30/08/2026
طلبات أهلي دي واجب عليا لكن طلبات مراتي كماليات!
في بيوت كتير، الزوج شايف إن أي حاجة أمه أو أبوه يطلبوها منه
فرض وواجب وماينفعش يتأخر
لكن لما زوجته تقول:
البيت محتاج كذا ..
الأولاد محتاجين كذا ..
أنا محتاجة كذا ..
فجأة
الحسبة عنده بتتغير!!
ويبقى
مش وقته !
إنتِ بتطلبي كتير !
هو إحنا ناقصين مصاريف؟
أهلي أولى!!
بس خليني أقولك حاجة 🙂
برّك بأهلك ماينفعش يتحول لظلم لمراتك⛔
ومساعدة أهلك شيء عظيم
لكن بيتك له حق
وزوجتك لها حق
وأولادك لهم حق
وربنا سبحانه وتعالى قال:
﴿لِيُنفِقْ ذُو سَعَةٍ مِّن سَعَتِهِ﴾
[الطلاق: 7]
يعني المسؤولية مش إنك تنفق على اللي تحبه وقت ما تحب ..
لكن إنك تؤدي الحقوق والواجبات بحسب استطاعتك
يا زوج يا قوام يا مسؤول🙂
مراتك مش بتطلب منك " فلوس" بس
هي بتطلب منك أمان
بتطلب تحس إن بيتها أولوية عندك
وإن احتياجاتها مش عبء عليك
وإنها مش مضطرة كل مرة تثبت لك إن اللي بتطلبه "ضروري"
والأصعب من قلة الفلوس
إن الزوجة تشوف إن زوجها بيلاقي دايمًا مساحة لأهله، لكن مابيلاقيش مساحة ليها💔
هنا الوجع مش في الفلوس
الوجع في الإحساس بالمكانة
وعشان كده يا زوج
قبل ما تقول "أهلي أولى" اسأل نفسك:
هل أنا فعلًا ببرّ أهلي
ولا بستخدم برّهم كذريعة إني أُقصّر في حق بيتي؟!!
أهلك لهم حق وبرّ
لكن زوجتك مش منافسة لأهلك علشان يبقى ياهي يا هما!!
وبيتُك مش آخر بند في ميزانيتك!!
بيتك انت الراعي الوحيد له والقائم على تلبية جميع احتياجاته
ولو إمكانياتك محدودة، اتكلم معاها بوضوح، واتفقوا على الأولويات سوا
لكن ماينفعش تخليها طول الوقت تحس إنها بتطلب منك صدقة
بينما أهلك بياخدوا حقهم!!
وفي المقابل يا زوجة
من حقك تطلبي احتياجات بيتك واحتياجاتك
لكن من المهم كمان تفرّقي بين الاحتياج الحقيقي والرغبة اللي ممكن تتأجل، وتحاولي تشاركي زوجك في ترتيب الأولويات بدل ما يتحول المال لمعركة بينكم
الزواج مش مين ياخد أكتر
الزواج إن كل واحد يعرف يؤدي حقوق الطرف الآخر من غير ما يحسسه انه عبيء ولا انه بيمن عليه!!
لأن في فرق بين الامكانيات وبين الأولويات !!
الزوجة ممكن تسكت عن الفلوس
لكن صعب تسكت عن إحساس إنها مش أولوية
في رأيكم
إيه الأصعب على الزوجة: إن زوجها يقول "معنديش" ولا يقول "معايا بس أهلي أولى"؟
#المصروف #الأهل #زواج
