11/09/2026
موضوع للنقاااااش🙏في انتظار آراء حضراتكم👌🏻
⚡️⚡️التنمرقاتل"
أحط نفسك بالإيجابيين🙏💚
على مدار سنين شغلي قابلت مرضى سمنة كتير، وبرغم اختلافهم في ظروف حياتهم، وظروفهم الصحية والنفسية، وحاجات تانية كتير إلا إن كان دايماً في بينهم حاجة مشتركة.
عندهم حتة نفسية كدة، داخلية دفينة شبيهة بلمحة حزن مدارية🥹، شخصيتهم الحقيقية اللي كلها انطلاق وحيوية، لدرجة إن ناس كتير منهم مجرد ما نتكلم شوية وندردش تلاقيها بتعيط بحرقة، وعلى فكرة في منهم للأسف أطفال🥹
عارفين ده ليه؟؟🤔
بسبب مجتمعنا الجميل اللي مبيسيبش حد في حاله، مجرد ما بنلاقي أي فرصة نقسى على بعض بنعمل كده فورًا.😰
على فكرة مش خفة دم أبدًا إنك تتنمر على حد لمجرد إنك شايف إنه مختلف عنك، وقررت كده فجأة إنك تتهكم عليه وتوصمه.😵💫
⚡️⚡️وعلموا أولادكم يا جماعة إن ده غلط وعيب وحرام وميصحش، ياما ناس اتدمرت نفسيا بسبب كلمة حضرتك قولتها ونسيتها، بس فضلت معلمه جواه لسنين وسنين وأفقدته ثقته بنفسه تمامًا.
أطفال كتير جدًا مبقتش عايزة تخرج من بيتها، ولا حتى تروح مدرستها، وانعزلت تمامًا بسبب تنمر زمايلهم والا مدرسينهم عليهم.
⚡️⚡️ملحوظة مهمة👌🏻حضرتك ممكن تقول كلمة سخيفة تجرح بيها حد من باب الاستظراف وفعلاً تنساها بس افتكر كويس ان ربنا مبينساااااش 🙏اطمن هتلاقيها مستنياك في ميزان سيئاتك في يوم هتبقى في أمس الحاجة لحسنة تنجيك بس هتلاقي جبال سيئات هتتفاجئ بيها من حيث لا تدري ولا تحتسب، ما انت رميت الكلمة ونسيتها بقى
بجد مسكين ، فعلاً موقف صعب 😰
بس فعلاً كما قال الله في كتابه الحكيم ( يؤت الحكمة من يشاء ومن يؤت الحكمة فقد أوتي خيراً كثيراً)
فعلاً الحكمة نعمة غير معطاة غير لعباد الله المختارين ،،أكيد المتنمرين ومعدومي الأخلاق مش منهم 👌🏻
"الرحمة ببعض ياجماعة"
الرحماء يرحمهم الله 💚
وعلى فكرة لو كل واحد شغل نفسه بحاله وركز مع نفسه، والله هنبقى في مقدمة الأمم.
قاعدين بنشتكي اننا بنتخلف ونسينا حاجة مهمة أخلاقنا اللي فرطنا فيها لحد ما ضاعت تماماً
( إنما الأمم الأخلاق مابقيت ، إن هم ذهبت أخلاقهم ذهبوا )
افتكر دايمًا قبل ما تخرج الكلمة من بؤقك "فليقل خيرًا أو ليصمت"،
لو مش هتعرف تقول كلمة حلوة اسكت من فضلك،
والكارثة إن أوقات التنمر بييجي من الناس اللي معاك في بيت واحد سواء زوج أو زوجة، أو أم ،أب، أو حتى إبن.
والمبرر بيكون "ده أنا بحاول أحفزها أو أحفزه".
كتر النقد عمره ماكان بيبني بني آدم أو يحفزه، بالعكس ده بيحبطه، لما حضرتك تفضل تقول لزوجتك أو حتى بنتك، والا حضرتك تفضلي تقولي لجوزك أو ابنك: خس خس، أو كفايه أكل. مش هيحفزه بالعكس،
ده هيحبطه وهيحسسه دايمًا بالذنب، ويفقده ثقته في نفسه؛ لإنه هيبقى شايف نفسه مش قادر يوصل للصورة اللي حضرتك رسمتهاله علشان يكون كويس ومقبول، فبالتالي هيبقى حاسس دايمًا بالنقص وإنه مش كويس ولا مقبول.
ومهما حقق في حياته أو نجح، هيبقى دايمًا حاسس إن في حاجة ناقصة.
