لصحة طفلك مع د. محمود كامل

15/08/2026

15/08/2026

كل سنة وانتم طيبين 🎈
بمناسبة المولد النبوي الشريف

🔸والمولد يعني المكسرات وغيره
فعايز اقول لكل اب وام " الشرقه " في سودانايه أو حمصايه دي شيء قد يؤدي إلي كارثه تصل للوفاه 😱😱

🔸ارجوك خلي بالك من ده ومن اي حاجه تانيه ممكن يشرق الطفل فيها

🔸يعني مثلا ماما اللي بتحشر الدبوس في الكنبه أو اللي بترمي التوكه الصغيره بتاعتها والله العيل بيحطها في بقه ويشرق فيها وهو ونصيبه بقي ، شنط البنات وإدراج التسريحه دي لغم لاي طفل ممكن يحط اي حاجه في بقه .🧷🧷📍📍

🔸ده الحقيقه يعمل حاجه من الآتي 👈
▪️ اما ان العيل يموت وقتي نتيجه قفل مجري التنفس
▪️أو ان العيل يدخل في صعوبه شديده في التنفس تحتاج منظار قصبه هوائية اللي في حد ذاته ممكن يدخل العيان في ارتشاح هوائي حول الرئه والقلب وممكن يموت , فالعلاج حتي ليه مضاعفات 😱😱
▪️أو ان العيل يشرق في حته سوداني صغيره ويعاني بعدها من التهاب رئوي متكرر واللي برده ممكن يموته
▪️لو حظك حلو الواد يبلع الحاجه بدل ما تنزل في مجري الهواء ودي ممكن يكحها عادي ، أو أنها تفضل موجوده وتخرم المريء وتدخل في التهابات شديده وممكن تؤدي للوفاه

💥 ده مش افوره ولا كل العيال زي الكتاكيت بتلقط من الأرض فسيبهم وهتعدي
💥 ممنوع اللب والسوداني والحمص والفشار والمكسرات للأطفال قبل سن ٤ سنوات والله بتعمل كوارث

معا لصحة أفضل لأطفالنا

15/08/2026

أهل جايبن ابنهم المستشفي مغمي عليه وبيبكي نتيجه إنهيار عصبي فهمنا من الأم إن حصل خناقة بين الأب والإبن والابن إتعصب جامد وبدأ يتشنج لحد ما وصلنا كده
الغريب إن ملامح الأب مكانش متأثر نهائي مش فارق معاه وجاي معاهم غصب عنه ، واقف برة المستشفي كل الي فارق معاه إنه عايز الموضوع يخلص ويروحوا

شباك الاوضه بتاعتي فاتح علي قدام المستشفي فكنت شايف الموقف من أول وصولهم .. فضلت شوية متابع الأب غصب عني لحد ما جاتله مكالمة وفضل يزعق ويقول هو كل يومين يعمل نفس الموضوع ونجيبه المستشفي .. المكالمة كانت طويلة وكلها قسوة " لفت نظري جملة قالها في وسط المكالمة " أنا عايز اطلعه راجل و قسوتي عليه علشان يجمد كده ، لا مش هدخله أمه معاه جوة هبقي أراضيه بكلمتين لما يخرج ونروح "

فات ساعة وأنا كل شوية اخلص حاجه و عيني تقع تاني علي ملامح الأب اللي مش باين عليه اي حاجة غير الجحود ، لحد ما جت اللحظة اللي الامن نده فيها علي اسم وقام الراجل بأمتغاض شديد يرد وعرفت ان ده اسم ابنه
وقاله كلمتين .. البقاء لله ابنك توفي و تعالي عشان والدته مغمي عليها جوه !!كانت الكلمة كافيه إن الاب يوقع في لحظتها علي الارض واتحول الجحود لبكاء شديد وصراخ وهستيريا طفل مش راجل كبير
" خلاص والله قولوله يرجع وانا مش هزعله تاني مش هضايقه مش همد ايدي عليه خلاص انا غلطان والله انا كنت فاكره بيكدب لما كان بيقول قلبي بيوجعني منك "

الولد أتوفي نتيجه الإصابه بمتلازمه القلب المكسور او ما يعرف Broken heart syndrome واللي احد اهم أسبابها فعلا الشعور بالحزن المستمر و الضيق و الضغط العصبي

كل الناس من حواليا رايحين نحية الراجل يطبطبوا عليه ويشيلوه من علي الارض وانا رغم إشفاقي علي حاله وإبتلائه لكن كان جوايا كلام عاوز أقولهوله كتير
كان نفسي اقوله شوفت ان الحياة مش دايما هتديلك فرصة تصلح الي خربته ! شوفت ان قسوتك عليه معملتش منه راجل دي خدته منك خالص !! رفضت تدخله تراضيه بكلمتين كان ممكن يكونو فارقين معاه رغم ان القدر نافذ لكن علي الاقل متعيش محسور من بعده وحاسس بالذنب
رغم ان انا معرفش ايه اللي حصل بينهم وهل هو كان كويس ولا لأ ، بس اللي شوفته ان القسوة مجابتش غير قسوة ، والتربيه السليمه مش كده يا جماعه لازم تشد شويه و ترخي شويات لازم تبقي قريب من ابنك مش تعاديه " كلكم راع و كلكم مسئول عن رعيته "
بلاش القسوة وبلاش العند وبلاش تأجلوا تصليحكم للغلط ، الحياة مش علي مزاجك هتسيبك تختار الوقت الي تصلح فيه غلطك
الحياة مش دايما هتديلك الفرصة اللي انت عايزها !

