحية، و شجعتني إني أحاول أطبق الأفكار دي في ممارستي المهنية هنا.

انتظروا المزيد من الرحلات ✈️🌏
#

الصور من زيارتي لبعض المنشآت الصحية بمدينة ساكو و بعض المدن المجاورة– ناجانو، اليابان 🇯🇵

30/03/2025