11/02/2026
٣ حاجات ممنوع تقربي لهم في أي علاقة… لو لعبتي فيهم هتخربي على نفسك بإيدك.
1️⃣ أول حاجة…
ما تحكيش ماضيك لشريكك مهما كان فضولي، ومهما ضغط، ومهما قالك “أنا عايز أبقى صريحين مع بعض”.
في فرق بين الصراحة وبين إنك تفتحي قبر وتقعدي تحكي تفاصيل ماتت واتدفنت.
ماضيك خصوصيتك، صفحة اتقفلت، اتعلمتي منها وخلاص.
مش كل حاجة تتقال، ومش كل سؤال يتجاوب عليه.
لو سألك، بكل هدوء وثقة قولي: “ده موضوع خلص ومش حابة أرجع له”.
اللي يحترمك بجد، هيحترم حدودك.
واللي يفضل ينبش، اعرفي إنه مش بيدوّر على فهم… هو بيدوّر على حاجة يستخدمها ضدك وقت الخلاف.
2️⃣ تاني حاجة…
إوعى تفتحي أسرار بيتك قدامه.
مشاكلكم العائلية، نواقص أهلك، خناقاتهم، أسرارهم… دي مش مادة للنقاش العاطفي.
اللي يحكي على عيلته بسهولة، ما يتأمنش.
إنتي كده مش بس بتفضحي أسرار، إنتي كمان بتقللي قيمة أهلك في عينه.
وبعدين تيجي تزعلي لما يتعامل معاهم باستخفاف أو قلة احترام.
اللي سمع منك إنهم ضعاف أو غلطانين، هيشوفهم كده طول عمره.
احفظي صورة بيتك قدامه، حتى لو في مشاكل… المشاكل تتحل جوه البيت مش على قعدة عاطفية.
3️⃣ تالت حاجة…
عمرك ما تعيّبي على نفسك قدامه.
ما تقفيش قدام المراية وتقوليله “أنا تخنت”، “بشرتي بايظة”، “شعري وقع”، “شكلي مش حلو”.
لأن كل مرة بتلمحي لنقطة ضعف في نفسك، إنتي بتعلّميه يركّز عليها.
الراجل بطبعه بيركّز في اللي بيتقال قدامه.
لو طول الوقت بتتكلمي عن نواقصك، ما تستغربيش لو بقت هي أول حاجة يشوفها.
ثقتك في نفسك هي اللي بتفرض عليه يشوفك حلوة حتى وإنتي مش شايفة كده.
🛑 افهمي القاعدة دي كويس:
الحدود مش قسوة… الحدود حماية.
الخصوصية مش غموض… الخصوصية كرامة.
والثقة في نفسك مش غرور… الثقة هي اللي بتخلي العلاقة متوازنة.
العلاقة الصح
مش إنك تتعرّي نفسياً بالكامل
ولا إنك تحكي كل حاجة
ولا إنك تقللي من نفسك علشان حد يطبطب عليك.
العلاقة الصح
إنك تبقي واثقة
حاطة حدود
عارفة إيه يتقال
وإيه يتسكت عنه
وإيه يتحفظ جواك.
اللي مش عارف يتعامل مع واحدة عندها حدود…
مش قد علاقة أصلاً
DRDinaElharery
