https://www.facebook.com/900501199985518/

Future Doctor, نقابة اطباء البحيرة/بجوار مضرب الرز, Damanhour (2026)

21/03/2022

قصص فحياتنا .. انتي كتبتيها ..
خبرات و تجارب .. معاكي بنعيشها ..
حبك الغير مشروط هو اللي مقوينا و مصبرنا على مر الايام ..
كل سنة وانتي طيبة ي ماما 😍

14/03/2022

من اول ما نتيجة الثانوية العامة بتبان وبتعرف إن تم ترشيح سيادتكم للقبول فى إحدى كليات الطب العظيمة 🪄 خلاص كدة انت مبقاش اسمك محمد عادى لأ انا الدكتور محمد👨🏻‍⚕️ اللى لازم يعالج كل أفراد العيلة المالكة وصحاب العيلة وعيلة العيلة 😴..
*س -* طب هل انا فعلا طبيب ولا فاضل عالحلو تكة ؟ 🤔
*ج -* في الحقيقة فاضل تكات🙂
- فى البوست النهاردة هنتكلم عن ايه اهم الحاجات اللى احاول اكتسبها خلال فترة الكلية قبل ما ابقي طبيب مسئول 🌚♥️

*أولاً :* لازم اتعلم اقول معرفش .. ايه حاجة مخذلة ؟ لا يا سيدى مش مخذلة أبدًا لازم تعرف انك لسه قدامك كتير عشان تكون اساسيات التعامل مع اى حاجة تخص اعظم مخلوقات ربنا وهو الإنسان أو أى كائن حى عموماً *-كلمتك عن جهل قادرة تقتل روح -* وده عمره ما كان الهدف اللى انت داخل الكلية عشانه كلنا لازم نبقي داخلين الكلية بهدف الآية ديه {وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ۚ } 🤍

*ثانياً :* قوّي اللغة عندك وخاصة الانجلش وحاول تاخد شهادة معتمدة على سبيل المثال وليس الحصر TOEFL او IELTS هتساعدك جداً وتقوي ال CV بتاعك أيًا كان مجال تخصصك✍🏻 .

*ثالثاً :* على سيرة ال CV من أهم النقط اللى بتميزك وسط أقرانك هى ال civil work او العمل التطوعى حاول دايمًا انك تستغل فترة الكلية فى انك تزود خبرتك وتكتسب مهارات تزود ثقتك فى نفسك وتقوي روح المشاركة والعمل الجماعى عندك هيفيدك ده جدًا ويزود انفتاحك على العالم اللى حواليك🌝 .

*رابعاً:* اجتهد واعمل اللى عليك دراسيًا عشان مترجعش تندم انك كنت ممكن تأدى بصورة أفضل *بس اعرف كويس جدًا ان صحتك النفسية أهم من اى حاجة تانية* وان ربنا هيحطك دايمًا فى المكان المناسب ليك حتى لو كان فى ذهنك حاجة تانية . 💜

*خامساً :* استمتع بمجالك😌 ؛ انزل مثلا وشوف الدكاترة بتتعامل ازاى فى المستشفي مع الحالات السهلة قبل الصعبة أبدأ واحدة واحدة أو انزل صيدلية وشوف سوق العمل حواليك واعرف ان مفيش حاجة بتروح على الفاضي ممكن حاجة تشوفها بالصدفة حالياً تكون سبب انك تنقذ حد بعدين 🤷🏻‍♀️.

*سادسًا :* طوّر من نفسك وخد كورسات فى اكتر من مجال بس لو هنصحك بحاجة اهم حاجة كورس الاسعافات الأولية (على فكرة احنا هنا فى اسرة future doctor بنعمل الكورس ده ابسط يا عم )🦥👀

*سابعًا :* اُذكر نفسي وإياكم انك تخلى نيتك فى اى عمل هو رضا ربنا سبحانه وتعالى دايمًا وانك تكون انسان فعال فى خدمة المجتمع وصحته🌚 .

