05/05/2026
الكابتن الي نايم ولا علي باله ده عرفت من مامته انها كانت كاتبة وصيتها قبل ما تدخل تولده -وده حرفيا مش مجازا- بعد الي اتقالها عن حالتها وتوصية أطباء -خارج مصر- بإجهاض الحمل في الشهور الأولي لخطورته علي حياة الأم
مشيمة متقدمة و ملتصقة من الدرجة الثالثة والأخيرة، احتمالية النزيف اثناء الحمل ٨٠% واثناء الولادة مع فصل المشيمة ١٠٠% والحل الوحيد لتجنب النزيف هو استئصال الرحم بدون محاولة فصل المشيمة ده بخلاف صعوبة الاجراء ومضاعافاته الوارده
بعد جراحة استمرت حوالي ٣ ساعات كان فيها أكشن أكتر من أعتي أفلام الأكشن ربنا أكرمنا و انهارده مامته جاية تفك بلاستر الولادة وجايبالي هدية جميلة ، بس الهدية الأجمل هي دخولها عليا مبتسمة للمرة الأولي وهي شايلة الاستاذ احمد عشان نعمل السونار وأطمنها ان الرحم بتاعها بفضل الله جاهز لاستقبال بيبي تاني وقت ما تحب
الجراحات المتقدمة برغم تعقيدها وشعري الي طار منها 😐 الا أنها الشق المحبب لقلبي في شغلنا لان ما بعدها ليس كما قبلها ؛ حياة المريض بتنور في لحظة ..
وكما هو الحال علينا السعي وما التوفيق الا من عند الله
الحمد لله علي وصول الأستاذ أحمد بالسلامة بعد رحلة محفوفة بالتحديات واتمني لما يكبر يعرف إن أمه في وسط الي كانت فيه ده أول سؤال لما فاقت من التخدير كان عنه❤️
