ايمان عثمان -مستشار تربوي و معالج زواجي-

Home
Egypt
Cairo
ايمان عثمان -مستشار تربوي و معالج زواجي-

أعمل في الإرشاد التربوي والنفسي منذ 2005ماجستير الصحه النفسيه وحاصله على دبلومات في العلاج الزواجي

27/07/2026

الأسوأ من إنك اتأذيت… إنك تبدأ تشوف الناس كلها من خلال جرحك.
لما الانسان يبقى بيستخدم تعميمات زي انه يقول: "الرجالة كلهم ....." أو "الستات كلهم ....." أو "الجيل ده كله ....."، هو كده مش بس بيحكم على موقف… هو بيبني قناعة كاملة على أساس فكرة اتكونت جواه من وجع، أو تجربة مر بيها.
وهنا الانسان هيواجه صعوبات في إدارة علاقاته و فهم المشاكل الحقيقية اللي بيعاني منها.
لأنه ما بقاش بيتعامل مع الواقع كما هو، لكنه بيتعامل مع صورة ذهنية هو مكونها ومصدقها.
والنتيجة؟
تعب بيتكرر، وسوء فهم بيزيد، وعلاقات بتتأثر… لأن التعميم بيعمي الإنسان عن انه يعيش ويقيم تجربته الراهنه وتفاصيلها الخاصه، والتفاصيل هي اللي فيها الحقيقة.
لو حاسس إن طريقة تفكيرك أو تجاربك القديمة مأثرة على علاقتك بنفسك أو بالناس، يمكن دي تكون بداية مناسبة إنك تفهم جذور اللي جواك بشكل أعمق، وتبدأ تتعامل معاه بطريقة صح 🤍

حجز الأستشارات والاستفسار عن طريق واتساب: 01113973398

21/06/2026

سؤال لأم عن العلاقة مع بنتها المراهقه اللي مغلباها وكان دا ردي:
السن دا متعب ومرهق ماحدش يختلف معاكي في كدا ولكن هو لازم له طريقه معينه في التعامل والا هتتعبي اكتر وكمان هتعملي حاجز بينكم اكبر مش هيساعدك ابدا
اولا اطلعي على الملف دا هيفيدك ان شاء الله
https://www.facebook.com/photo/?fbid=138621769207684&set=a.128214213581773
ثانيا
المراهق بنقلل له تماما الأوامر لانها اكتر شىء بيكرهه وكل شىء مطلوب منه يتم من خلال جلسه نقاش واتفاق على مهام ومسؤوليات فمثلا شغل البيت يكون فيه اتفاق على توزيع المهام عليها هي و أخواتها كل واحد بحسب سنه

ثالثا
مافيش حاجه اسمها قومي حالا استحمي ولا قومي حالا اغسلي وشك انما مثلا موعد كمان ساعه هتنزلوه فيتقال لها لو سمحتي مش هينفع ننزل الا لما تاخدي حمامك يا بنتي فرتبي وقتك على كدا علشان انا امك وحاسه انه فيه رائحه عرق وانت اكيد مش هتحبي حد يشمها وفقط
لو جه موعد الخروج بدون حمام تقولي لها للاسف هاضطر الغيه او نأجله لان مش هيناسب ننزل كدا
رابعا
ما تتدخليش في كل حاجه وتبقي خانقه ... عادي يبقى عندها ضوافر وتحب شكل ايديها سيبيها تستمتع بكدا , كل ما يصلح انك تفوتيه لازم تفوتيه علشان تقفي عند الحدود ولا تسمحي بتجاوزها
خامسا
من غير المقبول منطقيا لا ليها ولا لغيرها انك تقولي عذر ما هو انت ما بتسمعيش الكلام الا لما ازعق او انت اللى نرفزتيني فاتعصبت او مديت ايدي....الزعيق مش اسلوب حوار ومش صحيح وما هو غير صحيح ما بنقعدش نبرره لنفسنا تحت اي بند لأنه غير مقبول منك او منها هي كمان
سادسا
تشغليها بانشطه قدر الامكان مش تفضلي تقولي قومي وسيبي اوضتك وفي الواقع هم محتاجين وطبيعي يحبوا يبقوا لوحدهم ولازم نسمح بكدا في حدود انه يظل فيه مشاركه للأسره
سابعا
الأب هو الاقرب لبنته في هذه المرحله (ما يفترض ان يكون الا في حالة جفاء الأب) ومن الطبيعي انها لاتميل الى التواجد معاكي والحوار ودي دوافع نفسيه طبيعيه هتحسها داخلها لا تعيبك ومرحله وهتمر بأذن الله

