31/07/2026
بندور على التعافي مش عشان نبقى صورة مثالية ونموذجية...اصلا مفيش صورة نموذجية لازم نبقى مطابقين لها...التعافي مش دين جديد هدفه انتاج افراد نموذجين.. التعافي وسيلة من وسائل المساعدة على الحياة.
بندور على التعافي عشان نتحرر ...نخرج من حالة البقاء...وسجون الخوف اللي مقيدة ومحددة حياتنا...وبتسبب لنا الكثير من المعاناة والاحباط واليأس...
بنتعافى عشان نخرج نعيش ونندمج في الدنيا..نخرج لها ونتفاعل معاها....نثبت حضور.
اننا نتحبس في قضية الأمان اولا...وكأن الأمان هو المحرك الاوحد..وشرط الوجود الوحيد...بيخلينا عايشين من نموذج البقاء فقط..من خلف الجدران.
بس الحياة فيها حاجات كتير ...الحرية..والاصالة..والاسهام..والمعنى..والابداع..والتأثير...والمشاركة...
في ناس عاشت وشاركت برغم ان الامان مش متحقق بشكل كبير..
وفي ناس كمان شاركت واتخلت عن الامان ومناطق الراحة لاهداف اكبر..
الحياة فيها محاولات اخرى للتحقق والخلق والابداع والنمو وسعي للتاثير والاسهام والحكمة.
قرراتنا في الحياة بتاعتنا....الماضي اوقات بيخلينا منشوفش غير حل واحد...بيضيق الرؤية والعدسة...وبيختصر كل الأشياء المهمة والدافعة والمحفزة في سبب وحيد...وبيتحول لحياة او موت..كل شيء او لا شيء.
احنا مش بنتحرك لما نتصالح مع كل شيء ونسدد كل شيء...احنا بنتحرك لما بنقدر نتجاوز..لما بنقدر اننا نوصل لصيغة متخليش الماضي..او الحاضر التعيس معطل لنا.. اننا نستمر ونكمل...بنتجاوز واحنا خفاف ومنطلقين لما نرمي معاني سلبية من على اكتافنا ونفك قيود في رجلينا معطلانا..لما نوصل لمعنى يلخص الحكاية..ويهدي عقلنا ويطيب قلوبنا...ويطبب على ارواحنا....
محتاجين قرار...
هل نفضل نلف في دوائر البقاء..مجرد البقاء...ولا نخرج من أسر الخوف للدنيا الواسعة نكتشفها ونكتشف انفسنا معاها..
نعيش ونحيا ونجرب ونخاطر ونغامر... ولا فقط ننجو حتى ولو بحد الكفاف.
