12/09/2026
"إحنا فترات في حياة بعض."
الجملة دي ممكن في الأول تحسها حزينة…
بس لما تفهمها، ممكن تبقى من أكتر الأفكار اللي تريحك نفسيًا.
مش كل شخص دخل حياتك كان المفروض يفضل فيها للأبد.
في ناس جت في وقت كنت محتاج فيه حد يسمعك.
ناس علمتك حاجة عن نفسك.
ناس وقفت جنبك في فترة صعبة.
وناس وجودها كان مؤذي… وانتهى، حتى لو كنت وقتها فاكر إنك مش هتقدر تكمل من غيرها.
المشكلة إننا أحيانًا بنتعامل مع نهاية العلاقات كأنها فشل.
"إزاي بعد كل السنين دي مبقيناش في حياة بعض؟"
"يعني كل اللي حصل مكنش له قيمة؟"
"هو أنا ضيعت وقتي؟"
مش بالضرورة.
انتهاء العلاقة مش معناه إن وجودها كان بلا قيمة.
ممكن تكون العلاقة أدت دورها في حياتك وانتهت.
وممكن يكون أصعب جزء في التعافي إنك تتقبل إن الشخص اللي كنت متخيله "للأبد"… كان في الحقيقة فترة.
وعشان كده، الصحة النفسية مش بس إنك تعرف تحافظ على علاقاتك…
لكن كمان إنك تعرف إمتى تتمسك، وإمتى تسيب، وإمتى تتقبل إن بعض الفترات خلصت.
إحنا فعلًا فترات في حياة بعض…
ومش دايمًا نقدر نتحكم في طول الفترة.
لكن نقدر نتحكم في حاجة أهم:
نخلي وجودنا في حياة بعض يستحق الذكرى.
ولما تيجي فترة الرحيل…
نقدر نمشي من غير ما نكسر بعض. 🤍
د. علا عادل
استشاري الصحة النفسية والإرشاد الأسري
#العلاقات #التعافي