- *واحب أنهى كلامى بمقولة دكتور على حسيب ( جدو على ) : ( شاءت الأقدار أن أرزاقنا تبقي من ألم الناس بس اوعى تتمنى تعب الناس عشان تكسب )*♥️✨

12/03/2022

هنتكلم انهاردة عن موضوع معظمنا بنتكلم عنه فى حياتنا اليومية وموضع اهتمام كبير من العالم كله وهو المتحورات الجديدة من فيروس covid -19 والمعروف بإسم فيروس كورونا .
- طبعا الموضوع دا كلنا بنسمع عنه بشكل يومي ولكن معظمنا ميعرفش ايه هي طبيعة المتحورات دي وايه يفرق بينها وبين بعضها ... هو يعني ايه متحور اصلا !
-المتحور دا بيكون نتيجة ان الفيروس حصله تغيير فى التركيب بتاعه اوطفرة فى ال DNA فيظهر سلالة جديدة من الفيروس تختلف اختلاف طفيف او كبير عن الفيروس الاساسي والاختلاف دا بيكون فى سرعه انتشار كل سلالة وحدة واعراض المرض اللي بتسببه وبالتالي هتختلف فى طريقه علاجها.
-من اكتر السلالات الشائعة الفترة دي هم سلالتين:
1- متحور delta : و دا اول ظهور ليه كان فى دولة الهند وكان فى شهر مايو 2021 وانتشر بشكل كبير فى شهر يوينو.
-والسلالة دي ظهرت نتيجة حدوث طفرة لچين موجود في بروتين اسمه spike protein ودا بروتين من اهم البروتينات الموجودة فى فيروس كورونا والمسئولة عن سرعة انتشار الفيروس فالتغير اللي حصل دا سبب ان متغير delta يكون اسرع فى الانتشار من فيروس كورنا.
-الاعراض بتظهر على المصاب بعد يومين ل 14 يوم من الاصابة بالفيروس وبتكون نفس اعراض فيروس كورونا اللي كلنا عارفينها زي :
-حمى و كحة واحتقان ونفس قصير وإعياء وصداع تكسير فى الجسم.
-اسهال وترجيع وفقدان لحاسة الشم والتذوق.
-وممكن كمان الاعراض دي متظهرش على المصاب ولكنه بيكون still مصدر للعدوى للاشخاص اللي حواليه وخصوصا لو اختلط بحد كبير مريض سكر او قلب او شخص مناعته قليله فلازم لو الشخص شاكك انه مصاب او كان فى تجمع كبير يعمل تحاليل يتأكد ان سليم او يعزل نفسه على الاقل اسبوعين.

•تاني سلالة معانا وهو الاشهر حاليا "اوميكرون" ودا ظهر في عدد كبير من الدول من ضمنها الولايات المتحددة وكان فى شهر نوفمبر 2021.
•ظهر نتيجة عدد من الطفرات بتوصل ل 60 طفرة چينية ولاقوا ان العدد الكبير من الطفرات بيسبب ان مناعه الشخص تقل خاصة لو كان مصاب قبل كدا او اخد الڤاكسين.
•السلاله دي بتنتشر أسرع من فيروس كرونا وكمان متحور دلتا و اول ما بتوصل للرئه بتتكاثر اسرع بحوالي 70 مرة من متغير دلتا لكنها بتكون أقل فى ال sevirity من متغير دلتا ودا لأن أوميكرون مش بيقدر يخترق انسجة الرئة بشكل عميق.
•ممكن الشخص اللي اخد جرعتين من الڤاكسين يتعرض للاصابه وللسبب دا بدأت وزارة الصحة بإعطاء جرعة تالته و الافضل ان يكون الڤاكسين من النوع mRNA زي لقاح فايزر كدا.

•طب ايه الاجراءات اللي ممكن نعملها عاشن نتجنب الإصابة بمتحورات فيروس كورونا🤔:
•طبعا لازم نلبس الماسك
•نتجنب التجمعات الغير ضرورية لأنها بتزيد من انتشار الفيروس.
•ناخد ال vaccine لانه اثبت فعالية ضد متحور delta ولاقوا ان الشخص اللي مأخدش ال vaccine بيكون اكتر عرضه للاصابه بالفيروس.
دمتم سالمين🤲❤️

