Psychotherapist _ Katy Ayad

08/03/2026

استخدام الطفل كسلاح تحارب به طليقك و طليقتك

من اكبر و ابشع أنواع الأذى اللى بتعرض الطفل ليها

اولا: لانك مش شايف الطفل نفسه (زى ما نور) مش متشافه من مامتها

ثانيا: بتستخدمها اصلا كسلاح نفسي فى قصتها القديمة

وهنا عندنا قصتين بس فى اصلهم هما هما نفس القصة
نبيلة (الأم) اللى واجهت ابوها لما حاول يقولها رأى حكيم فى قصة بنتها و طليقها ادهم وهى هاجمته و قالتله تعرف اية انت عن حياتى؟! كنت فين فى تفاصيل كتير تخصنى

و كانت أم نبيلة (الجدة) بتوافق كلام نبيلة لابوها
أنه فعلا مكنش موجود و ميخصوش اللى هما بيعملوه و كأنهم بيبعدوه عن حياتهم و تبقى القصة (أم و بنتها من غير الاب الظاهر فى الصورة)
و دة نمط شائع فى نموذج الأم المريضة .. هى بتلعب على البلع و الاستحواذ و عاوزه الاولاد ليهم لوحدها (و دى قصة كبيرة لوحدها)

فى حين لما الأب ده دخل غيبوبة ، ظهرت اخت نبيلة و هى قاعدة جنب والدها مقهورة و نفسها يقوم و بتقوله أنه السند و الحماية ليها وهى مش مستحملة تكمل من غيره!!
و دة لان الاب فعلا شخص ظاهر فيه الرعاية و الاهتمام وأنه بيقول كلمة حق وقت الاحتياج.

دى قصة نبيلة اللى بتحاول تخليها هى هى قصة نور

نبيلة بتستخوذ على نور و بتحاول تبعد الاب (ادهم) تماما عنها
ومش بس بالقانون ، لكن بالترهيب
دى بتحفر فى دماغ نور أنه مالوش لزمة و مش عاوزينه و مش طيب و مبيجبش حاجة و مش فى حياتك
و بتعمل ده بأسلوب عنيف و قاسى وصل البنت للتبول اللاارادى

يعنى حتى مش بتستحوذ عليها عشان تديها افضل معاملة و تحافظ على نفسيتها و تراعيها .. لا
دى مش شيفاها اصلا

لا اكل صحى ولا لاحظت لما عملت حمام على نفسها ولا اهتمت بنفسيتها أو طريقة استقبالها للكلام السلبى عن ابوها
ولا شافت صحتها اللى بتدهور
و لا بتثبت إى وجود صحى أو سوى فى قصة بنتها اصلا.

بنت عاشت شايفة الاب مالوش لزمة و دور
فبتسلم دة لبنتها بالحرف .. نفس القصة بالظبط
تعيش نفس الحياة (ماهى مش احسن منها)

و نكرر النمط من جيل لجيل بقى (ودى الطريقة اللى بتتورث بيها الأضطرابات النفسية)

و نبص نلاقى نور بقت نبيلة جديدة

الثمن فى القصة لجيلين اكبر بتدفعها نور (طفلة صغيرة اوى) عن أنها تدفع فواتير الكبار

فين نور؟ محدش شايفها

و فى الاخر بتختذل الطفلة فى أنها (سلاح) فى ايد الأم
عشان تقهر اب، كان أفضلها تفضل معاه هو مش هى

اب مهتم و عارف يعنى اية أبوة و طفلة و نفسيتها و صحتها و فى الاخر مذلول على ساعتين رؤية فى الأسبوع ومش طايلهم

الأطفال كائنات
و كائنات حساسة و لسه هشه بتتشكل

مش أسلحة
مش لوى دراع

شابوة فراج بجد


#رمضان2026


#أطفال

د/

05/03/2026

انك تغلط و تهين و تشتم و تتكلم بالسوء عن شريك حياتك (جوزك/مراتك) قدام ابنك

دة بيندرج تحت بند family abuse

يعنى انت بتأذى ابنك أذى متعمد .... متعمد
و هيسيب أثره واضح فيه

و بالمناسبة(وهو بيقفل من الطرف اللى بتتكلم عنه، هيقفل منك انت كمان) يعنى بيخسركم انتوا الاثنين

احترموا أولادكم شوية.

05/03/2026

Booooom 💣

دخول شديد



لما طرف يقرر ينتقم من شريك حياته، فى ابنه!!

دون مراعاه لاحتياج الأب لبنته
أو احتياج البنت لابوها

ام بتقرر تنتقم لنفسها ف تأذى اقرب ما ليها

مشهد الجنية المليانة بأطفال قاعدين يقابلوا اهاليهم لمده ساعة ولا اثنين فى الأسبوع فى جلسة الرؤية

و مفروض الساعتين دول يسددوا كل احتياجاتهم!

