11/09/2026
في طبيعة العلاقات عمومًا، وتحت أي مُسمّى، حتى علاقتك مع نفسك، لازم تمرّ بسوء فهم، وعدم القدرة على التوصّل الصحيح، وانفعالاتك غير متزنة؛ بحكم إننا بشر وبنمرّ بكتييير من التغيّرات.
والخلافات، على فكرة، شيء صحي جدًا في العلاقات. ليه بقى؟!
أولًا، بتخليك تعرف الشخص اللي قصادك أكتر، وتعرف عيوب العلاقة ومميزاتها، فتقدر تعرف: إنت هتشتغل عليها ولا هتوقف لحد هنا؟
بتعرف بيها مقامك ومقدارك، والمكانة بتاعتك عند الطرف الآخر.
الخلافات بتخلّي الناس تقرّب من بعض، والروابط تبقى أقوى لو:
ـ عرفت تبقى محترم وصاين العِشرة.
ـ عرفت تحتوي الشخص اللي معاك، والعكس صحيح.
ـ قدرت تتقبل العيوب.
ـ قادر تعدّي مع الشخص ده المشكلة.
ـ قدرت ما تجرحهوش؟!
العلاقات بتبوظ في الخلافات:
ـ لما الشخص يبقى بايعك.
ـ طول الوقت مخوّفك بغيابه.
ـ بيدخّلك في موجة من الشك وكتر التفكير ولوم النفس.
ـ إنك تراضيه شيء صعب.
ـ إنك تحت التهديد دايمًا إنه هيسيبك.
ـ إنه بيعرف يخليك تطلع أسوأ ما فيك عشان تدافع عن حقك.
ـ أو إنه يكون شاطر في قلب الترابيزة عليك.
العلاقات اختيار واختبار.
اللي مش هيريّحك معاه سيبه. العلاقات اتوجدت للراحة، فأول ما تحس إنك بتتعب، وإن العلاقة بقت عبء عليك... إنت ماشي غلط، لفّ وارجع تاني.
د. دعاء خليدي
