Dr. Omar Barakat

20/08/2026

19/08/2026

❌ يا دكتور، نعمل عملية ردّ مفصل دلوقتي ولا نستنى شوية؟ وهنعملها لما يبقى عمر الطفل كام؟⁉️

سؤال بيتسأل كتير لدكتور العلاج الطبيعي ودكتور العظام...

هحاول أبسّط الفكرة للأهل. أنا بحدد بناءً على إيه؟

بنبص على كذا نقطة، زي:

درجة الإزاحة اللي بنحددها من خلال الأشعة X-ray، وبنتابعها بتكرار الأشعة لتحديد التغيير في الإزاحة؛ لأن فيه كذا رقم ليهم مدلول في تحديد القرار.

مثلاً:

1- لو نسبة التزحزح أو الإزاحة أقل من 30%، ففي الأغلب ما بندخلش عملية، وبنحاول نعمل Positioning ونحافظ على درجة الـTone ونقلل نسبة الشد حوالين المفصل.

2- لو الدرجة حوالي 30%، بنقول إن الطفل ده على الـBorderline ما بين إنه يعمل عملية أو ما يعملش.

طيب بنحدد بناءً على إيه؟

بناءً على المتابعة وتكرار الأشعة. لو لقينا النسبة بتزيد، يبقى هندخل في قرار العملية. لكن لو النسبة ثابتة، والطفل بيكتسب وظائف تانية وبيتطور، يبقى هنكمل بنفس الاحتياطات اللي قبلها ونتابع كل فترة.

3- لو النسبة أكبر من 30 أو 40%، بنرشّح عرض الطفل على استشاري جراحة عظام أطفال، عشان يقيّم الحالة ويشوف هل الطفل محتاج تدخل جراحي ولا لأ.

4- آخر حاجة، لو حصل خلع كامل، وده بيحتاج تقييم من استشاري جراحة عظام أطفال في أقرب وقت.

الطفل ده في أنهي مستوى من المستويات الخمسة للـGMFCS؟

بمعنى: الطفل بيتقلب؟ بيقعد؟ بيحمل ويقف؟ هل بيتطور وظيفيًا ولا ثابت؟

وده بناءً عليه، مع باقي العوامل، بيساعدني في اتخاذ القرار.

المدى الحركي للمفصل:

وهل ليه تأثير أو بيعوقني في حاجة؟ زي مثلاً إننا مش عارفين نغيّر الحفاضة أو نهتم بنظافة الطفل الشخصية.

الألم:

يعني الخلع ده مسبب ألم ووجع دايم للطفل ولا لأ؟

التطور الوظيفي للطفل:

بمعنى إن الطفل ده بيتطور ولا ثابت في نفس مستواه الوظيفي؟

نيجي لنقطة السن:

ما تقولش: "هستنى لحد 6 سنين عشان أعمل العملية."

ولا تقول: "الطفل 3 سنين، يبقى لازم عملية."

السن عامل مساعد، مش Indication لوحده.

❌ هدف عملية ردّ الورك في طفل CP مش فقط تحسين الوظيفة الحالية أو تسهيل الوقوف؛ الهدف الأساسي أحيانًا هو الحفاظ على تشريح المفصل ومنع حدوث تشوهات وألم ومشاكل ثانوية مستقبلًا.

وده في الأغلب بيكون رأي دكتور العظام، ومصلحة الطفل في الرأي المشترك المبني على رؤية دكتور العلاج الطبيعي ودكتور العظام.

القاعدة اللي هنمشي عليها:

"مش لازم أستنى لحد ما الطفل يستعد للوقوف."

والأفضل:

"أستنى طالما الورك مستقر، والطفل بيتقدم وظيفيًا، والأشعة مش بتسوء."

وده بالذات محتاج متابعة أشعة منتظمة، لأن غياب الألم في CP مش ضمان إن الورك بخير.

19/08/2026

#المغرب #سلطنةعمان #الاردن #ليبيا #البحرين #السعودية #ليبيا

17/08/2026

بدردش مع احد الزملاء ف سالني ليه بعض الاهالي مبيكونوش راضيين عن نتيجة التحسن بتاعة الطفل؟!🤔

حاولت اجاوبه اجابه كافيه اتمني الاهالي تقرأها.

تعريف الاهل لمعني  "النتيجة" مختلفة عن اللي أنت كمتخصص بتعتبره نتيجة.

طيب احساس عدم الرضا بيجي منين!؟

-الأهل بيقارنوا الطفل بطفل تاني
"ابن فلان كان زيه ومشي بعد 6 شهور، ليه ابني لسه؟

-مش شايفين التحسن الصغير
أنت ممكن تلاحظ تحسن في التحكم بالرأس، التوازن، الـMs tone أو جودة الحركة، لكن الأب والأم مستنيين حاجة واضحة جدًا: يمشي لوحده،او يقعد نفسه او اي وظيفه لكن الطريق للوظيفه بالنسبالهم مش تحسن مرضي الا لو الأهل ف المجال الطبي هيبقوا فاهمين دا.

ـ توقعاتهم بتكون أعلى من طبيعة الحالة
أحيانًا الأهل داخلين وهم متوقعين إن العلاج الطبيعي سحر ف يوم وليله هيجيب النتيجه،دا مش برشام صداع هتاخده هتخف ف لحظتها.

-اوقات بيكون الدكتور مش محدد لهم من البداية: إحنا رايحين لفين؟
لو مفيش أهداف واضحة وقابلة للقياس، بعد فترة العلاج الأهل ممكن يسألوا:
"طب إحنا اتحسنّا قد إيه؟"

-المدة الطويلة بتعمل إحباط
في البداية بيكون عندهم حماس كبير. بعد شهور من الجلسات، المصاريف والمجهود والالتزام بيخلي أي تقدم بطيء بالنسبالهم مش تحسن....

*-الإعلام والسوشيال ميديا بيعملوا توقعات غير واقعية
فيديو لطفل "قبل وبعد" في 30 ثانية ممكن يخلي ولي الأمر يتخيل إن كل الأطفال المفروض يكون عندهم نفس الـتحسن،ف لازم يحطوا ف اعتبارهم انه الفيديو دا نتيجه شغل ممكن يكون سنه او عدد سنين،وكل حاله ليها قدراتها ومشاكلها المختلفه والمقارنه مش هتوصل الاهل الا لعدم الرضا...

*ممكن يكون فيه تحسن فعلي، لكن مش في الهدف اللي الأهل مهتمين به
مثلًا أنت شايف إن الطفل بقى أحسن في الجلوس والتوازن، لكن الأم كل تركيزها على:
"هو لسه مش بيمشي."
فبالنسبة لها النتيجة = صفر، رغم إنك شايف تقدم حقيقي،ف لازم نبقي معرفين الاهل الاولوليات بتاعتنا وانه لازم الوظيفه دي قبل  دى ف التطور الوظيفي للطفل،لكن لو هشتغل ع وظيفتين والطفل مؤهل يعملهم هختار اللي الأهل عايزينها الاول ومعتبرينها أولويه.

وأخيراً:

الأهل مش بيشتروا "جلسة علاج طبيعي"، هم مستنيين أمل ونتيجة.
فلو الأمل ده متساب من غير ما يتحط له إطار واقعي _حتي لو مش مماشي رغبة الاهل المهم يكون واقعي قابل للتحقيق _من أول يوم، حتى لو أنت عملت شغل ممتاز، ممكن في النهاية يحسوا إنهم مش راضيين.