29/07/2026
اللى أطفالهم بيسخنوا كتير كل شوية ياريت يشوفوا الحاله دي كده 👇👇
جالنا فى عيادة بنى عدى طفلة جميلة اسمها مريم عندها ٣ سنين بسخونيه تقعد من ٣ إلى ٧ أيام وتختفي والبنت تقعد ٣ أسابيع كويسه جداً وفجأه ترجع السخونيه تاني بنفس السيناريو 🥲
السخونيه كانت صعبه في كل مرة ، درجة الحرارة بتوصل ٤٠ و مش بتستجيب لخوافض الحرارة
كل مرة كانت بتكشف كانت بتاخد مضادات حيوية باعتبارها التهاب بالحلق و اللوزتين و تعلق محاليل و السخونة تاخد كام يوم و تخف و تبقى طبيعية و بعد ٣ أسابيع ترجع تسخن تانى سخونة شديدة .وكل مره تعمل تحاليل تطلع كلها طبيعيه
بفحص الطفلة لما جات لنا كانت درجة الحرارة فوق ال 39
قرح بسيطه بالفم عددها قليل ومش مؤلمه خالص ( مش زي بتاع الهربس )
وكان فيه تضخم وتورم بالغدد اللمفاوية بتاع الرقبه اللي اسمها ( حيل )
مع احتقان بسيط بالحلق و التهابات باللوزتين
👈 حمي دوريه يعني (متكررة) + تضخم بالغدد في الرقبه + قرح بالفم و البنت بين نوبات السخونيه بتكون طبيعيه تماما 😳
تشخيص الحالة بعد التاريخ المرضى و الفحص و التحاليل كان نوع من انواع الحمى الدورية Periodic fever مرض يسمى بمتلازمة_مارشال او حمى_البيفابا (PFAPA syndrome)
و الاسم بالانجليزي هو اختصار ل: متلازمة الحمى الدورية و القرحة الفموية و التهاب البلعوم و تضخم الغدد الليمفاوية العنقية.
Periodic fever , Aphthous stomatitis , Pharyngitis , Cervical adenitis
ده مرض منتشر في الأطفال وهو عبارة عن اضطراب في جهاز المناعه غالبا بداية ظهوره من سن سنتين او ٣ سنين ويستمر حتى عمر ١٠ سنوات وبعدها يتم الشفاء منه تلقائيا ونادرا ما يستمر حتى البلوغ و بعض الحالات بتتحسن بعد اجراء جراحة لاستئصال اللوزتين
ودا كان التشخيص الأرجح بالنسبه ليه 🧐🧐
بتتميز متلازمه مارشال PFAPA
بسخونيه رهيبه متكرره ودوريه تتكرر كل ٢_٤ أسابيع ولا تستجيب الحراره على الخوافض وتستمر الحراره من ٣_٧ أيام كل مره👌👌
تم إعطاء العلاج المناسب للحالة والحمد لله مجرد ما مريم اخدت العلاج ⬅️ السخونيه اختفت تماما فى خلال ساعات من غير ما تاخد مضادات حيوية أو تعلق محاليل زي كل مرة
مرض مش نادر وموجود ولكنه صعب ف التشخيص وعلاجه الحمد لله بسيط جدا
محتاج اننا نستبعد كل اسباب السخونيه المتكرره قبل ما نوصل للتشخيص
وتأكدنا من تشخيص الحاله وتم وضع بروتوكول العلاج وتحسنت الحاله تماما بفضل الله
وكملنا علي علاج وقائي ليها
والسخونيه بفضل الله انتهت تماما
والعلاج مكنش مضاد حيوي ولا حاجه 😜
