24/01/2026
ألا لطف الله غالب ، ألا لطف الله قريب ❤️
في الفترات الصعبه والمواقف المؤلمه والابتلاءات التقيله علي قلبك استحضر قول سيدنا يوسف {إن ربي لطيف لما يشاء}
البوست دا حاولت اكتبه اكتر من مره وكل مره يغلبني الالم النفسي اللي عشيته ومقدرش اكمله من كتر ماصعبان عليا نفسي وفضلت اجله لحد ماقدرت الملم نفسيتي علشان اكتبه
اصعب ابتلاء عشته ، ربنا مايكتبه علي حد شوفت الموت حرفيا فيه لكن لطف ربنا كان اكبر ومحاوطني في كل وقت
اتعلمت ان الدنيا دي في لحظه ممكن متبقاش فيها ، في ثانيه تكون بتضحك وبتتكلم وماشي علي رجلك ومش في دماغك اي حاجه ومره واحده ينقلب بيك الحال ،مافيش شي مضمون في الحياه ، الموت هي الحاجه الوحيده الحقيقيه في الدنيا ، بس مكنتش مستوعبه المعني دا
مكنش في مخيلتي لحظه يحصلي ربع اللي حصلي داخله العمليات زاي اي واحده داخله تولد مستنيه البيبي اللي ربنا رزقني به، وكل تفكير قبل الولاده تزيين الاوضه بالبلالين وكل ترتيباتي قبلها لون المانكير وصبغه الشعر وكاني متاكده اني داخله وخارجه تاني عادي …
لحد مالدنيا اتقلبت كلها لاقيت نفسي بموت من الالم ونزيف حاد نتيجه خطا طبي قطع شريان داخل البطن اثناء اجراء العمليه ودخلت في shock نتيجه النزيف الشديد كان قدامي دقايق ومكنتش هعيش لولا لطف ربنا الهمني اني اطلب من الدكتور سونار علي البطن بعد ماعرفت اني حصلي تشنج واغماء فهمت اني دخلت في hypovolemic shock في اللحظه دي عرفت اني الموت قريب مني جدا…
افكار كتيره مشاعر متلخبطه خوف ووجع ،انا مش مستعده اقابل ربنا ، وولادي هيعملوا ايه وبنتي اللي لسه لحمه حمرا مين هيربيها كل اللي قولته لجوزي خد بالك منها حطها في عينيك وقول لولادي اني بحبهم جدا والشهاده علي لساني وسط كل الاصوات العاليه كل حاجه كانت بتحصل بسرعه دكاتره حواليا وتمريض بيشيل ويحط فيا جسمي متلج النفس خارج داخل بالم لا يوصف
، كانيولات ، اوضة عمليات بتتفتح تاني هيموجلوبين الدم بعد ماكان ١٣ نزل ل ٥ وصريخ محتاجين اكياس دم حالا المريضه ضغطها ٧٠ وانا في الم لا يعلمه الا الله وصوتي علشان اطلعه كان عذاب
بسرعه هدومي بتتقص المشرط حسيت به قبل مالتخدير يشتغل وانا كنت في حالة استسلام كامل مش عارفه هل علشان ادركت اني بموت بس كنت خايفه قوي بجد وعماله افكر اني كان في صلوات سيبتها انا قصرت كتير هعمل ايه !!! فضل علي لسان حالي الشهاده وتفكيري في ولادي وبنتي اللي لسه مبقلهاش ساعات مين هيربيها وبدعي ربنا يحفظهم
خرجت علي العنايه قعدت فيها ١٠ ايام كانت لوحدها عذااااااب نفسي وجسدي اصوات المرضي من مختلف الاعمار وصريخهم ليل ونهار
جسمي مش متحمل كانيولات كل كانيولا تدخل الوريد يفرقع لحد ماعرفوا يحطولي كانيولا في رقبتي ابتلاء كان شديد قوي ويطول شرحه ….
ومازلت بتعافي صحيا ونفسيا مازال اثر النزيف من ارتشاح وتجمع دموي يتعافي منه
الشاهد من الامر لازم دايما نحاول نكون مستعدين في اي لحظه لمقابله ربنا
الحياه مش مستهله الصراعات والخناقات والزعل والانتقام
احنا ملهيين قوي كدا ازاي في الدنيا
بنعمل ايه مع ربنا غير الخمس فروض
البوست دا علشان يمكن انا لما اتحطيت في الموقف دا عرفت اني لازم اراجع حسباتي تاني مع ربنا واني كنت مقصره قوي واني لازم يكون ليا وقفه مع نفسي
ادعولي ربنا يكمل شفائي علي خير
ألا لطف الله غالب ، ألا لطف الله قريب ❤️
