16/07/2026
https://www.facebook.com/share/p/17aygdVfUN/
الدقيق الأبيض غلط .. بلاش دقيق أبيض .. السموم البيضاء
أكيد بتسمعوا الجمل دي كل يوم
بس عمر حد فيكم سأل نفسه ليه الدقيق الأبيض غلط بالرغم من إنه جاي من قلب الطبيعة ؟
إما من حبة قمح أو من حبة ذرة
يعني حاجة ربنا خلقها .. إزاي بقى بقت غلط ؟
جهز كباية الشاي وتعالي اقولك
الموضوع ببساطة ومن غير تعقيد عشان الصورة توضح
السر في التشريح العجيب لحبة القمح أو الذرة
ربنا سبحانه وتعالى خلق الحبة دي عبارة عن 3 أجزاء رئيسية متكاملة
1 .. الغلاف الخارجي ( الردة أو الألياف ) وده الحارس الأمامي اللي مليان ألياف ومعادن وفيتامينات
وهو المسؤول إنه يخلي السكر يمتص في جسمك ببطء وبأمان
2 .. جنين الحبة وده قلب الحبة النابض ومركز الطاقة اللي فيه الدهون الصحية ومضادات الأكسدة وفيتامينات ب
3 .. منطقة السويداء ودي الجزء الأكبر في الحبة ودي عبارة عن نشا خالص وكربوهيدرات مع شوية بروتين بسيط
أيه بقا اللي بيحصل في المصانع ويدمر المعادلة دي ؟
عشان الدقيق يعيش فترة طويلة على الرفوف وما يبوظش وعشان لونه يبقى أبيض شاهق ومغري في المعجنات
بتدخل الحبة في عملية " تكرير وطحن قاسية " تفرتك التركيبة الربانية دي
بيتم نزع جنين الحبة تماما ( عشان الزيوت اللي فيه ما تخليهوش يزنخ )
وبيتم قشر الألياف والردة ورميها برة
طب النتيجة أيه ؟
أحنا بناخد " منطقة السويداء " بس
يعني بناخد النشا الصافي الخالي من أي قيمة غذائية حقيقية الدقيق الأبيض مش ( سام ) لأن فيه مادة قاتلة
إنما "غلط" لأننا جردناه من كل حاجة تخليه صحي
لما بتاكل عيش أبيض أو مخبوزات جسمك بيتعامل مع نشا صافي وسريع الامتصاص فيحصل الآتي . سكر الدم يعلى في السماء فجأة. الأنسولين يفرز بكميات ضخمة عشان يلحقه
بعد ساعة واحدة بس تلاقي نفسك جعت تاني وطاقتك خلصت وجسمك يبدأ يخزن دهون
الحكاية مش إن ربنا خلق القمح والذرة غلط ( حاش لله )
إنما الحكاية في تدخلنا في تغيير طبيعة الحبة ونزع الألياف والجنين منها هو اللي حولها لمنتج بيتعب جسمنا
ارجعوا للطبيعة وكلوا الحبة كاملة زي ما ربنا خلقها ببركتها وفائدتها وحافظوا على صحة جسمكم ❤️
شارك المنشور لو شايفه مفيد عشان الباقي يستفيد
