Dr. Marianne maher - child clinic

29/05/2026

24/03/2026

الغدد الليمفاوية عند الأطفال… إمتى طبيعية وإمتى نقلق؟

🔬 أولًا: إيه هي الغدد الليمفاوية؟
الغدد الليمفاوية هي جزء أساسي من جهاز المناعة، موجودة في الرقبة، تحت الإبط، الفخذ، والبطن.
وظيفتها حماية الجسم من الميكروبات ومساعدة الجسم على مقاومة العدوى.

📍 الطبيعي عند الأطفال:
ممكن نحس بغدد صغيرة تحت الجلد (طرية ومتحركة - غير مؤلمة)
وده شائع جدًا لدرجة إن نسبة كبيرة من الأطفال الأصحاء عندهم غدد محسوسة 👌

🧠 ليه الغدد بتكبر عند الأطفال؟
في الغالب، السبب بسيط ومش مقلق:
- نزلات البرد والفيروسات.
- التهاب الحلق أو اللوز.
- التهابات الأسنان أو اللثة.
- التهابات الجلد.

📌 الفكرة ببساطة: الغدة بتكبر لأنها بتشتغل 💪
(بتحارب العدوى، فبتتضخم مؤقتًا)
👉 وده السبب إن أغلب الحالات بتتحسن لوحدها بدون علاج.

⚠️ امتى نقول "ده مش طبيعي"؟
هنا بقى لازم نركز، في علامات لو ظهرت لازم تقييم طبي:
- حجم الغدة أكبر من 2 سم.
- بتكبر بسرعة خلال أيام أو أسابيع.
- مستمرة أكتر من 4–6 أسابيع بدون تحسن.
- صلبة جدًا أو ثابتة (مش بتتحرك).
- بدون ألم (خصوصًا لو مزمنة).

أو تكون مصحوبة بأعراض عامة:
- فقدان وزن.
- عرق ليلي.
- حرارة طويلة.
- شحوب أو كدمات.
📌 دي علامات ممكن تشير لمشاكل أخطر.

❌ أخطاء شائعة من الأهل:
- القلق المبالغ فيه من أول يوم.
- استخدام مضادات حيوية بدون داعي.
- الضغط المتكرر على الغدة (بيزود الالتهاب).
- تجاهل الحالات الخطرة لفترة طويلة.

🟢 الخلاصة:
👉 معظم تضخم الغدد عند الأطفال طبيعي ومؤقت.
✔️ لو الغدة صغيرة، متحركة، ومصاحبة لدور برد : غالبًا أمان.
❗ لكن لو فيها علامات الخطر : لازم تقييم بدون تأخير

#د ماريان ماهر #استشاري اطفال #صحه الاطفال

04/03/2026

لو ملاحظين أن طفلكم بيحاول ياكل حاجات غريبة
زي التراب او الطين او الورق او حتى التلج
خلوا بالكم إن الموضوع ده مش دايما لعب ولا فضول اطفال
اوقات بيكون له سبب طبي وحالة معروفة اسمها (البيكا)
يعني الطفل يبقى نفسه في حاجات مش اكل اصلا
طيب ليه ده بيحصل
اكتر سبب شائع هو نقص الحديد
واحيانا نقص الزنك
وممكن يبان مع الانيميا
او عند بعض الاطفال اللي عندهم تاخر في النمو
نقلق ليه
علشان الموضوع ممكن يسبب تسمم
ويزود الانيميا بدل ما يحلها
وكمان يعمل مشاكل في المعدة والامعاء زي وجع او انسداد
الخلاصة
لو التصرف ده بيتكرر
ما نستهونش بيه ولا نقول عادي
الافضل نكشف ونعمل تحاليل
ونعالج السبب من بدري
علشان صحة الطفل دايما في الامان

‎

18/02/2026

كل عام و انتم بخير🎉 رمضان كريم ☪️

16/02/2026

🚨 أخطر ٥ علامات في صداع الأطفال ماينفعش نتجاهلها:

🤕 الصداع عند الأطفال… إمتى نقلق وإمتى نطمن؟

كتير من الأهالي بيستغربوا لما طفل يشتكي من صداع، ويفتكروا إن الصداع “مرض كبار” بس الحقيقة إن الأطفال كمان بيجيلهم صداع، وأحيانًا بشكل متكرر.