09/03/2022

المسكنات: شئ موجود ف بيت كل الناس تقريبا 😇. يعني سواء اشتكيت من آلام بطن ، ظهر، صداع ...) جمله خد المسكن ده حلو أو ادخل اجبلك مسكن حاجه كده ثوابت ف الحوار
طيب المسكن ده بيعمل ايه ؟ 🤔بيشتغل ازاي ؟🤔 هيضرني؟🙄 هيخفف الالم علطول ؟ 🙄 ليه آثار جانبيه ؟ و أسئله كتيره جدا 🧠
نجاوب علي الاسئله الكتير دي بقا🧑‍⚕️
_المسكن ده و بيشتغل ازاي ؟
=المسكن ده دواء لتخفيف الالم المزعجه لفتره و ليس لازالته تمام دون فقدان للوعي او النوم و بيشتغل المسكن علي الاجهزه العصبيه المركزيه و المحيطه لمكان الالم
_ طيب برده المسكن ده ف ماده أيه تؤثر علي المناطق؟
= دي باختصار كده دي ماده اسمها آسيتامينوفين دي بتاثر علي المناطق الدماغيه الحساسه لألم تجعل الدماغ بتغاضي عن تسجيل الالم 😲
_👈 طيب المسكنات دي ليها كام نوع ؟
=1 مسكنات غير الستيرويديه مثل الأسبرين
2 مسكنات افيونيه تنقسم إلي قسمين ضعيف مثل الكوريين و قوي مثل المورفين
يعتبر الترامادول ف المنطقه الوسطي بين القوي و الضعيف
3 ده بقي يجتمع فيه اكتر من نوع ف قرص واحد مثل الباراسيتامول .
#بعص الآثار الجانبيه المسكنات:
👌الاستخدام المفرط المسكنات الافيون يؤدي إلي تحولها إلي إدمان و اعتياد الجسم عليها مما ينتج عنه الهلوسة و حدوث النوبات و عدم الانتظام ف الكلام و تشنج العضلات و صلاتها
2 الاصابه بالقرحه و نزيف المعده و الامعاء
3 مرضي الجهاز التنفسي يتعرضون لخطر شديد مثل تضرر الرئتين و ضيق التنفس نتيجه الإكثار من إستخدام المسكنات
4 قد تؤدي إلي مشاكل ف القلب و الاوعيه الدمويه و فشل كلوي و فشل الرئوي
5 تشكل أيضا خطوره علي المرأه الحامل
الأخطاء الشائعه ف استخدام المسكنات: 🤚
1 مضاعفه الجرعه علي مدار اليوم :
مضاعفه الجرعه مش هتضمن تخفيف الالم او التاثير السريع بل ممكن تؤدي إلي إلغاء عمل القرص الاول كليا .
2 دمج نوعين مختلفين
قد يشكل المزيج من المسكنات علي اخطار صحيه و ليس علي ازاله مزيد من الآلام
3 دمج مسكنات الآلام مع ادويه اخري
الخليط ده ممكن ان يؤدي علي تعطيل فاعلية احد الادويه
دمج المسكنات مع بعض ادويه توثر علي عمل ادويه مرضي السكر أو تعركل عمل بعض ادويه مضادات الاكتئاب
4 القياده تحت تأثير المسكنات:
بعض المسكنات تعمل تشوش او تعب و تختلف الآثار الجانيه من شخص لآخر
5 تقاسم الادويه مع الآخرين
6 عدم التحدث مع صيدلي
7 تخرين المسكنات لحاله الطوارئ :
التخرين ف مكان غير مناسب مثل الرطوبه تصبح هذه المسكنات غير صالحه
8 كسر الأقراص بالقوه:
العديد من الادويه يجب تناولها كما هي دون كسر و لا يكسر القرص إلا باسنشاره من الطبيب
اخيرا وليس أخرا:
"نصائح مهمه "
1 عدم تناول المسكنات علي معده فارغه
2 ينبغي استشاره الطبيب قبل تناول اي نوع من المسكن
3 لا تتناول المسكن علي مده أطول من 4 ايام متتاليه
4 الحد الأقصى لتناول ف اليوم مرتين
5 تناول المسكنات ممنوع لاطفال
6 عدم تناول القهوه او الشاي مع المسكنات
و دمتم سالمين !!

