25/10/2026
مع أم ضد نورا؟ 💁🏻♀️
أنا شخصيًا ضد الانتقام في حد ذاته، حتى لو كنت متفهمة جدًا لمشاعر الشخص اللي اتعرض للظلم أو الخذلان.
ربنا سبحانه وتعالى قال: ﴿فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ﴾.
وربنا أباح للرجل التعدد بضوابطه، وفي المقابل، الست ليها حق الاختيار؛ إما تقبل وتكمل، أو ترفض وتطلب الطلاق. لكن مفيش حاجة اسمها إننا نحول وجعنا لمعركة انتقام تستنزف عمرنا وحياتنا!
طيب، ليه أنا ضد الانتقام؟
لأن الشخص لما بيقرر ينتقم، بيبدأ يوجّه كل تركيزه ناحية الطرف التاني:
إزاي يوجعه؟ إزاي يوقعه؟ وإزاي يخليه يدفع تمن اللي عمله؟
ومع الوقت، بيلاقي نفسه عايش في دايرة مغلقة، كل تفكيره متعلق بالشخص اللي أذاه، لدرجة إنه ممكن ينسى نفسه، ويعطل حياته، ويخسر فرص كتير كان ممكن تكون سبب في سعادته وتطوره.
ببساطة، بدل ما يكون هدفه إنه يتعافى ويبدأ من جديد، بيصبح هدفه إنه ينتقم!
طيب، والسؤال الأهم: فين حقي؟!
هنا إجابتي: حسبنا الله ونعم الوكيل. 🤲
فوّض أمرك لربنا، وخد بالأسباب المشروعة لاسترداد حقك، وثق إنك مش مطالب تضيّع عمرك في محاولة الانتقام عشان تثبت إنك اتظلمت.
لو ليك حق، اسعَ إنك ترجعه بالطرق الصحيحة، وسيب الباقي لربنا. ولو اكتشفت إنك كنت فاهم الموقف غلط، أو إنك مش مظلوم بالشكل اللي كنت متخيله، فإنت على الأقل مش هتكون ضيّعت سنين من عمرك في معركة خاسرة مع نفسك قبل ما تكون مع غيرك.
أنا شخصيًا نادرًا ما شفت حد قرر يعيش بهدف الانتقام إلا وكان بيدفع من راحته النفسية، ووقته، واستقراره، وأحيانًا من مستقبله كمان.
طيب، إيه الحل لو مش قادر تسامح أو تتقبل اللي حصل؟
مش لازم تسامح عشان تمشي، ومش لازم تفضل في علاقة بتوجعك عشان تثبت إنك إنسان متسامح.
لو مش قادر تكمل، امشي.
اقفل الباب، وادّي ضهرك، وابدأ حياتك من جديد.
امشي من غير ما تفضل تراقب الطرف التاني، أو تستنى تشوف ندم؟ اتعاقب؟ خسر إيه بعدك؟
لأنك طول ما إنت بتراقبه، هتفضل مربوط بيه، حتى لو العلاقة انتهت من سنين.
التعافي الحقيقي بيبدأ لما الشخص اللي أذاك يبطل يكون محور حياتك، وتبدأ إنت ترجع لنفسك من جديد.
مش مطلوب منك تنسى اللي حصل، ولا تنكر وجعك، ولا تتنازل عن حقك، لكن المطلوب إنك متسمحش للي أذاك إنه ياخد منك أكتر من اللي أخده بالفعل.
وعلشان كده، أنا ضد نورا وطريقتها في الانتقام.
مش لأني مش حاسة بيها، بالعكس، أنا متفهمة جدًا مشاعرها، وغضبها، وإحساسها بالخذلان، ويمكن أقدر أفهم الدوافع اللي وصلتها للي هي بتعمله.
لكن تفهُّم مشاعر الشخص مش معناه إننا نوافق على كل تصرفاته.
أنا شايفة إن الانتقام مش هو النهاية اللي هتريح نورا فعلًا.
لأنها مهما حاولت توجع غيرها، هتفضل محتاجة تواجه وجعها هي، وتتعافى منه، وتقرر إذا كانت عايزة تكمل حياتها بالشكل ده ولا تبدأ من جديد.
من وجهة نظري، راحتها الحقيقية كانت في إنها تسترد زوجها وانه طلق الزوجه الثانيه
وفي النهاية، خلوني أسألكم:
إنتوا مع نورا ولا ضدها؟ وليه؟ 💁🏻♀️
وهل الانتقام ممكن فعلًا يريح الإنسان، ولا ساعات بيكون مجرد طريقة بنحاول بيها نعوّض وجعنا، فنخسر نفسنا في الطريق؟
#د #بسمه. #عبده
