02/10/2017
ايه هو الاكتئاب
الاكتئاب مرض نفسي شائع يصيب الانسان في اي مرحله من مراحل عمره وده بيكون وجود عوامل بيولوجيه بالأضافه للعوامل الخارجيه المحيطه زي التوتر والقلق الدائم فبيحصل خلل في بعض المواد في مخ الانسان و اهمها نقص ماده السيرتونين المسؤله عن السعاده فيبدا اعراض الاكتئاب تظهر .
ايه هي اعراض الاكتئاب ؟
الاكتئاب انك تحس بالحزن طول الوقت ,
الحاجات اللي كنت بتحب تعملها وتستمتع بيها ما بقتش تسعدك ,
نومك بقي قليل اوي او كتير اوي ,
شهيتك قلت او زادت بس بدون استمتاع بالاكل ,
دايما حاسس بالذنب وتانيب الضمير وقله الثقه ,
نركيزك في شغلك قل كتير ,
حاسس اني اكيد هفشل في اللي بعمله ,
جسمي علي طول واجعني ومصدع ,
فيه افكار بتجيلي ان هي ايه قيمتي في الدنيا واحنا عايشين ليه اصلا ,
والاعراض دي بتستمر لفتره اسبوعين عندك وتبدي تاثر علي حياتك الوظيفيه والاسريه ,يبقي ارجوك اطلب مساعده طبيب نفسي .
طب انا عايز اتعالج بس من غير دو اده ينفع ؟
قبل ما نحدد انك تاخد دوا ولا لا لازم نعرف نحدد شده اعراض الاكتئاب عندك وتاثيرها عليك
وعشان كده مريض الاكتئاب في المرحله الاولي ممكن يتم علاجه بالجلسات النفسيه وبيتحسن بنسبه كبيره اما لو الحاله متوسطه او شديده لازم علاج دوائي لمده اسبوعين للتخفيف من حده المرض وبعدين نبدا الجلسات النفسيه اللي بتقلل كتير من الاعراض
طب انا الكل بيقولي صلي واقرأ قران هتبقي كويس ؟
انك تصلي وتقرأ قران ميمنعش من المرض النفسي لاننا زي ما اتفقنا الاكتئاب فيه جزء منه سببه بيولوجي وهو اختلال في المواد الكميائيه بالمخ ودي لازم ليها علاج دوائي نفسي للسيطره علي الخلل ده,بعديها ممارستك لحياتك تعملها زي ما تحب لان للاسف كتير من المكتئبين بيوصلوا لمرحله انهم عندهم احساس انهم خارجين من رحمه ربنا وان هما اكيد داخلين النار فبلاش نضغط عليهم احنا كمان ونزود المعاناه عندهم .
هو ايه السن اللي ممكن يجي فيه اكتئاب ؟
الاكتئاب بيجي في كل الاعمار بس كل عمر ليه اعراض مختلفه
في الاطفال ممكن يجي ان الطفل يحصله تبول لا ارادي او فرط في الحركه او تغيير مفاجئ في سلوكه .
اما في كبار السن ممكن يجي ان المريض يبدا يشتكي من اعراض كتير جسديه وفي اماكن مختلفه من جسمه ويبدأ يروح للدكاتره تخصصات كتير ويعمل فحوصات وتطلع سليمه ,ان الشخص يبتدي ينسي وانتباهه يقل ,وفي كبار السن لازم ناخد بالنا ان اي تغيير في سلوكهم لازم يتم عمل فحوصات شامله للاطمئنان عن عدم وجود اي مرض عضوي ادي لحدوث اعراض نفسيه,