07/03/2022

" بعد السرطان ، لا أخاف شيئًا " دي جمله قالها حد بعد ما تعافي من السرطان ولكن معظمنا ميعرفش ان مش كل ورم بيبقي سرطان وان في انواع للاورام وبيبقي في منها اورام حميده واورام خبيثه وعايزه اقولك انها بتبقي اسعد لحظه في حياه المريض اما يعرف ان الورم اللي عنده حميد مش خبيث 🥺
👈 بيبقي في اختلاف كبير بين الورم الخبيث والورم الحميد، فلما بيكتشفو ورم في الجسم، فالخطوة الأولى اللي بيعملها الدكتور انه يكتشف اذا كان الورم دا خبيث ولا حميد ، لأن دا هيأثر بشكل قوي على خطة العلاج .. طب اي هو الورم ؟
الورم بيبقي عبارة عن كتلة غير طبيعية في الجسم بسبب نمو الخلايا، ويختلف تشخيص نوع الورم على حسب نوع الخلايا، فلو كانت الخلايا شبه خلايا الجسم يبقي الورم حميد، أما لو كانت الخلايا غير طبيعية ومش عارفين يسيطرو عليها ومختلفه بشكل ملحوظ عن خلايا الجسم ، فالخلايا دي للاسف خلايا سرطانية 💔، والورم بيبقي خبيث، وعلشان نحدد لو الورم حميد أو خبيث ، بناخد عينة من الخلايا وبنحللها والتحليل بيحدد نوع الخلايا .
_ الأورام الحميدة:
لو العينة اثبت ان الخلايا مش سرطانية، وأن الورم حميد، فالخلايا والانسجة مش هتنتشر إلى مناطق تانيه في الجسم، ومحصلش ضغط على الأنسجة القريبة، والأعصاب، والأوعية الدموية ولا لها اي ضرر، ومن أمثلة الأورام الحميدة هي الاورام الليفيه الرحميه . واما بنلاقي الورم الحميد مش بنسيبه بنعمله عمليه جراحيه نستأصل الورم دا علشان حجمها ووزنها ميزدش ويضغط علي الانسجه والخلايا اللي جمبه ويسبب اضرار للمريض
_ الأورام الخبيثة:
بتبقي اورام غير طبيعية وبتتكون عن طريق خلايا سرطانية، و بتغزو الأنسجة والخلايا اللي جمبها ، وممكن خلايا سرطانية تتحرك عن طريق الدم أو الغدد الليمفاويه ، وتنتشر إلى أنسجة تانيه داخل الجسم، ودا بيسبب اصابة أماكن كتير بالسرطان زي سرطان الثدي،والأمعاء، والرئة، والدم، والجلد. حتي ممكن يبدأ سرطان الثدي في أنسجة الثدي وبعد كدا ينتشر للعقد الليمفاوية تحت الإبط، ولو مسيطروش عليه في وقت مبكر، بمجرد انتشار سرطان الثدي في الغدد الليمفاوية، ممكن السرطان ينتشر لمناطق تانيه في الجسم، زي الكبد أو العظام مثلا
ربنا يعافينا ويشفي كل مريض سرطان يا رب 🥺❤️

05/03/2022

عمرك سألت نفسك هيحصل إيه لو الأكل اختفىٰ عن العالم كله؟ 🤔
في منكم هيقول بديهيًا إن الإنسان هيتوكل على الله و مش هيكمل حياته،
وفي منكم هيقول نرجع للعصر الحجري ونعتمد على الصيد و أوراق الشجر ونصرف امورنا "طبعا ناس عبقرية بالفطرة 🤓".

طب عمرك تخيلت مثلًا هل ممكن يحصلك حاجة لو مش بتاكل كويس لفترة كبيرة؟
بالضبط، إرهاق و فقدان وزن و قلة تركيز وهكذا...
ودا موضوعنا النهاردة؛ هكلمك عن سوء التغذية واللي أغلبنا مفكر سببه قلة أكل مش أكتر؛ احنا هنحاول نصحح الصورة عن سوء التغذية و نوصلهالك كاملة بشكل صحيح.

