07/05/2021
.. البوست دا ملحمي طويل فيه كل حكاية الانسولين تفصيلا وببساطة.. اللي هيستفيد محتاج دعوة بظاهر الغيب فضلا وليس امرا. . من اهم الحواديت.. حدوتة الانسولين ببساطة وبطربقة عمله وسعره والفروق بين انواعه. . الانسولين حياة للبعض ولا يمكن الاستغناء عنه او ايقافه تحت اي ظرف... الانسولين هو العلاج الوحيد المتاح حاليا للنوع الاول من السكر ودا النوع اللي بيحصل فيه خلل في جهاز المناعة بدون سبب واضح بيدمر خلايا بيتا المفرزة للانسولين وبالتالي بيبقي لازم ندي الانسولين من الخارج والنوع دا بنلاقي فيه انخفاض حاد في وظايف البنكرياس c. Peptide وارتفاع في نسبة الاجسام المضادة للبنكرياس واشهرهم anti GAD 65 وان كان 20 بالمية من ابطال النوع الاول عندهم الاجسام المضادة سلبية وبيتشخصوا اكلينكي فقط... الانسولين احد العلاجات المتاحة لمرضي النوع الثاني من السكر في بعض الحالات..
1.لو المريض لسه متشخص بالسكر وعنده التراكمي اكتر من 10 بالمية وعنده catabolic manifestation بمعني خاسس جداا وجسمه اتشفط بالبلدي كدا او جاله اسيتون بالبول ودي علامة نقص حاد في الانسولين او عنده مضاعفات سكر شديدة من البداية زي مشاكل القلب والشبكية والكلي والاغصاب او سكره في المجمل اكتر من 300مجم او عنده ارتفاع شديد بالدهون الثلاثية TG.
2. لو مريض كان ماشي علي اقراص بالفم ووصل للجرعة القصوي في دوائين او اكثر وعلي الرغم من كدا التراكمي اكتر من 8.5 بالمية مريض مثلا وصل ل 8 مجم اماريل مع جليبتس بلس 1000 مرتين والتراكمي 9 بالمية هنا مافيش فرصة لادوية فم اخري كدا بنكرياسه بيستغيث بك ترحمه خلاص وصل لانهاك تام ادي الي فشل تام في افراز الانسولين beta cell failure... مهم اوي تبقي عارف كطبيب وكمريض ان لو مريض نوع تاني اخد انسولين مش شرط استمراره عليه مدي الحياة ولا حاجة ممكن تبقي مرحلة راحة للبنكرياس ويرجع تاني للاقراص وممكن لا المهم تعرف ان الاساس هو متابعة قياس السكر باانتظام. . دي انواع الانسولين كلها بس ناخد بالنا في الاطفال خصوصا وفي النوع الاول عموما مابنستخدمش المخلَوط مسبقا premixed insulin زي الميكستارد واخواته وكل عام وانتم بخير. . الانسولين اهم دواء لعلاج السكري في التاريخ والوحيد اللي قادر ينزل السكر التراكمي اكتر من 3.5 بالمية من اول مرة تم استخدامه فيهم من عام 1922 وحتي الان..
-اولا فى فرق بين امبولات الانسولين vial وكل امبول بيبقى فيه 10سم وكل 1سم فيه 100 وحدة يعنى الامبول 1000 وحدة وبيتم اعطاءه بسرنجات الانسولين 50 و100 و30 حيث ان سرنجات 50 و30 الشرطة فيها بوحدة انسولين لكن السرنجة 100 الشرطة بوحدتين ودي معلومة مهمة جدا...وهى تعمل بكفاءة لمدة شهر بعد فتحها لو في درجة حرارة الغرفة و 3 شهور لو اتحفظت صح في الثلاجة وتوضع فى باب الثلاجة بعيد عن الفريزر ويتم اخراجها قبل اعطاءها بنص ساعة حتى تاخد حرارة الغرفة.
-انما خراطيش القلم cartridges دى بتحتوى على 3سم من الانسولين ب300 وحدة وهناك انواع من الخراطيش ممكن تركب على اى قلم انسولين وانواع اخر لها اقلام محددة.
