22/08/2026
استشارة
أم فاضله كبيرة سنا تواصلت معي وكانت حزينه جدا
أنا: خير ايه مشكلتك؟
الأم: ابني مريض، والعلاج مكلف، وأنا عندي أرض وعايزة أبيعها وأعالجه.
أنا: الأرض دي ملكك إنتِ؟
الأم: أيوه، بتاعتي
أنا: وعندك كام ابن؟
الأم: عندي أربعة أولاد، ولدين وبنتين.
أنا: وكلهم موافقين على البيع؟
الأم: لا… بنتي موافقة، لكن ابني وبنتي التانيين رافضين.
أنا: ورافضين ليه؟
الأم: بيقولولي: “إنتِ بتبيعي الأرض ليه؟ دي في الآخر حقنا وإحنا هنورثها.”اديله نصيبه بس
أنا: يعني اعتراضهم مش على علاج أخوهم؟
الأم: لأ، هما عايزينه يتعالج، بس بيقولوا: “خلي مراته تساعده، أبوها مقتدر.”
أنا: ومراته؟
الأم: أبوها مقتدر فعلًا، لكنه عايش، وهي طبعًا مالهاش ميراث عنده دلوقتي.
أنا: وإنتِ قلتي لأولادك إيه؟
الأم: قلت لهم: “دي أرضي وأنا حرة فيها، وأنا مش هبيعها عشان أدي فلوس لحد غريب… ده ابني!”
أنا: وابنك اللي رافض قالك إيه؟
الأم: قال لي: “هو ابنك، وإحنا ولادك برضه. ليه تاخدي الحاجة اللي المفروض تورث لنا وتديهاله؟”
أنا: والكلمة دي وجعتك؟
الأم: جدًا… حسيت إنه بيحسب نصيبه قبل ما أكون حتى مت!
أنا: وإنتِ شايفة إن من حقك تبيعي الأرض كلها؟
الأم: طبعًا. أنا تعبت فيها، ودي فلوسي وأرضي، وابني محتاجني.
أنا: طب لو بعتيها كلها، وبكرة احتجتي إنتِ لأي حاجة؟
الأم: ربنا يدبرها.
أنا: ولو ابنك اللي رافض قالك: “أنا مش واقف ضد علاج أخويا، أنا بس مش عايز حقي يضيع”… هتقدري تفهمي وجهة نظره؟
الأم: أفهمه، بس وقت المرض مفيش أغلى من ابني.
كنت فاكره انهم هيقفوا جنبي وجنب اخوهم
وهما هددوني لو عملت اللي في دمغاي هيقاطعوني
انا::طيب إنت عايزه إيه؟
الام:أتصرف ازاي مع أولادي مش عايزه اخسرهم وفي نفس الوقت مش عايزه اسيب اخوهم المريض لوحده
وهنا بقى السؤال الصعب…
هل الابن اللي بيطالب بنصيبه وهو لسه في حياة أمه بيحافظ على حقه؟ ولا الأم من حقها تستخدم ملكها بالطريقة اللي تشوفها لإنقاذ ابنها ؟وتعمل إيه عشان متخسرش حد من أولادها؟
شارك برأيك في تعليق… رأيك بينور الطريق
#استشارات # اسريه- تربويه # اميمه الشيخ # بيع #ميراث