👈 أسباب الصداع الشائعة عند الأطفال:

🔹 الإرهاق وقلة النوم
🔹 الجفاف (مش بيشرب مية كفاية)
🔹 طول القعدة قدام الموبايل أو التلفزيون
🔹 نزلات البرد والجيوب الأنفية
🔹 ضعف النظر والانيميا
🔹 التوتر والضغط النفسي (آه… الأطفال بيتوتروا برضه)🎯

🗨 أشهر نوعين بنشوفهم:
• الصداع التوتري: ألم خفيف إلى متوسط، زي طوق حوالين الرأس.
• الصداع النصفي (Migraine): بيبقى أقوى، ممكن مع قيء أو حساسية من النور والصوت

🚨إمتى لازم نقلق🚨
واخطر ٥ علامات
راجع الطبيب فورًا لو الصداع:
❗ شديد ومفاجئ جدًا
❗ بيوقّع الطفل من النوم
❗ معاه قيء متكرر بدون سبب واضح
❗ معاه زغللة أو ضعف في الحركة
❗ بعد خبطة قوية في الرأس

😰 بيزيد يوم بعد يوم

نعمل إيه في البيت؟

✔️ راحة في مكان هادي
✔️ نشرب سوائل كويس
✔️ نقلل الشاشات
✔️ نتابع عدد مرات الصداع
✔️ مسكن مناسب مؤقت بجرعة مظبوطة حسب وزن الطفل (بعد استشارة الطبيب)

📌 مهم جدًا:
مش كل صداع محتاج أشعة… التقييم الإكلينيكي هو الأساس.

💙 صحة طفلك أهم حاجة
📍 عيادة د ماريان ماهر للاطفال و حديثي الولادة
📞 للحجز والاستفسار : 01287708851

‎

08/02/2026

و أنا راجعه من العيادة وقفت عند بتاع الفاكهة أشترى حاجه ،اتفاجأت بالنجم الأخضر ده 😰 بالنسبة لك عادى جدا
بالنسبة لى مش عاادى إطلاااقا لدرجه اتخضيت و عملت زى احمد حلمى فى فيلم إكس لارج أزل ما سمع اغنية وحوى يا وحوى ( إوعى يكون اللى فى بالى)

انا برضه بكلم اللى بيبيع (إوعى يكون ده موسم الفول الاخضر 😱
- ايوه يا دكتورة
* هو مش كان في شهر ٤ باين؟!!😰

- لا من دلوقتي و بيخلص فى شهر ٤، بتحبيه يا دكتورة كده اوزن لك؟!

* احب مين مش بأكله

انا بس شريط ذكريات بيجرى ادامى محتواه كله اللى كنا بنسميه فى أول فترة نيابة الاطفال (موسم الفول الأخضر)🤦
و ده للأسف موسم كده المستشفيات بتتملى بحالات رضع و اطفال صغيرين جايين بتكسير دم و انيميا شديدة جدا جدا و منهم اللى لو اتاخر مش بيتلحق😰

ايه اللى بيحصل و اشمعنى الفول الاخضر ؟!

بعض الأطفال اللى عندهم انيميا الفول و هو مرض وراثي
مش بيكون متشخص لسه فى الغالب فى الرضع أو حتى اطفال اكبر شوية
و بيكون أول نوبة تكسير تحصل

بتخاف ليه من الفول الاخضر ؟

لانه اقوى مادة بتعمل تكسير لدرجه انه له اسم لوحده Favism

تنبيه مهم للأهالي✋

مع بداية ظهور الفول الأخضر في الأسواق، حابة ألفت نظر حضراتكم لنقطة مهمة جدًا.

الفول الأخضر من أكتر الأطعمة اللي ممكن تسبب تكسير في الدم عند الأطفال اللي عندهم أنيميا الفول (نقص إنزيم G6PD)، وأحيانًا الطفل بيكون غير مُشخَّص.