-الخرطوشة يتم تغييرها بعد 28 يوم من الاستخدام حتى لو ماخلصتش ماعدا ترسيبا ممكن يفضل حتي 8 اسابيع من فتحه حوالي 56 يوم والتوجيو برضه ممكن يوصل ل 6 اسابيع من فتحه.
-قلم الانسولين لا يوضع بالثلاجة طالما فى حيز الاستخدام لان دا بيعمل صدء فى السوستة وبالتالى لا يعطى الجرعة بكفاءة ودا بيعمل مشاكل كتير توصل احيانا للاسيتون والحموضة بالدم ودا في درجات الحرارة اللي اقل من 30 ايام الشتا انما ايام الصيف والحر دا لازم يتحط في الثلاجة ونطلعه قبل الاستخدام بنص ساعة ويفضل يوضع في باب الثلاجة بدون السن الخاص به حتي لا تدخل فقاعات هواء ممكن تسبب صدء السوستة او مشكلة في خروج الانسولين.
-علمات تلف الانسولين تشتمل على تعرضه للتجميد والتعرض المباشر لاشعة الشمس ووجود شوائب عالقة ورواسب به وتغيير لونه عن المعتاد او انه مابيضفش جديد يعني السكر بعد اعطاءه نفس القيمة قبل اعطاءه.
-انواع الانسولين المتاحة فى مصر تجاريا من حيث وقت بداية العمل وقمة العمل وفترة العمل:
1.انسولين مائى او قصير المفعول regular insulin:
يبدا عمله بعد نصف ساعة لساعة ودي مهمة جدا لازم تعرفها كدا لازم تحقنه قبل الاكل بنص ساعة يوصل قمة عمله بعد ساعتين ل 4 ساعات ودي برضه مهمة لازم تاخد وجبة خفيفة وقت قمة عمله اللي ممكن تبقي ممتدة من ساعتين لاربع ساعات وبيغطى من 6 الى 8ساعات واشهر انواعه actrapid ودا متوفر فيه سرنجات واقلام وسعر الامبول 55 جنيه و ال humilin R ودا اقلام فقط وال insuman R ودا اقلام فقط ودا بيتاخد 3 مرات قبل الوجبات وفى المصرى بتاع سيديكو insulin H R وممكن صيغة الاقلام منهم تركب علي اقلام novopen 4 المتاحة عندنا و novopen 5 اللي لسه مستنيانه وتصرف مجانا في التامين.
2.نظير الانسولين سريع المفعول rapid acting analogue:
يبدا عمله بعد 15 الى 20 دقيقة ودي مهمة جدا معني كدا ممكن يتاخد قبل الوجبة او اثناءها او بهدها في صغار السن او اللي اكلهم مش منتظم ويوصل الى قمة العمل بعد 60 الى 90 دقيقة ويغطى حتى 3 الى 5 ساعات واشهر انواعه novorapid و humalog و apidra كل واحد فيهم تبع شركة مختلفة وكلهم متوافر فيهم اقلام فقط قلم خاص بكل نوع على حدة ودا بيتاخد 3 مرات قبل او اثناء او بعد الوجبات.. قلم ال humalog في منه بالنص وحدة لونه اخضر اسمه luxura وفي القلم العادي بيدي وحدة kwik pen وسعر القلم 112 جنيه والخرطوشة اللي بتتغير ب 92 جنيه وفي حاليا تركيز 200 يعني الواحد ملي فيه 200 وحدة مناسب للي جرعاتهم عالية. . قلم النوفورابيد المتاح عندنا في مصر بالوحدة فقط اسمه flexpen سعره 95 جنيه وفي منه نص وحدة ممتاز بس كان متاح عندنا novo pen Echo فترة واختفي تاني. .. قلم الابيدرا هو قلم all star او solo star وسعر القلم 70 جنيه والخرطوشة اللي بتتغير 63 جنيه. .ملحوظة في نوع لسه مش موجود عندنا في مصر النظاير فائقة السرعة هايل اسمه Ultra short acting insulin او FIASP دا النوفورابيد المعدل بيشتغل بسرعة جدا وفي وقت قمته بيوصل ضعف تركيز النوفورابيد العادي ممكن يتاخد قبل الوجبة بدقيقتين لحد بعد الوجبة بعشرين دقيقة ويشتغل بكفاءة... في انسولين الاستنشاق affreza ودا نوع سريع جدا برضه بيجي في بخاخ زي بخاخ الحساسية متاح في امريكا فقط ولا يصلح لمرضي حساسية الصدر او امراض الصدر المزمنة وعيبه ارتفاع سعره وانه مش موجود منه كل التركيزات تعديل جرعاته صعب جداا بس بيستخدموه بكفاءة في تصحيح ارتفاع السكر.