مبدأيًا ايه هو سوء التغذية؟

دا ياسيدي عبارة عن ان جسمك مش بيوصله العناصر المهمة والاساسية اللي محتاجها واللي اهمهم الحديد و الفيتامينات زي vitamin D, vitamin A وطبعا معادن تانية كتير، أو إنك بتاكل طبيعي جدًا بس مفيش امتصاص للأكل أو بتستفرغ بسهولة، بالإضافة إن في الأطفال بالذات؛ سوء التغذية بيعمل قلق كبير جدًا لأنه سنويًا أطفال كتير بتموت نتيجة عدم الاهتمام ب العناصر الاساسية ليهم.

طب ايه هي أعراضه؟ 👀
والله يا سيدي انت كـ شخص بالغ مش بتدي جسمك كفايته من العناصر المهمة هتلاقي
-ارهاق و تعب و انك دايمًا همدان و حاسس بخمول
-اكتئاب
-عصبية و بتتعصب من أقل حاجة
-ممكن تلاحظ دم في اللثة لما تغسل اسنانك
- ممكن بيجيلك عدوى كتير زي ان مثلا البرد مش بيلحق يخلص وتلاقيه شرّف تاني🤧
-مناعة الجسم بتقل للأسف ودا عرضه لمشاكل كتير
-وطبعًا جفاف للبشرة و حبوب و تساقط شعر
-هتلاقي الجرح مش بيلتئم بسهولة لأن هنحتاج مناعة و بروتين ومعادن حضرتك
-وأخيرًا فقدان وزن في فترات قصيرة

طب ياعم ماشي لو انت عندك طفل صغير وعاوز تعرف الأعراض،
هتلاقي الطفل بيفقد وزنه بالنسبة لطوله
و هتلاقي بيحصلّه تقزّم زي إنه مش بيطوَل في سن مناسب

تخيل ان كل دا بكلمك عن سوء التغذية بشكل عام و اعراضه ولسة معرفناش الأسباب.. 🤦‍♀️
والله احنا هنقسمها ل ٣ أسباب
- أسباب نفسية: زي ان أنا نفسيتي وحشة ومش جاية ع الأكل خالص
-أسباب مادية و بيئية: زي إن البيئة حواليا مش مساعداني أتغذىٰ صح أو إن مفيش فلوس كفاية عشان أغذي نفسي صح
-أسباب مرضية: زي مشاكل في الجهاز الهضمي أو غيره.

ايه الحل؟؟
حضرتك محتاج ٦ عناصر اساسية ف يومك
-الخضار والفاكهة
-اللبن
-النشويات
-البروتينات الصحية
-الدهون
-شرب الماية بشكل يومي كافي

لو مشاكل مرضية فـ حضرتك محتاج تحاليل و متابعة مع دكتور ودا شئ ضروري.

ولو المشاكل المادية نقدر نختار الأكل الاقتصادي زي الرز و القمح و البقوليات و الأكل اللي نلاقي فيه أعلى قيمة غذائية جسمنا هيحتاجها من غير ما نصرف كتير.

بالنسبة للمكملات الغذائية مينفعش نعتمد عليها كمصدر أساسي؛ ممكن كعامل مساعد لو تَطلّب الأمر؛ طب ليه بقولك كدة؟ لأنك ممكن تعتمد عليها بشكل أساسي وهي كلها فيتامينات و انت مثلا جسمك محتاج حديد فـطبعًا مأدتش الغرض بشكل كامل
بالإضافة لأنها مصدر مش طبيعي زي الأكل الصحي. 🙂

وأخيرًا قبل م اختم كلامي افتكر ان جسمك دا أمانة عندك لازم تحافظ عليها، محدش هيسندك قد صحتك؛ و سوء التغذية حاجة كبيرة لا يُستهان بيها حتى لا تؤدي لمضاعفات سيئة لا قدر الله.
دمتم في رعاية الله❤️

02/03/2022

نلاحظ ف الفتره الاخيره إن الكل بيطمح فى جلد صافى خالى من أى حبوب ودا بيدفع كتير من الشباب لاستخدام منتجات بدون إشراف طبيب متخصص لمجرد إن فيه ريفيوهات كتيره عن جوده المنتج ودا بيؤدي الى نتيجه مش كويسه بعدين طيب ليه أخاطر ؟! 🙆‍♀️
طيب ما أعرف أسباب ظهور الحبوب دى وأتبع خطوات طبيه صحيحه عشان أوصل ل نتيجه مُرضيه ودا إلى هتعرفه معانا ف البوست دا :