لو مش قادر تقدم المساعدة، على الأقل متجرحش الشخص بكلام إنت مش عارف أثره إيه عليه.
وعلى فكرة كل إنسان عنده مشكلة عارفها وشايفها كويس هو مش أعمى عنده مرايه بيبص فيها مش منتظر حضرتك توريهاله
والنصيحة لو مطلبهاش من حضرتك يبقى من الوقاحة وقلة الذوق انك تفرضها عليه بالعافية🙏والا إيه🤔
كلنا مليانين عيوب ركز على نفسك وعلى إصلاح عيوبك بدل ما توزع سلبيتك على غيرك بدون وجه حق 👌🏻
⚡️⚡️السمنة مرض محتاج مساندة نفسية واحتواء، ومحتاج حضرتك تفهم أسبابه الحقيقية.
ممكن يكون ابتلاء من ربنا سبحانه وتعالى، والشخص ده بيحاول كتير جدًا ومتعذب، ولسه مش عارف يلاقي الطريق الصح علشان يحقق هدفه😰
أرجوك لو مش قادر تقدم الدعم المناسب، بلاش على الأقل تسيب أثر سيء في نفسية حد يفضل معاه عمره كله🥹
إحنا محتاجين ننشر ثقافة التعامل مع مرضى السمنة، أو مع أي إنسان بيعاني من أي مشكلة؛ لإن أي كلمة بنقولها حتى ولو بهزار، وحتى لو اللي قدامنا استقبلها، وحاول يظهر إنه مش متضايق وأخدها بضحك وهزار، صدقني بتسيب تأثير سلبي، وقلة ثقة بالنفس، وممكن توصل لأمراض نفسية وجسدية،
السمنة مرض زيه زي أي مرض، ممكن يحصل نتيجة سبب وراثي أو عضوي أو نفسي، وأوقات كل الأسباب دي مع بعض، يعني سواء مش بيقدر يسيطرعلى كميات أكله؛ بسبب الضغط العصبي اللي عايش فيه والتوتر وقلة الدعم، فبيلاقي سعادته الوحيدة في الأكل، وده نتيجة إن في أكلات معينة بتؤدي إلى ارتفاع هرمونات السعادة زي "السيروتونين"
⚡️⚡️أو لإن عنده مشكلة صحية زي خمول الغدة الدرقية، أو عنده مرض نفسي بيسبب اضطرابات في تناول الطعام
يعني في النهاية ممكن جدًا يكون الذنب مش ذنبه، ولا هو اللي بيحب الأكل ومش عايز يتغير زي ما حضرتك قررت وحكمت عليه.
"ارحموا، ترحموا"
ده في ناس وصلت انها تنهي حياتها علشان تهرب لإنها مش قادرة تواجه ولا تتعامل مع ناس سليطة اللسان فرجاءًا بلاش تكون انت الشخص ده اللي ممكن بكلمة غير محسوبة ولا ليها أي أهمية أصلاً ولا هتقدم وهتأخر ولا هتعمل حاجة غير إنها هتؤذي وتجرح وممكن تكون سبب في نهاية حياة إنسان 😰
عارف لو انت إيجابي وكلمتك دي هتقدم أي حل !!!! انما فعلاً ملهاش أي لازمة غير بس الأذى😰
اسأل نفسك قبل ما تقول أي كلمة ، فكر الأول هل ليها فايدة فعلاً ؟!!
لإن الكلمة السيئة زي الرصاصة لو خرجت مبترجعش😱
ودلوقتي هشارك مع حضراتكم قصة حصلت مع صديقة عمري، وهكتبهالكم بروايتها هي، وبدون أي تصرف؛
علشان تعرفوا أد إيه التنمر ممكن يؤذي بني آدم ويأثر في نفسيته ويجرحه،
"أنا الحمد لله كشكل مقبولة، وناس بتقول إني جميلة، بس أنا كنت فقدت الثقة في نفسي تمامًا😣
بسبب طليقى،☹️
هو كان دايمًا يهد فيا،
زدت طبعًا بعد الحمل والولادة، بقينا كل ما نمشي في مكان يقول لي يلا يا بطيئة،
أفتح التكييف يقول لي الجو حلو إنتِ بس عشان دهونك وشحومك حرانة،
مع العلم طولي ١٦٠ ووزني كان ٧٠ ك.
