Dr.Mohammad Abdelfattah

05/06/2026

الريجيم المميت!!
🔴ريجيم كيميائي خاص جدا ابتكره عالم بريطاني اسمه باسل براون بيعتمد اعتماد كلي على الجزر🥕🥕 واستمر على الدايت دا عشر أيام بس، هل تفرق معاك خس أو لأ ؟ هو خس بالفعل لكنه مات بعدها علاطول ، الكلام دا حصل سنة 1974 وتقدروا تدوروا على الموضوع دا بنفسكو
🔴معاكو أخصائي تغذية الرياضيين والسمنة والنحافة
د. محمد عبدالفتاح
ويلا بينا عشان نستفيد..
🔴سبب الوفاة كان حاجة اسمها التسمم بالفيتامينات
hypervitaminosis A
احنا صح لينا احتياج يومي من كل الفيتامنات لكن الفيتامنات دي مغذيات صغرى micronutrients بنحتاج منها نسب بسيطة اوي لكن زيادة الفيتامنات في الجسم أكتر من اللازم مش أحلى من نقص الفيتامنات بردو تصور ان شخص مات من كتر الفيتامنات!؟
الراجل دا استهلك حوالي عشر جالونات عصير جزر
فيهم حوالي 70مليون وحدة دولية من فيتامين أ !!
🔴أي صنف من أصناف الأكل لو بالغنا فيه هيأذينا اللبن زيادته هتعمل إسهال، اللحوم الحمراء زيادتها هتعمل نقرس، المانجة والفواكة اللي فيها املاح الاوكسالات بتعمل حصوات خصوصا لو استهلاكنا من الكالسيوم قليل -وكنت اتكلمت عن النقطة دي في بوست المانجة قبل كدا بالتفصيل- ، المش والجبن القديمة والأكل المحفوظ بالملح كثرة استهلاكه بترفع الضغط بشكل مفاجيء واللي ممكن يهددك بمشاكل كتير أبسطها الجلطات خصوصا لو استهلاكك من المياه مش كويس، السكر المضاف أو سكر المائدة والحلويات اللي بترفع الدهون الثلاثية في الدم ومشاكلها محتاجة بوست كامل أشرحها فيه

🔴طيب احنا مثلا مستعجلين وعاوزين ننزل وزننا نعمل ريجيم كيميائي ولا تنضيف معدة -اتكلمت عن يوم التنضيف قبل كدا-ولا نعمل إيه؟
دي كلها اشتغالات وأسامي رنانه بتوهمكو ان في سحر في الموضوع، مفيش حاجة بتخسس زي عجز السعرات وياسلام لو نرفع قصادة الاستهلاك اليومي من الطاقة عن طريق حاجتين التمرين و النشاط الحركي الغير رياضي
non exercise activity
ودا ببساطة بيكون عبارة عن حركتك طول اليوم وانت برا الجيم زي انك تطلع السلم مش الأسانسير ، وتاخد مشاويرك مشي مش مواصلات طول ما المسافة تسمح يعني.
🔴يعني كدا انتا بتقول ان الريجيم الكيميائي مش بيخسس؟
يا فرحتي لو ميزانك نزل مياه وعضلات وحرقك قل يبقا عملنا ايه، ليه نبص للرقم مش للصحة والشكل اللي الناس شيفاه اللي هو أهم بكتير اوي من رقم عالميزان الناس متعرفوش..
انا واحد من الناس هكون سعيد جدا لو وزني 90كيلو والناس كلها بتقوللي ان شكل جسمي حلو أحسن ما اكون 80 كيلو والناس بتقوللي ان شكل جسمي وحش -الحقودشين مش بيتحسبوا🤣- المهم
لو عملت دايت قاسي وخسرت عضل حرقك هيقل يعني هتواجه صعوبة في تنزيل نسبة دهونك بعد كدا، دايما بيكون التارجت اننا نرفع العضلات وننزل الدهون الاستثناءات قليله اوي فعلا🤍
🔴لازم نبقا عارفين ان العضلات هي اللي بتدي شكل للجسم سواء للولد او للبنت فهي مسؤولة عن شكل الاكتاف والذراع الذكوري في الشباب ومسؤولة عن ان الشيب بتاع البنت يكون كيرڤي ومتناسق -في ناس بتحب تبقا skinny اكتر من اللازم هي عادي طلاما نسب عضلاتك ودهونك فالطبيعي انت حر في انك تجيب الطبيعي من فوق او من تحت لأن ليها رينج، ودي بردو حرية للشباب اللي عاوزين يبقو over muscle لدرجة ممكن ال body mass index يديهم obese وهما نسبة دهونهم 10٪ مثلا ومن هنا عاوز اقول ان الbmi هو مؤشر احيانا كتير بيدي نتيجة تعريفية غير دقيقة لأنه أصلا الغرض منه كان إحصائي وليس شخصي او احترافي عشان كدا بنقول ان مفيش حاجة اسمها وزن مثالي لكن في حاجة اسمها نسبة دهون مثالية ودي بتختلف من الولد للبنت ومن الرياضيين للتنافسيين او حتى الأشخاص الأصحاء العاديين
مرحب جدا بالرد على استفساراتكو🤍
وبالتوفيق للجميع❤️
Dr.Mohammad Abdelfattah

22/05/2026

🙂

حظك اليوم : إوعى البروتين ينسيك الفيتامين