منقول للعبرة

15/08/2026

غربلة رضيع فى السبوع 👇👇

⬅️ولد عمره 10 أيام 👶جايبينه أهله للإطمئنان عشان إصفر شويه بعد الولادة بكام يوم ، الصفرا اللي إحنا بنسميها صفرا فسيولوجية ، يعني نتيجة إن البيبي مرضعش كويس🤱 أو كمية اللبن عند الأم قليلة ، زائد إن بقاله يومين رضاعته وحركته قلت ونومه بقى زياده😓 عن اللزوم ، على غير طبيعته ف اول اسبوع من الولادة .. يعني القصة ف مجملها رايحه ناحية الصفرا اللي بتقلل نشاط البيبيهات وبتخلي جهدهم في الرضاعة قليل ..

⬅️بالفحص ، الولد فعلا مستوى الوعي عنده مش حلو خالص😑 والمص بتاعه سيئ جدا يكاد يكون مش موجود ، ومش مستجيب للتنبيه ، والمؤشرات الحيويه بتاعته كلها نازله سواء تشبع الدم بالاكسجين أو النبض أو ضغطه ودرجة حرارته قليله مع شحوب بالوجه😰 وبرودة بالاطراف ملحوظة جدا ؛ يعني الموضوع بيدي على حاجه أكبر من الصفرا والولد دخل في صدمه💙 ، و لازم نتحرك بسرعة ..

⬅️بدأنا سريعا ندي مضادات الصدمة مع الأكسجين وأدوية معينه بتمنع هبوط الدوره الدموية ، والولد إلى حد ما بدأ يفوق ، وبدأنا رحلة البحث عن التشخيص وبعدها العلاج ..

⬅️ف الحالات اللي زي كده بنفكر في أسباب زي نقص في الصفائح الدموية أو انيميا تكسيريه أو ارتفاع سيولة الدم نتيجة نقص عوامل التجلط في الدم وده بيكون غالبا في البيبيهات ناقصي النمو أو ممكن لأسباب وراثية ..

⬅️فحصنا الولد تاني بعد ما استقر وسألنا الأهل هل حصل نزيف من أي مكان أو الولد رجع دم مثلا او فيه تغيير في لون البول أو البراز ، والأهل اجابوا بالنفي ..

⬅️طلبت من الممرضة لما تغيرله البامبرز توريني الحمام بتاعه وللأسف زي ما توقعنا كان فيه دم كتير ف البراز ..

⬅️سحبنا للبيبي معامل كامله طلعت الانيميا وصلت نسبة الهيموجلوبين ل 6 مع ميكروب بالدم ..

⬅️بسرعة طلبنا للولد دم وبلازما عشان نصلح الأنيميا والسيبسيس .. وبدأنا نفكر في السيناريو الأسوأ ............ نزيف في المخ ..

⬅️طلبنا في نفس اليوم اشعه مقطعيه على المخ 🧠عاجله ، وفي نفس اليوم بالليل بدأ الولد يتشنج مع الأسف .. وده ييأكد بنسبة كبيرة احتمالية النزيف ، ودي فعلا كانت نتيجة الاشعه المقطعيه ، نزيف في المخ🧠 ، بس بفضل ربنا مكانش واخد مساحه كبيره .. وكان لازم سريعا نتحرك في اتجاهين ؛ أولا التعامل مع النزيف بحيث يبدأ حجمه يقل ،
و ف نفس الوقت نصلح السيولة العاليه ف الدم ..

⬅️بدا الولد رحلة العلاج و بعد 5 ايام بدأ يستقر ، والتشنجات وقفت والانيميا والسيولة اتصلحوا والعلامات الحيوية اتظبطت ..
وبدأنا الرضاعة والتنفس الطبيعي .. طلبنا اشعه مقطعيه جديده وبفضل الله مفيهاش حاجه ، وبعدها بيومين الأهل جم عشان يستلموه ..

⬅️كان أول سؤال سألناه للأهل لما جم : انتوا عملتوله سبوع ؟
وبكل سرور وانشراح قالوا ايوه طبعا عملنا سبوع، ده أول طفل لينا ولازم نفرح بيه ..
وطبعا حطيتوه في الغربال وغربلتوه ؟
وبانشكاح أكبر من الاولاني : طبعا غربلناه عشان يطلع قلبه جامد !!