لو الجوازة مكملتش .. اوك ده قراركم

لكن حق الطفل فى الأب و الأم .. دى حقوقه.

شكله هيبقى مسلسل جامد
تابعوه

04/12/2025

التوقيت الأكثر ألما
١* هو الوقت اللى بتدرك وتفهم فيه أن عندك أزمة نفسية و يتم تشخيصك؟

٢* ولا بعد شهور علاج و خطوات كتير اخدتها فى رحلة تعافيك؟

امتى تكون متبهدل اكتر و بتعانى و اعراضك ظاهرة و فى اعلى مراحلها؟!

10/07/2025

"أنك ترصد كثيرًا بالمشاهدة"

يوجى بيرا

12/06/2025

🌪️ #ارهاصات١

الحياة دى غريبة جداً...

يمكن عشان شغلى أغلبه قصص للناس، لقيت أن أبشع حاجة ممكن يحسها شخص وتبوّظ حياته فعلاً هى: "الاحراج".

وده كان سبب مدهش بالنسبالى 😳
هحكى كام موقف شوفتهم بعينى:

👤 فلان اللى حاسس أنه لوحده، مع أنه بشكل أسبوعى دورى بيقابل جروب ناس كتير،
بس محرج يقول بشكل مباشر أنه لوحده .. أو ممكن نبقى أصحاب .. أو تعالى نتعرف و نروح و نيجى الاجتماع سوا !!

مع أن فى نفس دايرة الاجتماع دة تحديداً، إن مكنش الأغلبية حاسيين فعلاً بالوحده.

وده تقريباً طلب شخصى لكل واحد.. بس الكل محرج!!
محرج يظهر ضعفه..
محرج يترفض..
محرج من نظره و حكم و تقييم اللى حواليه له..
عمال يدخل جوه جلده من الاحراج!

💔 جروب تانى أغلبهم سينجل،
كل حد بيدور على شريك بطرق "برة" الجروب،
اللى بيتجرح و اللى بيتخدع لأنه معرفش يشوف حقيقه الشخص التانى،
واللى لبس فى حيط لما اتصدرله وش مالوش علاقة بالحقيقة،
واكتشف هو مع مين فعلاً بعد الجواز.

و لما سألت: ليه مختارتوش من بعض؟!
ده انتوا عشرة و عارفين بعض و فيه مساحة استلطاف!

الإجابة كانت برضو بتلف حوالين الاحراج!!
أخاف أخسره!!
أخاف أخسرها!
أخاف أجرب جوه جروبنا و منكملش فـ تحصل حساسيات!!
خوف.. احراج.... خوف... احراج
و النتيجة: كل حد خد ريسك أكبر برة، و مش كله اتوفق.

🏠 عائلة كبيرة،
كل أسرة قافلة بابها على نفسها انطلاقاً من مبدأ: "يا بخت من زار و خفف"،
منسألش عن بعض احتراماً لمبدأ: "لو عاوزين يطمنونا عليهم كانوا اتصلوا هما".

و جوه كل بيت شعور عميق بالعزلة و سؤال سخيف:
"احنا ليه مالناش حد مع أن عائلتنا كبيرة؟!!"

محرجين نسأل فيصدونا..
نسأل فنتفهم غلط..
نسأل فيبان أننا تقال!..
نسأل فمنلاقيش ترحاب..
لا لا لا.. احراج أوفر، احنا الأسهل نسكت خالص و نكتفى بعلاقة خفيفة سطحية.

🧠 طيب و مشاعرك؟!
كانت لحظة وحشة أوى لما شوفت القصص دى و شبههم كتيرررررر،
واكتشفت أن كل اللى انت بتدور عليه هو ممكن أوى يكون على بعد خطوة رجل واحدة منك!
ممكن يكون حواليك و جنبك،
بس فيه بُعبع كبيرررررررر اسمه: الاحراج!!
محرج أقول فـ أبلع لسانى...

أوحش حاجة أن الإنسان يكون محاط بناس، لكنهم مش ناس...
مش ناس حقيقية ينفع تتسكن فى خانة الونس و السند و إشباع الاحتياجات للعلاقات،
و يكتفى بيهم كـ طعم حلو عابر، و منظر اجتماعى لذيذ، و مكملات يومية وخلاص.

من الغباء إنك متحاولش تشبع الأول و تكتشف دوايرك اللى حواليك،
و تقرر تروح لمنطقة أبعد بكتير اعتقاداً أن هناك مفيش حساسيات فى المعاملة، و هتبقى براحتك و كده.

لأن حتى لو ده كان حقيقى، فـ انت بتعرض نفسك لمجازفة:
اختيار شخص شوفت منه جانب واحد فى وقت محدود،
و بتروح تسكنه جواك فى منطقة قريبة أوى أوى أوى و غالية أوى أوى أوى،
و انت و حظك...
يا طلع فعلاً هدية،
يا طلع علامة هتعلم عليك.