جالي حالة نفسية، بقيت لما آكل أدخل أحط إيدي في بوقي وأرجع،
وأفضل أعيط وأقول هتخن وهيتنمر عليا، حتى قدام أهله وأهلي يقول لي يا كرومبو😡
آجى أقوم مثلًا يقول لي: ها نجيب ونش يشد؟
لغاية ما في يوم أخدت قرار:
"أنا هخس عشان صحتى"💪🏻
جالي قولون، وجالي تعب فى ضهري😰
والأهم من كدة اتحاوطت بناس بتحبني عشان شخصيتي،
عشان طباعي،
ناس ادتني ثقة في نفسي🙏
بعد ما كنت مش بحب أتصور،
مش بحب أعدى أدام المراية،
مش ببص غير في مراية الحمام عشان مش بتجيب إلا وشي
لا، أنا كنت محتاجة أحب نفسي
أثق في نفسي👌🏻
بعدها بقيت أحافظ على أد ما أقدر لإني حبيتني، بعد ما هو كان مكرهني في نفسي☹️
مش هنسى فضل أميرة عليا، أميرة من يوم ما عرفتها هي سندي من ٣٣ سنة♥️
أنا بفتكر أول مرة شفتها كان عندي ٤ سنين، واحنا في الحضانة
بعيط عايزة مامتي🥹
خدتني من إيدي وودتني الألعاب وطمنتني،
ومن يومها وهى بتاخد إيدي وتطمنني لما أقع وأعيط"
⚡️⚡️إيمان
"شكرًا إيمان على كلامك الجميل اللي أثر فيا جدًا ولمسني، وبرغم إنك عرفتي الناس كلها عمرنا! بس برضو بحبك وفعلًا إنتِ جميلة جدًا من جوا أكتر كمان من برا.
ادعموا الناس اللي حواليكم وطمنوهم، في يوم هتحتاج اللي يقف جنبك ويساعدك ويدعمك.
ولو مش قادر تدعم ياريت متهدش🙏
حبوا نفسكم لنفسكم مش لحد، واللي بيحبك هيحبك زي ما إنت في كل حالاتك♥️
ولو عندك مشكلة هيساعدك ويقف جنبك لحد ما تخرج منها بأمان، وهو ماسك في إيدك مش بيسيبك مهما حصل، لحد ما تعدوا كل حاجة مع بعض،🙏
ابعد عن اللي بيحبطوك واهرب منهم، وأحط نفسك بالإيجابيين💚❤️♥️
في النهاية 🙏
رسالة لكل متنمر حاول تتعالج ، واجه مشاكلك وعالجها لإن معظم المتنمرين بيكونوا اتعرضوا للتعنيف أو مازالوا بيتعرضوا لحد دلوقتي فبيعملوا اسقاط على غيرهم وبيحاولوا يسقطوا احساسهم بالفشل على غيرهم وخاصة لو حسوا انه ممكن يكون أفضل منهم 🙏
والغريب ان معظمهم يوعظك ويكلمك عن الأدب والأخلاق 🤔
أنا نفسي تعرضت للوقاحة والتنمر من بعض مرضى القلوب سواء في ڤيديوهاتي أو لايڤاتي اللي بحاول أفيد فيها الناس وبلا أي تمن 😬الحقيقة حاجة في منتهى العجب وبحس بالشفقة على الناس دي لإني مش بشوفهم غير مرضى قلوب وأعداء أنفسهم لإنهم ماشيين يجمعوا سيئات جارية هيدفعوا تمنها أكيد في الدنيا وهتستناهم في ميزان سيئاتهم في الآخرة لإن ده من باب ظلم العباد ، يعني حتى لو تبت في حق للبشر اللي انت آذيتهم دول وأكيد نسيتهم ما انت ماشي تخبّط ولا همك 😵💫
⚡️⚡️أحب أقولهم الأخلاق مش مجرد كلام جميل بنقوله في المناسبات، الأخلاق هي اللي بتخلّي الإنسان إنسان 👌🏻ولما الواحد يفقد أخلاقه، بيتحول لكائن مؤذي، وأحقر صورة للأخلاق المفقودة هي التنمّر.
التنمّر مش هزار، ومش “هزار تقيل”، ومش “أنا بكده بطبعي”التنمّر ظلم، والظلم ظلمات يوم القيامة. النبي ﷺ قال بصريح العبارة:
«اتقوا الظلم، فإن الظلم ظلمات يوم القيامة».
والمتنمّر ده مش قوي زي ما هو فاكر، ده ضعيف جواه، بيحس إنه مش كفاية، فبيروح يطلع ضعفه على حد تاني. بيقلل منه، بيهينه، بيكسره بالكلام أو بالفعل، وبعدين يضحك كأنه عمل حاجة عظيمة. وهو في الحقيقة مذموم ،ومذموم عند ربنا وعند الناس اللي عندها ضمير.