3.انسولين معكر او متوسط المفعول :
دا بيبدا عمله بعد ساعتين الى 3 ساعات ويصل الى قمته فى حوالى 4 ل 8 ساعات وبيغطى من 12 الى 16 ساعة وغالبا بيتاخد مرتين صباحا ومساءا وبعض الاوقات 3 مرات وخصوصا فى الاطفال دون سن الثلاث سنوات.
ودا انواعه المتاحة insultard دا منه سرنجة وقلم وفى humilin N و insuman basal اقلام فقط والمصرى insulin H NPH وسعره 55 جنيه للامبول ويصرف مجانا من التامين. . النوع دا ميزته بيستخدم من سن يوم عادي وسعره في المتناول وبيتصرف مجانا في التامين.. عيوبه قمة عمل عنيف خصوصا بالليل ممكن تعمل هبوط مسائي.. تذبذب الاداء glucose variability بمعني اختلاف الاداء من يوم للتاني يعني بنفس الجرعة يوم مظبوط ويوم عالي ويوم منخفض السكر.
4.انسولين طويل المفعول وهو احد نظائر الانسولين:. يوجد منه اقلام اللانتوس solostar ودا بيبدا عمله بعد ساعتين وله قمة عمل بعد 8 ل 12 ساعة ودي معلومة جديدة مهمة تسبب هبوط اثناء النوم في بعض الاطفال وبيغطى 24 ساعة احيانا ولكن فى بعض الاحيان لا يصل ل 24 ساعة ويتم تقسيمه كل 12 ساعة ودا بنلاحظه مع ارتفاع معدلات السكر قبل العشاء مع انضباط الصايم وقبل الغدا او ان الطفل يجيلوه هبوط صباحي وسكره باقي اليوم مظبوط وفيه عيب اخر متعب لبعض الاطفال انه مؤلم جدا عند حقنه لضرورة عمله في وسط قاعدي وسعر القلم الواحد 126 جنيه يصرف في التامين الصحي بااسعار تتراوح بين 5 ل 20 جنيه للخرطوشة ودا حاجة جميلة ومسموح استخدامه من عمر سنتين. موخرا يوجد منه نوع يحتوى على 300 وحدة فى ال1سم اسمه toujeo وبه 450 وحدة حيث ان القلم 1.5سم.وهناك نوع غير متاح بمصر solostar max فيه 900 وحدة في 3 سم ودا نفس مادة اللانتوس الفعال الجلارجين بس مكثفة وبيشتغل لحد 36 ساعة فبالتالي لا يقسم وممكن يتاخد قبل او بعد موعده المحدد ب 3 ساعات خلاف اللانتوس لازم نفس موعده ومعدل الهبَوط فيه قليل لوجود قمة عمل لا تذكر.. سعر توجيو 220 جنيه للقلم ومتوافر بعض مناطق التامين الصحي ب 50 جنيه فقط ومسموح استخدامه بعد سن 6 سنوات.
-هناك ايضا اقلام الليفمير levemir اسمها flexepen ودا بيبدا عمله بعد ساعة الى ساعتين ويوصل قمته بعد 4 ل 7 ساعات ويغطى 20ساعة وعشان كدا فى الاطفال بيتاخد مرتين بس فى الكبار بيتاخد مرة واحدة لانه مع علو جرعته يزداد مدة عمله وميزته مسموح بااستخدامه اول سنة بالعمر وفي الحوامل وسعر القلم حوالي 157 جنيه.