خصوصاً أننا فى زمن أغبر، عمال يفك و يبوّظ نفوس الناس بجداره،
فـ أصبح الإنسان مجموعة من الأشياء المفككة الغير متجانسة،
اللى متعرفش تركيبته دى هتوصله لفين!

فـ الأكثر أمان: إنك تكتشف اللى فرحت و زعلت و اتخانقت معاهم،
اللى قربت و بعدت و رحت و جيت و لسه فيه خيط بيجمعكم،
اللى اختلفت و اتفقت معاهم، اللى سافرت و قضيت وقت معاهم،
اللى شوفت ضعفهم و قوتهم و حيرتهم و تعبهم قصادك،
اللى شوفتهم فى أحلى و أسوء أمورهم!

❌ دى مش دعوة للانغلاق... بالعكس!!!

بس انت أصلاً مش هتعرف تروح لدواير أبعد،
و انت مش بكامل انطلاقك و طبيعتك و حريتك فى الدواير الأصغر و الأقرب!

هتبقى فى خطر لأنك هتكتشف حتة عميقة فى نفسك،
بس وانت بعيد وسط ناس لسه أغراب عنك!!

يعنى البديل أسهل... بس أخطر. فاهمنى؟

🤝 ليه الحياة متبقاش بسيطة؟
يالا نتعرف أكتر؟! ..... يالا.
تعالى نوقف تعامل أنا مش مرتاح... أوك نوقف.
محتاج مساعده لفترة، تقدر تساعدنى؟ .... أوك أحاول.

ليه دائماً فيه خطة و حسابات و طريقة و تردد و حساسيات؟ ليه!!

💭 عمرك فكرت ماذا بعد تجاوز الاحراج؟
طلبت من جروب تكون جزء منهم فرحبوا، و لقيت صُحبه حلوة...
طلبت من حد مساعده، و طلع لطيف و ساعدك، و ده خلاك أفضل...
توجت صداقة حلوة بأرتباط دافى كمل معاك لباقى عمرك...

عمرك تخيلت السيناريو اللى ممكن يحصل،
لو بس كسرت شعور الاحراج جواك؟

#ارهاصات١

01/04/2025

الكومنتات 👇🏻

لما كتبت عن صورتين للابوة
والد هشام اللى كان سبب عقدته (اكرم حسنى)
و والد خالد اللى فضل متعلق به حتى بعد ما مات (احمد امين)

ناس كتير فى الكومنتات كتبت عن آبائهم

البوست ده اكتب فيه عن والدك و ذكرياتك معاه و أثره اللى سابه فيك

عشان لو كتبت كلام سلبى تبقى فرصة انك خرجته براك و تتحرر من الذكرى اللى مقيداك

و عشان سبب اقوى و اهم، فى حالة انك كتبت كلام حلو و مُشجع تبقى فرصة لأى اب تانى فاهم الأبوة قسوة و شده و عنف و مفكر أن ده الطبيعى أنه يقرأ و يشوف بنفسه إن ده لا طبيعى ولا حاجة

و يشوف بعينه من ناس كبرت اية الأثر اللى بيفضل
يمكن ده يكون سبب تغير فى طريقة حد و يلحق يعيش بشكل مختلف مع أولاده

رمضان بيحب اللمة و فرصه كل الناس فى الفترة دى فاتحة قلوبها و قادرة تسمع.



يارب كل المسلسلات بأهداف حلوة كده

24/03/2025

ازاى اعرف لو حد لمس ابنى ؟!

اية اللى ممكن يظهر على الطفل يقولى اقلق و ابدء اسأل ولا لا

#طفل #تربية #تحرش

23/03/2025

تانى سبب يخلى الطفل اللى اتعرض لتحرش يسكت

هو توقع الولد أن الأب و الأم هيوقعوا عليه عقاب لو قال بأعتباره شريك فى الجريمة دى

و يجيله التوقع ده منين؟
*أن مفيش لغة تواصل بينه و بين الأهل .. فمش عارفهم ولا عارف يطلع منهم اية و ميطلعش منهم اية

*وجود مشاكل أسرية بين الأب و الأم و بيشوف بعينه الخناقات دى وهو كل طرف بيرمى اللوم على الثانى و بتهمه أن هو السبب.

*الجفاف العاطفى عند الطفل
ف يكون اتعلق بلمسه المتحرش .. لقى فيها شبع عاطفى

*يكون حاسس بالدونية و استحقار الذات (دة اوقات بيحصل من كلام الأهل المهين لشخصيه الطفل) ف يحس أنه يستاهل حد يأذيه أو يضايقه بالطريقة دى.

ف لو طفلك بيواجه أى مشكلة من دول .. خلى بالك اوى اوى

د/

21/03/2025

يوم بعنوان
*امك حلوة اوى ياد يا لمبى* 😂😂

15/03/2025

الماميز .. اغنية تتر مسلسل عايشة الدور لدنيا سمير غانم هيعجبكم اوى 😂