أولاً :لازم نعرف ان حبوب الشباب دى بتظهر بشكل كبير لدى المراهقين وغالبا بتذهب اعراضها بعد تجاوز سن العشرين إلا ف بعض الحالات القليله وعشان كدا هى احد علامات الشباب والنشاط ،وهى بتظهر عل شكل حبوب قليله وبعض البثور سواء كانت بيضاء او سوداء وممكن تظهر عل شكل آخر (خرّاجات )ودى بتحتاج استشارة طبيب وجلسات ليزر للتخلص منها أحيانًا،ودى بتظهر بشكل كبير ف أماكن تواجد الغده الدهنيه خاصة الأنف والذقن والجبين ويمكن أن تظهر على الظهر والعنق والصدر عند الإناث.

ثانياً:نيجى بقى للسؤال الاهم والى بيراودنا كلنا ليييه بتظهر الحبوب دى؟!🤔
طبعا هى حالة هرمونية ف المقام الأول عشان كدا بتظهر لدى المراهقين كما ذكرنا سابقاً
السبب الثانى :هو البكتيريا والتى يمكن ان تكون بسبب قلة العنايه بالنظافه الشخصية أو عوامل خارجيه كنوع مستحضرات التجميل التى نستخدمها .
بعض النصائح من الضرورة معرفتها عند ظهور حب الشباب :
١-فقع البثور بحصرها والضغط عليها بالأظافر قد يسبب المزيد من الالتهاب وحتى أنه قد يترك ندوبًا ف الوجه .
٢-التعرق بشكل كبير بسبب الملابس وخاصة الضيقه منها تؤدى الى ظهورها بشكل كبير لذا عليكم ارتداء الملابس الفضفاضه .
٣-بعض المنتجات الطبيةمثل :بعض أدوية علاج الصرع والمراهم المستخدمه لعلاج الأكزيما ،وف هذه الحالة يجب استشارة طبيبك المختص.
اسأل مجرب ولاتسأل طبيب ✖️
اسأل طبيب ولا تسأل مجرب لإن مش كل شئ ينفع لحد ينفع ليك ✔️
دمتم سالمين

28/02/2022

مساء الخير ..
٣٥٢٢ عامً علي اكتشاف مرض السكري .
مرض السكري هو من أقدم الأمراض الإنسانية🤕
منذ العام ١٥٥٠ قبل الميلاد وصفه التاريخ المصري ف مخطوطات اكتشفت عام ١٨٦٢ بواسطة علماء الآثار.
¶ كلمة السكري (diabetes ) فهي اغريقية تعني (المرور من خلال ) بمعني الشخص الذي ينتج كمية كبيرة من الماء مشبعة بالسكر كالعسل. وقد وصف علي يد عالم يوناني ف القرن الثاني قبل الميلاد وصفاً دقيقاً يشبه النوع الأول من المرض ف وقتنا الحالي والذي يعتمد ف علاجه ع الأنسولين.
بين القرنين الخامس والسادس لاحظ طبيب هندي أن بول مريض السكري يجلب النمل والحشرات وفرق أيضاً بين نوعين من السكر إحداهما يصيب الكبار وأصحاب الاوزان الكبيرة والآخر يصيب صغار السن من أصحاب البنية الضعيفة.

•أما الأنسولين فنحن نحتفل بعامه المئه 100🥳
فقداكتشفه فريق ف تورنتو بكندا فقاموا باستئصال بنكرياس الكلاب وحقن عصارتهم وإجراء تعديلات عليه وبالفعل نجح و بالتجربة ع حيوانات اخري كالبقر يليها الإنسان. فأول إنسان يُحقن بالأنسولين هو الطفل طومسون.