12/05/2026

الألم والفراق و الحزن و كل المشاعر المؤلمه اللي في يوم حسينا بيها....كلها كانت جزأ من معادلة الحياه الطبيعيه دي مش المكون الاستثنائي
احنا بس اللي بننسى الحقيقه دي ومتخيلين ان العادي هو السعاده والحب و الونس والفرحه
المعادله مظبوطه صح بس لو نفهمها
لو فهمنا هنكتشف ان كل لحظه بكل مافيها من فرح او حزن هي جزأ اساسي من رحلتنا .....الرحله اللي فيها بنتعلم اكتر وبنفهم نفسنا والحياه اكتر وأكتر
الغلطه اننا اوقات نصمم نرجع وراء و نعيد نفس الخطوات مرات ومرات و زعلانين انها ماوصلتناش للمكان اللي عاوزينه من غير مانتعلم من المشوار اللي مشيناه ولا حتى نغير اي حاجه في خطواتنا ونفضل نلف ونلف لا بنوصل و لا بنرتاح

11/05/2026

لفت انتباهي التعليقات على سؤال لأحد الامهات بتقول ان بنتها (7 سنوات) شافتهم اكيد عن طريق الخطأ وهي مع والدها في علاقتهم الخاصه وطبعا البنت علقت بأنه شوفتكم بتعملوا حاجه عيب
نوعين من التعليقات اللى حابه اتكلم عنهم:
اولا.اللي بيقولوا لها انكري تماما ان دا حصل وقولي لها انها بيتهيأ لها 😟
قطعا ما نعملش كدا في مثل هذه الحاله مش هنشكك الطفله فيما رأته بعينيها ياجماعه بتقولوا ايه وتبقى هي فاهمه اننا بنكدب كما لو كنا غلطانين
الخطأ هنا في عدم توافر الحرص الكافي اللي خلاها تشوف لكن الجنس في حد ذاته شىء مباح مش قلة ادب و حلال ومن حقهم وهم مش غلطانين علشان تفزع من اكتشاف الطفله انما اكيد ما كانتش تحب ان البنت تشوفهم في مثل هذا الوضع شديد الخصوصيه
فأرجو في هذه الحاله عدم الانكار ابدا
ثانيا: اللي بيقولوا يعني ايه ياجماعه طفله هنفهمها ان دا مباح بين الازواج هي مش هتفهم كدا و هيفتح عينيها على الموضوع وهيكون عندها فضول (معرفش هم ايه البديل من وجهة نظرهم)
الاطفال بيفهموا ان تغيير الملابس شىء خاص بنعمله بدون ما حد يشوفنا ومع ذلك يسمح ان ماما مثلا او الدكتور بننكشف عليهم صح؟
كمان بيعرفوا ان ماما محجبه مثلا لكنها بتنكشف قدام بابا وبعض الرجال صج؟
اذا فكرة وجود قاعده لها خصوصيه شىء وارد مش عجيب وما يتفهمش
هل الطفله مش هيظل الموقف عالق في ذهنها لفتره ؟ما نقدرش نقول كدا
طيب هل دي المشكله؟ لا مش هي المشكله
المشكله الحقيقيه في عدم وجود تفسير سليم يتناسب مع سنها وحجم معلوماتها وحجم التفاصيل اللي هي شافتها
طيب برضو نقول ايه؟؟
الكلام هيختلف بحسب السن و حجم التفاصيل اللي هو شافها عن طريق الخطأ

02/05/2026

وهافضل اقول تاني وثالث و....عاااشر
ماتستمروش في علاقات مافيهاش امان ...علاقات بتعطوا فيها من غير ما تاخدو او بتعطوا جبال وتاخدو رمااال ولا تسوا
ما تستمروش لو مش مطمنين ....لو بتخافوا تقولوا انكم مش مبسوطين ....لو بتخافوا تتكلموا
لو مابتقدروش تقولوا لا على اللي بترفضوه ومش قابلينه
الاستمراريه في حد ذاتها مش هي الهدف ولا كفيله بتغيير الاحوال
اقفوا مش معناها تنهوا العلاقه انما معناها تدوروا على حلول حقيقيه ولو مش هتتعاونوا في الوصول للحلول مافيش تغيير حقيقي هيحصل
العلاقه بين اتنين ومسؤول عنها اتنين واللي بيكمل بيها اتنين لكن عدم رغبة واحد بس كفيله تنهي كل شىء
ينهيها عدم رغبته في ايجاد حلول او انه يسمع الطرف الآخر ويهتم او انه يوافق على مبدا ان بعض افكاره تحتاج للتعديل

