30/03/2026
الالتهاب السحائي او الحمي الشوكيه:
كلام كتير بنسمعه اليومين دول،
مبدئيا،
مفيش وباء، ولا أي حاجة تخوف،
وزارة الصحة سنويا مع دخول المدارس بتطعم الأطفال في أولى ابتدائي، تالتة ابتدائي، أولى اعدادي، وأولى ثانوي،
ودة اجراء بيتم من سنين، وطبيعي ومفيش منه أي قلق،
والوقت ثابت لضمان تطعيم أكبر عدد ممكن في بداية الدراسة، عشان نسبة الغياب تكاد تكون معدومة.
نعمل إيه عشان نتطمن؟
الالتهاب السحائي، أو الحمى الشوكية دة مرض ممكن يسببه بكتيريا، أو فيروسات، أو حتى فطريات كتير..
أخطر نوع في الأطفال هو اللي بتسببه بكتيريا المكورات الرئوية(pneumococcal) ، ودي ليها تطعيم مهم - للأسف مش موجود في جدول التطعيمات الإجبارية لوزارة الصحة - واحنا دايما بنفكركوا بيه عند عمر شهرين، و٤، و٦ شهور و جرعه منشطه عند 12 الي 15شهر
النوع اللي بعده، هو اللي بتسببه الانفلونزا البكتيرية(Hib) ، ودي موجودة في تطعيم الصحة برده عند شهرين، و٤، و٦شهور و جرعه منشطه عند 15شهر،
وأقلهم خطورة هي البكتيريا السحائية - اللي عليها كل الكلام دة-،
كمان من أهم طرق الوقاية اللي لازم نعلمها لأطفالنا:
-غسيل الايد كويس،
-تغطيه الأنف، والفم عند العطس،
-ممارسة الرياضة، والأكل الصحي،
ومحاولة تجنب الاماكن الزحمة
طيب إيه هي أعراض الحمى الشوكية:
الأعراض المبكرة تشبه كتير أعراض الأنفلونزا. لكن بتتطور في خلال فترة قصيرة، ما بين ساعات إلى يوم واحد أو يومين.
من أهم الأعراض دي:
- ارتفاع درجة الحرارة الشديد
- الصداع الشديد
- تصلب الرقبة
- تغير في مستوى الوعي والتركيز.
- الغثيان، والقيء المصحوب بالصداع - الإصابة بنوبات من التشنجات - الحساسية الشديدة من الضوء
الأعراض بتختلف شوية في حديثي الولادة:
- ارتفاع درجة الحرارة الشديد،
- البكاء المتواصل وصعوبة تهدئته،
- النوم لأوقات طويلة،
- عدم القدرة علي الرضاعة، - بروز في اليافوخ "المنطقة الطرية في رأس الطفل"،
- تصلب الجسم، - نوبات تشنج،
طيب إيه الجديد السنة دي؟
ببساطة نوع التطعيم..
لحد فترة قريبة جدا التطعيم اللي كان موجود في مصر هو النوع اللي بيتاخد عند عمر سنتين وبيتكرر كل سنتين ل ٣ سنين؛ عشان كدة الجدول اللي الصحة عاملاه لطلبة المدارس،
دلوقت بقى موجود تطعيمين جداد، واحد ممكن يتاخد اعتبارا من عمر شهرين، وواحد من ٩ شهور،
المميز فيهم إن بعد ماجرعاتهم تخلص مش محتاجين نكررهم كل سنتين أو تلاتة زي القديم،
بس لازم نراجع مواعيدهم مع الطبيب عشان ميتعارضوش مع تطعيمات الصحة، أو المكورات الرئوية.
لو طفل اتطعم التطعيم القديم، ممكن بعد مرور سنة على آخر جرعة ياخد جرعة واحدة بس من الجديد، ومياخدش تاني