¶أما عن سبل الوقاية هي:
-العمل علي بلوغ وزن صحي والحفاظ عليه.
-النشاط البدني واتباع نظام صحي للحد من المواد السكرية والدهون المشبعة. فيصبح صديق إذا تمت مراقبته وإلا يؤدي إلي مضاعفات مزمنة ف الجسم كتصلب الشرايين وأمراض القلب والسكتة الدماغيه
،ارتفاع ضغط الدم واعتلال الدورة الدموية الطرفية
،التأثير النفسي والاجتماعي السلبي ع المصاب به.
فهل وصل العلم للحل النهائي لمرض السكري دوناً عن النظام الصحي ؟؟🤔
شاركونا في الكومنتات عن تجاربكم مع اهلكم و مرض السكري !

26/02/2022

مساء الخير ❤️
هل هلال الترم التانى . رجعنا للمحاضرات والسكاشن والصحيان بدرى تانى😔 . نتمنى إن شاء الله يكون ترم سعيد علينا جميعا ونحقق فيه كل اللى نتمناه والتقديرات اللى نتمناها 🤲. بس خلينا نطلع كده برا الهم ده كله خلينا نطلع برا الصندوق ونتكلم عن حاجة مهمة جدا وهى الرياضة !!!👊💪
مبدأيا كده كلنا عارفين أن الدراسة بترهقنا ذهنيا ونفسيا وجسديا وبتخلينا قاعدين أوقات كتير فى البيت . لكن سؤال بسيط هل ده صح ؟! للأسف لا مش صح خالص لازم نشغل نفسنا بحاجة بجانب دراسة الكلية عشان مينفعش أن حياتنا تتمحور حول حاجة واحدة بس .
الحاجة دي هي ممارسة الرياضة بانتظاااام . هتقولى ازاي بس الرياضة بتحتاج وقت . هقولك بالعكس انت لو فى اليوم الواحد مارست رياضة لمدة ساعة ونص مش هتخسر وقت خالص . مينفعش أن وقت فراغك يكون عبارة عن سوشيال ميديا بس السوشيال ميديا هتصدرلك طاقة سلبية أما الرياضة هتحرر الضغط من عليك وهتشيل منك الطاقة السلبية وهتحس دايما انك فرحان أنك بتعمل حاجة مفيدة لجسمك وحاجة بتقوى بيها جسمك وتطول بيها عمرك وتخلى صحتك أحسن وأحسن .
الرياضة طبعا مش محتاجين نقول أن أشكالها وأنواعها كتير ممكن تنزل حجز كورة عادي جدا أو تنزل جيم أو تمارس رياضة قتالية أو أى رياضة فردية براحتك المهم تبعد عن حوار أنك متقعدش فى البيت كتير لو حتى هتنزل تجرى ساعة بس هتبقى مفيدة ليك جدا وطبعا منقدرش نتكلم عن الرياضة من غير ما نختم بقول عمر بن الخطاب رضى الله عنه كتب إلى أهل إلى أهل الشام : " أن علموا أولادكم السباحة والفروسية "
اكتبولنا في كومنت لو بتمارسوا اي رياضة و الرياضة دي ايه ؟!
ودمتم سالمين

24/02/2022

اتكلمنا عن مواضيع متعلقة بالدراسة طول اسبوعنا ده بمناسبة العودة للدراسة
و دلوقتي جه الوقت نتكلم شوية عن صحتنا النفسية وازاي نعرف عنها و نقدر نواجه مشاكلها أول بأول ❤️
دلوقتي جه دورنا نتكلم عن اعراض نوبات الهلع ..
وافتكر دايما انك منين ما تحس انك محتاج مساعدة ، إوعى تتردد في طلبها من اي متخصص !!
و دمتهم سالمين ..

23/02/2022

مساء الخير ❤️
أغلبنا اول ما بيصحى من النوم بيدور على موبايله، لما بنحس أننا مش عارفين ننام بنمسك الموبايل، لما بنلاقى نفسنا فاضيين و مش لاقيين حاجة نعملها بنقلب فى مواقع السوشيال ميديا.

