05/02/2026
صداع اول يوم رمضان .. ايه الحل؟🤔
ناس كتير بتسأل هو لسه بدري على الاستعداد لرمضان
الحقيقة لا مش بدري
جسمك محتاج يتهيأ من دلوقتي علشان أول يوم صيام مايبقاش صدمة
أول يوم رمضان قبل الفطار بساعة تلاقي ناس كتير تعبانة وعصبية ومش طايقة حد
وأغلب الناس فاكرة إن السبب الجوع أو العطش
لكن السبب الحقيقي في حالات كتير هو الكافيين
اللي متعود يشرب شاي أو قهوة يوميا جسمه بيبقى معتمد على الكافيين
الكافيين بيعمل انقباض في الأوعية الدموية في المخ
لما نمنعه فجأة مع الصيام الأوعية دي بتتوسع وده يسبب صداع تقيل وتعب وعدم تركيز
وده اللي بنسميه أعراض انسحاب الكافيين
طب هل الحل إننا نوقف شاي وقهوة خالص
لا طبعا
الحل إنك تعود جسمك واحدة واحدة
لو بتشرب 3 كوبايات في اليوم حاول تخليهم 2 وبعد يومين خليهم واحدة
ومتحاولش فجأة أول يوم رمضان تخليهم صفر لأن جسمك هيقاوم
حاول كمان تأخر ميعاد القهوة
بلاش أول ما تصحى
كل يوم أخرها شوية لحد ما جسمك يتعود إن الكافيين مش ضروري بدري
في ناس بتفتكر إن شرب قهوة كتير في السحور هيمنع الصداع
الحقيقة إن ده بيزود المشكلة
الكافيين مدر للبول وبيزود الإحساس بالعطش
ومفعوله بيروح بدري فترجع تصدع تاني
عشان كده ابدأ من دلوقتي
قلل الكافيين
نظم نومك
زود شرب المياه
وحاول تقلل سكر مع القهوة
ولو عايز نتيجة أحسن جرب تصوم يوم في شعبان
هتفرق جدا في أول أيام رمضان
يا رب أكون قدرت أفيدكم ولو بمعلومة بسيطة
#صداع
#قهوه
#كافيين