-هناك ايضا مؤخرا اقلام الترسيبا tresiba والقلم بتاعه اسمه flex touch وفى منه تركيز 100وحدة بالملى و200وحدة بالملى وال 200 دا مش عندنا في مصر لسه ودا مختلف انه بيغطى لحد 42 ساعة وبيبدا عمله بعد ساعة لساعة ونصف وقمة عمله لا تذكر وعلى الرغم من انه بيتاخد يوميا بس فى انسيابية فى تغيير موعد الجرعة ممكن فرق الساعات بين جرعتين من 8 ل 40 ساعة مع معدلات اقل في الهبوط وخصوصا اثناء النوم بس بياخد من 4 ل 5 ايام عشان يوصل لتركيزه الفعال في الجسم وسعره غالي جدا 269 جنيه للقلم ومتوافر في اماكن تامين صحي ب 25 جنيه للقلم.
-اخر نوع يستخدم فقط فى النوع الثانى مش مناسب للاطفال خصوصا ولا للنوع الاول عموما اللى هو الانسولين المخلوط premixed:
-فى منه المخلوط العادى حيث كل 10 وحدات فيها 7معكر و3 مائى بيسموه 70/30 ,ودا اهم انواعه mixtard سرنجات واقلام وhumilin mix و insman comb ودول اقلام فقط وفى المصرى بتاع سيديكو insulin H mix .-فى كمان النظائر المخلوطة دى بنسميها premixed analogue ودول زى ال humalog mix وفى منه تركيزات 50/50 و75/25 والقلم بتاعه اسمه kwikpen.
-وكمان النوفو ميكس novomix وتركيزاته 70/30 و50/50 وقلمه flexpen.. يعتبر Biphasic ثنائي المفعول فيه جزء سريع بيشتغل علي الوجبة اللي بتاكلها وجزء متوسط المفعول اللي بيظبط السكر بين الوجبات.. في انواع 30/70 يعني السريع 30 والمتوسط 70 وفي انواع 50/50 ودا السريع 50 والمتوسط 50 وفي 25/75 نفس الفكرة.
النظائر دى ممكن تتاخد قبل واثناء وبعد الوجبة.. اسعار الانسولين المخلوط.. الميكستارد الامبول 10 ملي ب 55 جنيه.. الانسولينا ايجبت الامبول 4 ملي ب 26 جنيه وال 10 ملي ب 48 جنيه.. الانسولين H mix الامبول 10 ملي ب 48 جنيه.. الانسولين النظاير ال novomix تركيز 70/3 والتركيز 50/50 سعر القلم 127.5 جنيه وبيستخدم ويترمي والخراطيش اللي علي اقلام بتتغير الخرطوشة 3 ملي ب 55 جنيهَ.. النظاير humalog mix سواء تركيز 25/75 او 50/50 سعره 137.5 للقلم والخراطيش اللي بتتغير 102 للخرطوشة. .. اخر نوع نزل في مصر هو RYZodeg ودا انسولين خليط نظاير سريعة مع نظاير قاعدي بنسبة 70/30 بمعني كل 10 وحدات منه فيه 3 وحدات نوفورابيد و 7 وحدات ترسيبا وممكن يتاخد مرة لمرتين في اليوم والاصل مرة واحدة قبل الوجبة الرئيسية وسعر القلم 300 وحدة ب 285 جنبه.
-دى كانت معلومات اولية بنعتبرها فرشة لاى دكتور قبل مايفكر يتعامل مع اى نوع انسولين او يخاف منها.
-حياتنا كلها تابوهات دايما بتخوفنا بس لما بنفتحها بنندم على الوقت اللى ضيعناه فى خوفنا منها.. مرفق صور لمعظم الانواع المتاحة في مصر... اللي استفاد محتاج دعوة فقط من حضرتك بظهر الغيب وشكرا.
