09/08/2026
رحلة نور
لماذا نكرر نفس الاختيارات
📍 محطة اليوم
الحدود الصحية
أحيانًا بنكرر نفس الاختيارات مش لأننا مش شايفين الغلط لكن لأننا مش عارفين نقول (لأ).
كانت بتقول:
“أنا دايمًا بحس إني لازم أرضي كل اللي حواليا.”
سألتها ولما بتوافقي على حاجة إنتِ مش عايزاها بتحسي بإيه؟!
قالت:بزعل من نفسي.
ولما ترفضي؟
سكتت شوية وقالت:بخاف أكون أنانية.
وهنا كانت الحكاية محتاجة تتشاف من زاوية مختلفة لأن أحيانًا إحنا مش بحتاج نتعلم إزاي نقول لأ قد ما بنحتاج نتعلم إن:-
⬅️لأ مش معناها إني وحشة.
⬅️ومش مناسب ليا مش معناها إني أنانية.
⬅️وإن اختلافي معك مش معناه إني ضدك.
في ناس بتتعود إنها تكون متاحة طول الوقت تسمع وتساعد وتتنازل وتعدي وتبرر.
💥لحد ما تكتشف فجأة إنها بقت موجودة لكل الناس إلا نفسها.
فتدخل علاقة وهي مش مرتاحة وتقبل كلام يوجعها وتتنازل عن احتياجاتها وبعدها تقول أنا ليه دايمًا بيحصلي كدة ؟ ليه باختار و بقع في نفس النوع ده من العلاقات.
يمكن السؤال أحيانًا مش ليه الناس بتعاملني كده؟ لكن أنا بسمح بإيه يتكرر في حياتي؟ وبخاف أحط حد فين وليه ؟
وده مش معناه أبدًا إن الشخص مسؤول عن أذى الآخرين له.
لأ المسؤولية عن الأذى تقع على من اختار أنه يؤذي لكن مسؤوليتنا تبدأ من اللحظة اللي نقدر فيها نختار:-
نقبل إيه ؟ونرفض إيه ؟ونعبر إزاي ؟وامتى نبعد خالص عن موقف مش بيناسبنا؟
💡نتعلم أن الحدود مش قسوة الحدود الصحية مش معناها أنا حر ومحدش له عندي حاجة ولا لو حبيتني هتعمل اللي أنا عايزه ولا هي عقاب للناس.
الحدود الصحية أقرب إلى أنا باحترامك وباحترام نفسي وعلشان كده هقول لك بوضوح إيه اللي يناسبني وإيه اللي مش بيناسبني.
وأحيانًا أجمل علاقة ممكن تعملها مع شخص هي إنك تكوني واضحة معه بدل ما تفضلي ساكتة و متضايقه و بعدين تنفجري.
🤍 الحدود في ديننا مش أنانية
قال الله تعالى:
﴿وَلَا تَعْتَدُوا إِنَّ اللَّهَ لَا يُحِبُّ الْمُعْتَدِينَ﴾
فالميزان مش إننا نأخذ كل شيء لأنفسنا ولا إننا نعطي كل شيء للآخرين.
الميزان ألا نظلم وألا نُظلم قدر استطاعتنا.
نحترم الناس من غير ما نلغي أنفسنا ونحفظ أنفسنا من غير ما نظلم الناس.
🌱 بذرة اليوم
الحدود مش بتقول للناس إنتوا مش مهمين الحدود بتقول أنتم مهمين و أنا كمان مهم.
✨ ومضة نور
النهارده مش عايزاكِ تفتحي دفترك وتراجعي كل علاقاتك ولا تفتشي عن كل مرة اتأذيتي فيها.
اختاري موقف بسيط تعرفي إنك غالبًا بتوافقي عليه رغم إنك مش عايزاه وقبل ما تجاوبي خدي نفس واسألي نفسك:
لو مش كنت خائفة من إزعاج الشخص الآخر كنت هاقول إيه؟!
جربي جملة واحدة بس (مش هقدر المرة دي) أو أن (الوقت ده مش مناسب ليا)أو (أنا مقدرة طلبك لكن ده مش مناسب لي)
من غير شرح طويل من غير اعتذار عن وجودك ومن غير الدخول في جدال لإثبات حقك.
ولو كان الموقف آمن ومناسب لكِ لاحظي بس شعورك بعد ما قلتيها مش مطلوب تحسي بالراحة فورًا.
أحيانًا أول حدود صحية بنحطها بتكون مصحوبة بشوية ذنب أو خوف لأننا بنتعلم سلوك جديد.
ومع الوقت والممارسة بنبدأ نفرق بين أنا عملت حاجة غلط و أنا عملت حاجة جديدة مش متعود عليها وده فرق كبير🤍
👣💡خطوة نور
⬅️اختاري حد صغير لهذا الأسبوع.
مش أكبر مشكلة في حياتك ومش أصعب علاقة عندك حاجة بسيطة تقدري تتدربي فيها على الوضوح.
واكتبي لنفسك رسالة قولي فيها:-
من حقي أقول لأ باحترام ومن حق الآخر أنه مش يعجبه قراري
يمكن تكوني اتعودتي سنين إنك ترضي الناس على حساب نفسك وده مش معناه إنك هتفضلي كده.
وضع الحدود مهارة والمهارة بتتعلم مش لازم تتحولي في يوم واحد لشخص بيعرف يقول (لأ) ابدأي بحد صغير وجملة واضحة وموقف واحد وكل مرة تختاري فيها الوضوح بدل الكتمان أنتِ بتكتبي لنفسك تجربة جديدة إن الحفاظ على نفسي لا يعني أني فقدت حبي للآخرين.
وربما تكون هي دي ومضة اليوم مش لازم أبني سور بيني وبين الناس يكفيني أن أفتح بابًا وأن أعرف متى أفتحه ومتى أغلقه برفق 🤍
ولو حابة ابعت لك تمرين يساعدك اكتبي في الكومنت (حدود صحية) وهابعت لك على طول 🤍
