12/04/2026
بعد اللايف المرعب اللي شفنا فيه "بسنت سليمان" بتنط من الدور ال١٣ محتاجين الناس تفهم يعني ايه اكتئاب!!
(الكلام اللي جي مهم جدا عشان كلنا فيه حوالينا في اهلنا واصحابنا ناس زيها ومش شايفين ده ولازم تكون فاهمه كويس)
الاكتئاب مرض، مش شوية زعل وهيفكوا بخروجة، ولا شوية دلع ولا قلة دين لانه بيكون عارف ربنا، مبيبانش عالناس من برة لان الانسان بيكون بيضحك عادي وبيعمل ريلز وبيهزر ومتابع وكل حاجة، بس من جواه بيكون بيتاكل، الاكتئاب اضطراب مزاجي، يعني بتكون حزين وفاقد الشغف بشكل مرضي، مبيروحش من نفسه انما بيروح بكورس دواء.
الاكتئاب مؤذي جدا، احساس وحش مستمر، بيخليك متعرفش تنام، بيؤدي لافكار وميول تخليك عايز تنهي حياتك لو اتسبت لوحدك هتنفذها، انعدام الرغبة في الحياة، والفكرة انك مبتبقاش عارف انك عيان، بتقول اصل ضغوط الحياة السبب، اعراضه عصبية وكآبة وبكاء مستمر، صعوبة تركيز واضطراب نوم، قلق وحساسية مفرطة.
المرض ده بيصيب كيمياء الدماغ، بييجي من اسباب كتير اهمها الظروف البيئية، يعني مشاكل الحياة زي مشاكل بسنت كدة، طليقها اللي عايز شقتها، وبناتها اللي مش عارفة تصرف عليهم، وصحابها اللي سايبينها لوحدها، واهلها، والفلوس اللي بتقل، كل ده ممكن ينتهي بشوية زعل وممكن ينتهي بالاكتئاب وفي لحظة ضعف يحصل اللي حصل.
المرض ده مرض مزمن زي الضغط والسكر، محتاج علاج طويل، محتاج متتسابش لوحدك، محتاج حد يتابع، حد ميستعيبش يروح لدكتور نفسي ويقول انا هفك لوحدي، محدش بيفك لوحده المرض بيزيد ونهايته سيئة جدا، ومحدش يقول ان كلنا مضغوطين ومحدش فينا بيعمل كدة لان ده في النهاية عيا مفيش حد كبير عالعيا، هيا نفسها فضلت متعلقة عالسور فترة كانت مستنية ايد تتمدلها ومحصلش، ربنا ينتقم من اللي وصلوها لكدة.
- ضروري : اي حد بيمر بظروف وبيلمح لزعل او فقدان شغف بشكل مستمر محدش يسيبه لوحده او لأفكاره ابدا لازم تكون على وعي ان الاكتئاب ده مرض احنا بس اللي مبنعرفش نتعامل معاه، ميتسابش لوحده، ميتكنسش حزنه تحت السجادة، دا مش مرض فرافيري ولا حاجة عيب.
شكرا.