طيب يا جماعة اللي انتوا عملتوه ده أقذر حاجه ممكن تتعمل للبيبي اللي لسه مولود وده كان السبب إن الولد يحصل عنده تكسير في كرات الدم الحمرا والصفايح واحتمالات كبيره للنزيف ، من اخطرها نزيف المخ لأن البيبي بتبقى الأوعية الدموية للمخ عنده بتبقى هشه جدا وعرضه للتمزق والنزف بسهولة جدا ..وكان ممكن الولد ده يعيش باعاقه بدنيه أو ذهنية أو الاتنين مع بعض طول عمره بسبب الحركة دي ..

الشاهد من القصه : رجاء حار من الأهل بلاش تغربلوا ولادكم وهما هيطلعوا إن شاء الله قلبهم جامد وحلوين وطعمين من غير غربله

معا لصحة افضل لأطفالنا
دكتور محمود كامل
استشاري طب الاطفال وحديثي الولادة وكلى الاطفال بالقوات المسلحة
عضو الجمعية المصرية لطب وزراعة كلى الاطفال
زميل جامعة ايموري باتلانتا الولايات المتحدة الامريكية

15/08/2026

التعامل مع السخونية عند الاطفال 👈

🔶 قياس درجة الحرارة وتسجيلها :

✅ بنقيس الحرارة من تحت الإبط بالترمومتر الزئبقي أو الديجيتال ( بنزود نص درجة علي قياس الترمومتر )
✅ لو سن الطفل كبير شوية (أكبر من ٧ سنوات) بنقيس من تحت اللسان ( مش بنزود حاجة)

🔶 طريقة قياس الحرارة :

1️⃣ نترك الترمومتر تحت الإبط أو تحت اللسان ٣ دقائق أو حتي سماع صوت التنبيه في الترمومتر الديجيتال
2️⃣ لازم نستنى شوية قبل ما نقيس درجة الحرارة لو الطفل لسه صاحي من النوم أو بيعيط كتير أو بعد مجهود كبير

⛔ الترمومتر للاستخدام الشخصي فقط يعني كل طفل له ترمومتر خاص به و يطهر الترمومتر بالكحول بعد قياس الحرارة و يوضع في الحافظة الخاصة به و يحفظ بعيدا عن الحرارة الشديدة و أشعة الشمس و لا يوضع بالثلاجة

🔶 الإجراءات الواجب اتباعها في حالة ارتفاع الحرارة :

1️⃣ تخفيف لبس الطفل ( عشان ما نزودش الحرارة الخارجية اللي ممكن تزود السخونية أكثر )
2️⃣ تهوية المكان جيدا
3️⃣ الإهتمام بشرب كميات كبيرة من السوايل ( خاصة الرضاعة والماء و العصائر الطبيعية)
4️⃣ الكمادات بماء عادي من الحنفية (مش من الثلاجة)
الكمادات حول الرقبة و تحت الإبطين و أعلي الفخذين أو ياخد دش ماء عادي من الحنفية و الكمادات كل ٣ ساعات او حسب معدل رجوع الحرارة
5️⃣ خوافض الحرارة مسموح بالسيتال من عمر يوم و البروفين من عمر ٦ شهور (الجرعة حسب عمر ووزن الطفل) استشيرى طبيب الأطفال لمعرفة جرعة طفلك
6️⃣ متابعة الحالة العامة للطفل لو فيه حرارة أكثر من ٣٩ أو توهان أو تشنجات حرارية أو زرقة لشفايف الطفل أو أعراض تعب جامدة (كحة مستمرة أو نهجان أو ترجيع مش بيوقف و إسهال أكثر من ٧ مرات و هكذا) عليك التوجه فورا لطبيب الأطفال أو أقرب مستشفي

⛔ ملاحظات هامة جدا جدا جدا :

1️⃣ الدولفين و الكاتفلام و الكتافلاي و البيبي ريليف ليسوا خوافض حرارة بشكل أساسي و لكن مضادات للالتهاب و لا تستخدم تحت عمر سنة و لا تستخدم إذا كان طفلك يعاني من حساسية صدر و لا تستخدم إلا تحت إشراف الطبيب
2️⃣ كمادات الجيل مسموح بها للأطفال أكبر من عمر سنة فقط ( هناك نوع خاص للأطفال أقل من سنة) لكن كمادات الماء أفضل و أكثر فاعلية و أمان
3️⃣ الكمادات بالماء فقط بلاش نحط خل و لا كحول
4️⃣ ممنوع رش جسم الطفل بالكحول لخفض درجة الحرارة
5️⃣ الكمادات علي الجبهة غير مؤثرة في خفض الحرارة

معا لصحة أفضل لأطفالنا