18/06/2026
❤️ دفعة 2026 ❤️
بصراحة... أنا مش عايز أتكلم النهارده كدكتور، أنا عايز أتكلم كأخوكم الكبير اللي عاش معاكم سنة كاملة.
شفت تعبكم، وفرحتكم، وقلقكم، وضحكتكم... وشفت ناس بدأت وهي خايفة من المادة، ودلوقتي بقت تحل وتناقش وتفهم.
الفترة اللي فاتت ما كانتش مجرد حصص أحياء أو جيولوجيا، دي كانت أيام عشناها مع بعض، ذكريات ومواقف وهزار وضغط ونجاحات كتير... والحمد لله ربنا كرمنا.
وعايز أقولكم حاجة مهمة جدًا:
📌 متشغلوش بالكم بالأحياء دلوقتي.
ركزوا في باقي المواد اللي محتاجة وقتكم، والأحياء بإذن الله هنجمعها مع بعض في ليلة الامتحان زي ما اتعودنا، وهتدخلوا الامتحان وأنتم مطمنين.
اللي مطلوب منكم دلوقتي:
✔️ حافظوا على هدوئكم.
✔️ ثقوا إن كل دقيقة تعبتوا فيها طول السنة مش هتضيع.
✔️ افتكروا إن ربنا لا يضيع أجر من أحسن عملًا.
أنا فخور بكل واحد فيكم...
سواء كنت من الأوائل، أو لسه بتحاول تلحق نفسك في آخر الوقت.
لأن مجرد إنك وصلت لحد هنا وكملت المشوار، فدي حاجة تستحق الاحترام.
ولو كنت قصرت مع حد في يوم... فـ سامحوني.
ولو كنت قدرت أساعد حد، أو أكون سبب في درجة حلوة، أو حتى سبب في إن حد يحب المادة...
فده من فضل ربنا عليّ قبل أي شيء.
أسأل الله أن يفرح قلوبكم وقلوب أهاليكم يوم النتيجة، وأن يحقق لكل واحد فيكم الحلم اللي بيتمناه.
🤍 هتوحشوني يا دفعة 2026.
وافتكروا دايمًا...
إنكم مش مجرد طلاب عندي، أنتم إخواتي. ❤️
🌹 أخوكم / د. أحمد فايد 🌹
