23/12/2020
بتستغرب ليه سنك صغير وضهرك واجعك
آلام أسفل الظهر الحاده ..
🌸آلام اسفل الضهر من اكتر الأمراض الي بتصيب عامه الناس,, تقريبا ٧٠ - ٨٠ % من البشر جالهم الم في اسفل الظهر على الأقل مره واحده في حياتهم ..
🌸أسفل الظهر تعريفه هو اي الم تحت الفقره الصدريه ١٢
( بالبلدي تقريبا من تحت الضلوع على طول لحد اخر جيب البنطلون كدا )
هنتكلم عن الآم الضهر الحاده acute low back pain ..
ودي الالم بيكون فيها اقل من شهر فيه تقسيمات تانيه على حسب مده الآلام بس مش مكانها دلوقتي
ممكن يجي مع تسميع في الفخذ من الخلف أو حتى تنميل تحت الركبه أو شد في العضلات الخلفيه أو السمانه ..
هنسأل الاسئله اللي الطب المقارن بالدليل evidence based medicine سألهم وهنجاوب عليهم ..
يلا بينا
السؤال الاول ..
- هل لازم اعمل اشعه سواء عاديه أو مقطعيه او حتى رنين مع الام الضهر الحاده ؟
الاجابه.. لا مش لازم إلا ف حالات معينه خطيره زي عن عن عدم التحكم في البول أو تنميل شديد في الرجلين ..
اه مش لازم تعملها بس مش غلط تعملها .. الموضوع راجع لتفضيل الدكتور بعد الفحص الطبي على المريض
س ٢ : ما هو العلاج المناسب لألم الضهر الحاد؟
ج : فحصنا المريض وعملنا إشعات وتحاليل واطمنا أن دا الم ضهر بدون سبب تاني خفي nonspecific low back pain . ودا تقريبا الغالبية العظمى من الحالات .. يبقى هننصح بالآتي ..
١- نطمن العيان ونديله التعليمات المظبوطه
٢- نرتاح ف البيت ولو الالم شديد جدا ممكن ف السرير يوم او اتنين ولكن مش اكتر من كدا
٣- لو الشغل بسيط ممكن ننزل الشغل بحساب
٤- نوصف للعيان بعض المسكنات ومضادات الالتهاب وباسط للعضلات لفتره معينه ..
س ٣ : امتى تقلق ؟
ج٣ : ١- لو الألم طول ل ٦ شهور وبدأ يأثر على العيان نفسيا وعضويا ويدخله ف نوبات قلق و ممكن مشاكل قواميه هنا المريض بيحتاج تأهيل نفسي وتعليم للمرض بتاعه اكتر منه علاج دوائي أو طبيعي ..
٢- بدأت تظهر اثار ضغط على الأعصاب أو تنميل ودي ليها كلام بعد كدا أن شاء الله ..
س٤ : تتعالج ازاي ؟
ج : خلاص كشفنا ع المريض ،، اطمنا ان مفيش سبب خفي للألم دا ،، طمناه وراح شغله ..
هنا بيكون العلاج ف ايد المريض مش الدكتور ،، لأن الالم مع الوقت هيخف وكمان هنرجع نعمل اللي كنا بنعمله زمان وهيرجع الالم يرجع تاني ..
العلاج بأختصار ..
علاج دوائي راحه علاج طبيعي تأهيل نفسي وتوجيه المريض ..
بالنسبه للي بيلعبوا تمارين مقاومه .. لو ضهرك وجعك ..يبقى فيه حاجه غلط ..
التكنيك غلط ومش لازم ف تمارين الضهر على فكره .. انت ممكن ضهرك يوجعك وانت نائم على ضهرك وبتلعب بنش مسطح او ساند ضهرك وقاعد بتلعب كتف دامبل. .
( انا ٩٥ الميه من اللي بيلعبوا ف الجيم قدام عيني بيلعبوا غلط )
او الحمل زايد ومش مناسب مستواك أو مش بتسخن كويس أو معندكش مرونه ف عضلات الخلفيه فمأثره على اسفل الضهر ..
أو عندك ضعف ف عضلات المؤخره الـ glutes ف اسفل الضهر بيحمل اكتر من المطلوب .. ..
المهم .. لو ضهرك وجعك وانت بتتمرن ركز على السبب و حاول تقي نفسك منه مش العلاج ..
دمتم بخير .
🌸🤍
