22/07/2026
🤔مش لازم يكون عندك أعراض علشان يبقى فيه سكر حمل!
ممكن استعداد وراثي وهرمونات المشيمة بتعلي السكر في الدم.
⭕️بنطلب منحني سكري عند ٢٤ ل ٢٨ أسبوع حمل لو في عامل خطر واحد أو أكتر زي:
🔸 عرق عالي الخطورة (عربي ، جنوب آسيوي، أفريقي، إلخ)
🔸 سكر حمل في حمل سابق (هنا بنطلبه عند ١٦ أسبوع ولو طلع كويس بنطلبه تاني عند ٢٤ ل ٢٨ اسبوع )
🔸 طفل سابق فوق ٤.٥ كجم
🔸 تاريخ عائلي للسكر من الدرجة الأولى
🔸 سمنة (BMI ≥ 30) 🔸 حمل بتوأم
✅️ نعمل التحليل ده إزاي؟
1. تيجي صايمة من ٨ لـ١٠ ساعات.
2. ناخد عينة دم أولى (صايم).
3. تشربي محلول فيه ٧٥ جم سكر
4. بعد ساعتين بالضبط، ناخد عينة تانية (فاطر).
ودي أقصر طريقة للتحليل - فيه طرق اخري أكثر تعقيدا بس بتعرف تشخص حالات اكتر كلما استخدمت التحليل الاكثر تعقيدا.
⭕️الكلية الملكية البريطانية (RCOG) و NICE بيعتمدوا القيم دي لتشخيص سكر الحمل:
❗️صايم ≥ 5.6 يعادل بالحساب المصري ≥ 100 mg/dL
❗️️بعد ساعتين ≥ 7.8 يعادل بالحساب المصري ≥ 140 mg/dL
🟰لو واحدة من القيم أعلى من الطبيعي، بيتشخص سكر حمل.
⭕️طيب يا دكتورة ما انا عملت سكر عشوائي وكان كويس ايه لازمة التعقيد دا⁉️
🔸 تحليل السكر العشوائي (Random glucose):
❌ بيشخص فقط ٢٥- ٣٠ % من الحالات
❌ وبيفوت أكتر من ٧٠٪ من حالات سكر الحمل
✍️ مش معتمد في التوصيات البريطانية (RCOG)
🔸 تحليل السكر التراكمي (HbA1c):
❌هو كمان مش دقيق في الحمل
❌ بيطلع طبيعي في حالات كتير من سكر الحمل
❌ بيتأثر بالأنيميا وممكن يضلل النتيجة
بيشخص حوالي ٢٥–٤٠٪ فقط من الحالات
🔸 التحليل الذهبي المعتمد: منحنى السكر (OGTT – Oral Glucose Tolerance Test 75g):
✅ هو الأساس لتشخيص سكر الحمل
✅ معتمد من RCOG و NICE و WHO
لكن... ⁉️هو التحليل الذهبي بيشخص كل الحالات⁉️
الإجابة ؛ للأسف مش دايمًا!
✅️هو بيشخص حوالي ٧٨–٨٠٪ من الحالات، لكن لما نستخدم طرق أدق أو نكرر التحليل في الوقت المناسب، النسبة ممكن توصل لـ٩٥٪.
⭕️طيب طلع فيه سكر حمل؟ نعمل إيه؟
✳️ نبدأ بنظام غذائي وسكر منزلي
✳️ ممكن نحتاج أدوية: ميتفورمين أو إنسولين
✳️ نتابع الجنين بالسونار والمية
✳️ نخطط للولادة في الوقت المناسب لتفادي المضاعفات
✅️الخبر الكويس؟
سكر الحمل بيختفي بعد الولادة في أغلب الحالات،
لكن لازم نعمل تحليل OGTT بعد ٦ أسابيع من الولادة،
عشان نتابع لو في استعداد لحدوث سكر من النوع التاني ...
✍️ وأخيرًا:
تحليل بسيط زي ده بيجنبنا مشاكل كبيرة زي:
⚠️ وزن زايد للجنين
⚠️ ولادة قيصرية
⚠️ نقص سكر البيبي بعد الولادة- وخلل في التمثيل الغذائي
⚠️ ارتفاع ضغط الحمل أو تسمم الحمل مصاحب للسكر.
😠كتير من الأمهات بيغضبوا مني ويسيبوا متابعة الحمل لاني بطلب منحني سكري وبيرجعوا لي تاني أخر الحمل عشان الولادة بعد ما يكون وقت التدخل راح وكتير من الأمهات بيغضبوا مني غضب شديد جدا جدا لو شخصتهم سكر حمل وبعتهم لطبيبة الغدد لضبط السكر 😠
وفيه قصص كتير هابقي احكيها مع المنحني السكري ورود افعال الأمهات عشان كده قررت اكتب عنه.
❤️أرجو اني أكون ساهمت في توصيل الفكرة والمعلومة الطبية علي اكمل وابسط وجه وارجو الا اكون قد أثقلت عليكم .