شركاء الحياه هم رفقاء الرحله اللي نمشي معاهم كتف في كتف وايد في ايد نهون الرحله على بعض و نكون ونس الطريق نساند و ندعم و ننور لبعض
رحلتك هتفضل رحلتك بالرفيق او من غيره ماتختارش اللي يصعبها عليك و يكون العبأ اللي هتشيله على كتافك طول العمر
ولو محتاجين تعرفوا تتعاملوا مع مشكلاتكم صح ما تترددوش في التواصل معايا وحجز موعد عن طريق واتساب 01113973398

01/05/2026

كل ما باتواجد في اي مكان عام يلفت انتباهي جدا الانشغال الدائم بالشاشات اللي بقى مانع الناس من الحياه
الشاشات بتسرق اللحظه والفكره والونس
وجوه كلها مش بتبص لبعض ....مش بيتكلموا كل واحد عايش لوحده في الفقاعه بتاعته
عيون مش بتبص حواليها وتشوف موقف او فكره او تفهم انطباعات وتقرأ ملامح
الشاشه سارقه الانتباه حتى عن اللي جوانا ....امتى عقلي هياخد وقت يحلل موقف ويستنتج فكره او يراجع رأي؟؟؟ و لا حتى المشاعر ان الانسان يعيشها ويحسها بدل ماهو عمال يعيش مشاعر كل بوست و فيديو بيمروا عليه بالعشرات في الساعه الواحده
كفايه نستخبى ورا الشاشات ونخبي مشاعرنا ونستخبى من افكارنا
بلاااااش تبقى الشاشه هي الوسيله الوحيده اللي طفل صغير لسه ماكملش ٤ سنين بيتسلى بيها ونرجع نشتكي منهم لما يكبروا شويه ، خدو شنطه صغيره في اماكن الانتظار فيها العاب وفيها الوان و وسائل تسليه مفيده يستخدمها الطفل للتسليه ماتريحوش دماغكم بالشاشه علشان هي دي اللي هتشتكوا بسببها الشكاوى المريره

30/12/2025

كلما علا صريخك فقد الآخر القدره على سماعك

واخدين بالنا؟
لما هنزعق مش هنجبر اللي قدامنا على انه يسمع بل بالعكس احنا بنستعديه و بندفعه الى أنه ما يسمعناش

نطبقها بقه على ولادنا وشركاء الحياه واحنا هنشوف الفرق
وكمان في نفس السياق لازم لما يكون اللي بيتحاور معايا غاضب و صوته مرتفع ما ادخلش معاه في دايرة الغضب
(هنتكلم لما تهدأ) هنقول فقط

20/12/2025

رعايتك لنفسك مش أنانيه ولا معناها تفضيل لنفسك على حساب المحيطين
معناها ببساطه اني اعمل لنفسي مساحه انا كمان
اخصص جزأ من الموارد ليا ....الموارد زي الوقت والفلوس
مش اهمال لبيتك انك تاخدي ساعه ليكي ...بعد ما تاخديها هتقومي وتشوفي اللي وراكي
اوعي تفتكري انك لما تعودي الولاد على ان مالكيش متطلبات دا ترجمته عندهم حب....ابدا
دا هيكون ترجمته تقليل من نظرتهم ليكي ولاحتياجاتك
اعطي جسمك حقه مش هتبقي أم انانيه لو قلتي تعبانه ومش هأقدر و اللي يعرف يقوم بمهامه لوحده يقوم بيها ويساعد
انت الانسانه والزوجه والام و الابنه و و و ....اهتمامك بنفسك هو اهتمام بكل دول لو بقيتي منهكه مش هتقدري تقومي بادوارك في الحياه بالشكل اللي انت عاوزاه

27/10/2025

بس ياسيدي وراحت مشوحه بايدها كدا وقايله
ليه يعني ما اقدرش اغير منه ...مهو طول ما انا بحبه اكيد هاستحمله!! 🤭
ياحبيبتي
الحب مش بيضمن استمراريه العلاقات فيه عوامل تانيه كتير هي اللي ممكن تحافظ على العلاقه بخلاف الحب
ودا أولا
ثانيا الأنسان مننا مابينفعش ياخد قرار التغيير لغيره
اما انا اغير من نفسي بقناعه كامله و إراده و خطه واعيه او ماحدش هيقدر يغيرني
ثالثا ياعزيزتي
الحب اللي مايتوفرش له اخد زي مافيه عطاء بينتهي فماتراهنيش على الوقت

Address

Cairo

Website

http://emanothman.net/

Alerts

Be the first to know and let us send you an email when ايمان عثمان -مستشار تربوي و معالج زواجي- posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to ايمان عثمان -مستشار تربوي و معالج زواجي-:

Want your practice to be the top-listed Clinic in Cairo?