16/07/2026
شرفني في العيادة الحاج توكل بعد عملية من اخطر العمليات اللي عدت عليا .. خطورتها كانت مش في الإجراء الجراحي بس لكن في كل الظروف اللي كانت ضدنا لكن بفضل ربنا قدرنا نعدي المحنه دي .. تعالوا أحكيلكم الحكاية…
راجل طيب من اهالينا
عامل قلب مفتوح…
مركب صمام صناعي…
وكل يوم بياخد أدوية سيولة.
قبل أسبوعين …
اتخبط خبطة بسيطة في راسه.
راح عمل رنين على المخ…
والنتيجة؟
مفيش أي نزيف.
كل الناس اطمنت…
وهو رجع بيته.
لكن في حاجة مكانتش طبيعية…
كل يوم الصداع يزيد…
أقوى من اليوم اللي قبله.
لما دخل عليا…
كان عندي إحساس إن في حاجة مستخبية.
طلبت أشعة جديدة…
وأول ما الأشعة ظهرت على الشاشة…
عرفت إننا في سباق مع الوقت.
نزيف ضخم تحت الأم الجافية…
بيضغط على المخ.
المشكلة؟
المريض على أدوية سيولة علشان حالة القلب .. وسيولة الدم ٤ اضعاف المعدل الطبيعي
ولو عملنا عملية ممكن ينزف أكتر.
ولو استنينا…
المخ هيفضل يتضغط.
يعني أي قرار…
كان فيه خطر.
لكن مفيش رفاهية للاختيار.
دخلنا العمليات…
وسيطرنا على النزيف…
وشيلنا الضغط عن المخ.
والحمد لله خرج بخير..بفضل ربنا ثم فضل الفريق المساعد من تخدير وتمريض علي أعلي مستوي
# دكتور _محمود_حامد