النبي ﷺ قال:
«المسلم من سلم المسلمون من لسانه ويده».
يعني لو لسانك أو إيدك بتوجع الناس، يبقى في حاجة غلط في إسلامك وإيمانك.
⚡️⚡️وقال كمان:
«لا يؤمن أحدكم حتى يحب لأخيه ما يحب لنفسه».
طيب، هل أنت تحب حد يتنمّر عليك؟ يبقى ليه بتعمله في غيرك؟🤔
أثر التنمّر وحش جدًا. بيخلّي الإنسان يكره نفسه، يخاف يتكلم، ينطوي، وأحيانًا يوصل لدرجة إنه يكره الحياة كلها. في ناس اتكسرت نفسيًا بسبب جملة واحدة اتقالَت لها وهي صغيرة، وجملة تانية وهي كبيرة. وفي ناس لسه لحد النهارده مش قادرين ينسوا الإهانة اللي اتهانوا بيها من سنين.
وده مش هيفلت. في الدنيا ممكن ربنا يفضحه، أو يحرمه من راحة البال، أو يخلّي الناس تكرهه من غير ما ياخد باله.
وفي الآخرة الحساب أثقل. المظلمة دي هتترفع يوم القيامة، وهيتحاسب على كل كلمة وكل نظرة وكل ضحكة كان بيستهزئ بيها بحد👌🏻
ورسالتي لكل حد بيتم التنمر عليه👌🏻
⚡️⚡️متسمحش بده وحتى لو كان اللي بيتنمر عليك ناس في محيطك ، (أحط نفسك بالإيجابيين)
أمشى من المكان اللي تحس إنه مش مكانك
افتكر ( انت مش شجرة😉)
وأحب أطمنكم بقول للإمام الشافعي وياريت نعلمه لأولادنا👌🏻
يخاطبني السفيه بكل قبح
فأكره أن أكون له مجيبًا
يزيد حماقةً فأزيد حلمًا
كعود زاده الإحراق طيبًا
يعني السفيه كل ما يزيد سفاهة، العاقل بيزيد حلم. لإن الرد على السفيه بالسفاهة بيزوده، إنما الحلم بيحرجه وبيبيّن حجمه الحقيقي.
المتنمّر مذموم في الدنيا والآخرة، ومش هيلاقي حد يقف جنبه يوم الحساب، لأن الظالم مالوش حبايب هناك
⚡️⚡️علموا أولادكم ان «كل إناء ينضح بما فيه»
يعني الإناء اللي جواه عسل هيطلع عسل، والإناء اللي جواه خل هيطلع خل. والمتنمّر مش بيعمل حاجة غير إنه بيفرغ اللي جواه.
اللي جواه احتقار، وضعف، ومرارة، وحقد دفين على نفسه قبل ما يكون على غيره.
فلو كان جواه خير وأخلاق، كان هينضح خير… لكنه ينضح أذى وإهانة واستعلاء رخيص.
👌🏻👌🏻عشان كده المتنمّر بيفضح نفسه أكتر مما بيفضح غيره. كل كلمة جارحة بيقولها، وكل سخرية بيعملها، بتكون مرآة واضحة لجواه الفاضي. مش قوة… ده انكشاف. مش تفوق… ده إفلاس أخلاقي.
وربنا بيورينا الحقيقة دي في الدنيا قبل الآخرة: الناس بتعرف مع الوقت مين الإناء النضيف ومين الإناء الغير نظيف
واللي بينضح أذى، بيلاقي نفسه لوحده في الآخر👌🏻
فـ «كل إناء ينضح بما فيه» مش مجرد مثل… دي حقيقة بتفضح المتنمّر أكتر مما بيفضح ضحيته.
⚡️⚡️⚡️دلوقتي عايزين نسمع منكم👌🏻
لو اتعرضت لتنمّر في أي مرحلة من حياتك، سواء في المدرسة أو الشغل أو حتى من قريب أو صاحب… احكي قصتك.
إيه اللي اتعمل فيك؟ وإيه الأثر اللي سابه جواك؟ وهل لسه بيأثر عليك لحد دلوقتي؟
اكتبو في التعليقات، خلونا نفتح نقاش صريح عن الموضوع ده. لأن السكوت على التنمّر بيخلّيه يكبر، والكلام عنه بيقلل منه.
ربنا يحمينا ويحمي أولادنا من كل لسان سفيه وكل نفس ضعيفة بتدور على قوتها في إذلال غيرها❤️💚
دمتم في صحة وراحة بال♥️💚
تحياتي د/أميرة فيصل
#التنمر
•
•
•
•
•
•
•
•
•
