24/07/2026
رسالة لكل الطاقم الطبي
هحكي ليكم قصة كلكم عايشينها
النهاردة في الجامع بعد صلاة الجمعة سمعت الناس بتنادي بأعلي صوت .. دكتور .. دكتور ... لقيت فجأة الناس متجمعه حوالين رجل خمسيني مغمي عليه
و الناس بتقول أشهد أن لا إله إلا بالله وأن محمدا رسول الله
اتحركت بسرعه و الحمد لله تم التعامل مع حالة الطوارئ و بفضل الله الراجل فاق و استقرت حالته ...
الموقف ده بفضل ربنا عليا أنا متعود عليه سواء في طيارة أثناء سفري أو مطار أو علي طريق
و أثناء الموقف ده بتكون دعوات الناس اللي احنا عايشين بيها
و إن ربنا جعلك سبب لأي خير ما دام فيك القوة لكده
الرسالة هنا لزملائي .. إن في الموقف ده مش هيفيد فيه وجود مغني مشهور 🏆 أو لاعب كرة قدم ⚽️
و من أحياها فكأنما أحيا الناس جميعا
ده موقف عادي جدا أي فرد من أفراد الطاقم الطبي اللي بيتواجد في عمله متعود عليه في الاستقبال و الطوارئ و يجيد التعامل معاه
الطب حياة القلوب 💕 و أعني هنا الطب بما يشمله من طبيب أو صيدلي أو فني أو تمريض
المواقف دي اللي بتخليك تستحمل و تكمل
و أنا متأكد إن كل واحد منكم عنده قصص و مواقف جميلة كتيرة
اللي ممكن يشاركها معانا