⚠️ النصيحة المهمة:

يُفضّل عدم تقديم الفول الأخضر للأطفال
خصوصًا الرضع والأطفال الصغيرين✋

وخاصة لو الطفل ما جرّبش قبل كده أي أطعمة ممكن تسبب تكسير في الدم

لأن الفول الأخضر ممكن يكون أول trigger قوي ويسبب تكسير حاد.

🚨 أعراض تكسير الدم (أنيميا الفول) تشمل:

شحوب شديد أو اصفرار بالعين والجلد

بول غامق (لونه غامق زي الشاي)

تعب وخمول غير معتاد

قلة الأكل أو القيء

سرعة في التنفس أو ضربات القلب

في الأطفال الصغيرين: بكاء غير معتاد أو نعاس زائد

📌 في حالة ظهور أي من الأعراض دي بعد أكل الفول،
لازم التوجه للطبيب فورًا.

✅ الوقاية دايمًا أسهل وأأمن من العلاج

13/01/2026

👶 إزاي تحمي طفلك وقت الجو المليان تراب؟ 🌪️

✔️ خلي الطفل في البيت على قد ما تقدري واقفلي الشباك كويس
✔️ استخدمي فوطة مبلولة عند الأبواب والشبابيك لتقليل دخول التراب
✔️ لو اضطرّيتي تخرجي، يفضّل لبس كمامة مناسبة لعمر الطفل
✔️ غسلي إيدين ووش الطفل أول ما يرجع البيت
✔️ ابعدي عن تهوية البيت في أوقات العواصف الترابية
✔️ لو طفلك بيعاني من حساسية أو ربو، التزمي بالعلاج وراجعي الطبيب عند أي تعب

🚨 راجعي الطبيب فورًا لو ظهر:
• كحة شديدة
• نهجان أو صعوبة تنفس
• دموع أو احمرار شديد في العين

💙 صحة طفلك أهم حاجة
📍 عيادة د ماريان ماهر للاطفال و حديثي الولادة
📞 للحجز والاستفسار : 01287708851

‎

08/01/2026

🎉 عيد ميلاد مجيد 🎉
نتمنى لأطفالنا وعائلاتهم عامًا جديدًا مليئًا بالصحة والسعادة

04/01/2026

Find local businesses, view maps and get driving directions in Google Maps.

01/01/2026

🎊 كل عام وأنتم بخير🎉
مع بداية عام جديد، نتمنى لأطفالنا الأحباء دوام الصحة والضحكة اللي بتنور قلوبنا ❤️
سنة جديدة مليانة أمل، نمو، وسعادة لكل طفل،
وإن شاء الله نكون دايمًا عند حسن ظنكم في رعاية صحة أطفالكم🥰

03/12/2025

شكوى متكررة📩
الحقيني يا دكتور ابني شرب ازازة vidrop (فيتامين دال) اعمل ايه 🧒❓
✅الازازة دى كل الولاد بيحبوا بيشربوها عشان طعمها حلو 🤭
✅ مفيش داعى للرُعب....من ستر ربنا ان فيدروب جرعة فيتامين د فيه متوسطة مش عالية اوى
✅ بس طبعا فيدروب برده لازم يتاخد بالعقل، وبالجرعة المحددة للطفل حسب وصف الطبيب.

🎈 طيب أسعف الطفل أزاى لو اخد جرعة زايدة؟
1️⃣ وقفى الفيدروب على الاقل اسبوعين
2️⃣ لو ابنك بياخد دواء فيه كالسيوم وقفيه مؤقتا
3️⃣ حتشربى الطفل مياه و سوايل كتير جدا
4️⃣ حتقللى الاكلات اللى فيها كالسيوم عالى، زى منتجات الالبان....مؤقتا بس
5️⃣ حتتابعى اى اعراض غير معتادة على الطفل
6️⃣ حتكلمى مركز السموم، تبلغيهم بالجرعة ولو في اعراض
اللي ظهرت وهم يطمنوكي.

‎