_يؤسفنى عزيزى القارئ انى أقولك انك ممكن تكون مصاب بإدمان السوشيال ميديا📱
ممكن متكونش حاسس ب ده لأن حالات الإدمان بتخليك تفقد احساسك بالوقت و الساعة البيولوجية بتاعتك بتمر أبطأ من العادة فبتقضى أغلب يومك على السوشيال ميديا من غير ما تحس. طب و إيه المشكلة يعنى؟

_ اكيد عدى عليك أوقات حسيت فيها انك فاقد الشغف، مزاجك بيتغير كل شوية، حاسس انك وحيد و معندكش طاقة للتعامل مع البشر، حاسس ان حياتك كئيبة و فاضية معملتش فيها حاجة مميزة..،إلخ. ممكن ادمانك للسوشيال ميديا ميكونش السبب الوحيد لكنه من أهم الأسباب إن لم يكن الأهم🤷‍♀️

_إدمانك للسوشيال ميديا بيضيع عليك فرصة اكتشاف نفسك، بمعنى إنك معندكش وقت تعرف هواياتك اللى انت موهوب فيها و تنميها فى أوقات فراغك،كمان أحيانا بيسببلك حالة من ال"social anxiety" اللى عادة بتخليك تفضل الانسحاب من التواصل وجه لوجه و بتقلل ثقتك فى نفسك. فى دراسات أثبتت كمان أن ادمان السوشيال ميديا له ارتباط بأعراض اضطراب نقص الإنتباه و فرط الحركة (ADHD). طب ايه الحل؟

_حاول تتعرف على ناس جديدة و تتواصل أكتر مع أهلك و أصحابك فى الواقع
_اكتشف ذاتك و مارس الهوايات اللى بتحب تعملها زى الرياضة أو الرسم،... إلخ
_اتطوع فى الأعمال الخيرية و الأنشطة الطلابية اللى ممكن تستفيد فيها من وقتك
_تقدر تحذف التطبيقات اللى بتستخدمها لأوقات طويلة
_يفضل متخليش موبايلك جنبك فى كل مكان حاول تبعده عنك

و أخيرا قولنا فى الكومنتات ايه الهوايات اللى بتحب تعملها فى أوقات فراغك بعيد عن الموبايل؟
دمتم سالمين

21/02/2022

داخلين الترم التاني وهنرجع تاني للدراسه وكلنا طبعاً كتله من الحماس والنشاط 🤡
وكمان هيرجع معانا ف الدراسه الكسل وحب النوم وزنقه الامتحانات 👈👉

طب إيه السبب؟؟! ليه الكسل بيكون ف الدراسه لكن لو صاحبك قالك يلا ماتش كوره هووووب علطول تلاقيه ف الملعب !
_اول واهم سبب بنتغافل عنه هو سوء التغذيه وبالذات وجبه الفطار ال معظمنا بينساها ال ممكن يعمل أنيميا
_ الماء..عدم شرب الماء الكافي دا ممكن يزود مسلك
_السهرر لأوقات متاخره ام الموبيل واللاب 💻
_قله الحركه ..لازم نحافظ علي لياقتنا عشان منتكاسلش
_ممكن الكسل ينتج عن سبب نفسي وهو الشعور بالفشل وان الناس ال حواليك تقلل من قدرتك..

¶طب الترم التاني جه وعايزة أتغلب علي الكسل ازااي؟!
_طبعاً أهتم بالتغذية الكويسه واشرب الماء الكافٍ واهتم بالرياضة 🏃‍♂️
_احرص أن يكون عندك الاراده القويه عشان تبدأ مذاكره مع وجود فترات راحه ونوم كافٍ عشان متملش من المذاكره ومتتزنقش ف فتره الامتحانات🙆‍♀️
_ابعد عن الموبيل وانت بتذاكر ..معلش حاول (ممكن تنزل ابليكشن زي Detox )دا بيخليك متعرفش تفتح الموبيل خالص وبالتالي تقدر تذاكر براحتك ي معلم 😎
_متنساش أول حاجه انك تستعين بالله عشان تقدر تتغلب علي الكسل
دمتم سالمين🤲❤️
ابقوا قولولنا ازاي بتعرفوا تواجهو الكسل في الدراسة في الكومنات !

Future Doctor

21/03/2022

14/03/2022

12/03/2022

09/03/2022

07/03/2022

05/03/2022

02/03/2022

28/02/2022

26/02/2022

24/02/2022

23/02/2022

21/02/2022

Address

Telephone

Website

Alerts

Contact The Practice

Shortcuts

Share

Category

Listing takedown request