Dr. Hareth Mira Clinics عيادات د.حارث ميره

29/08/2026

من داخل GESEA Cairo Training Center – OMAM Hospital، تدريب مستمر على مهارات جراحات المناظير؛ لأن كل ساعة تدريب، وكل مهارة جديدة بنتعلمها، هدفها في النهاية جراحة أدق، أمان أكتر، ونتائج أفضل لمريضاتنا.

طريق التميز ملوش محطة أخيرة…
نتعلم أكتر علشان نقدم أفضل. 🤍

د. حارث إسماعيل
استشاري النساء والتوليد وجراحات المناظير وتأخر الإنجاب والحقن المجهري

26/08/2026

في غرفة العمليات… التركيز مش رفاهية، والتفاصيل الصغيرة بتفرق. 👨‍⚕️🔬

كل خطوة محسوبة، وكل قرار هدفه واحد:
أفضل نتيجة للمريضة بأكبر قدر من الأمان والدقة.

جراحات المناظير مش مجرد جرح أصغر…
هي رؤية أدق، تدخل أقل، وتعافٍ أسرع في الحالات المناسبة. 💙

الدقة في التفاصيل… هي اللي بتصنع الفرق.

19/08/2026

الخوف كان إننا نخسر المبيض… والهدف كان نحافظ عليه. ❤️

مريضة بتعاني من تأخر الإنجاب لمدة سنة ونص، ومع وجود كيس على المبيض كان أكبر قلق عندها وعند أهلها:
“يا دكتور… المبيض هيتشال؟”

الحمد لله بالمنظار قدرنا نستأصل الكيس بعناية مع الحفاظ على نسيج المبيض قدر الإمكان، والعملية تمت بنجاح. 🙏

لأن في جراحات تأخر الإنجاب…
النجاح مش إنك تشيل الكيس وبس، النجاح إنك تعالج المشكلة وتحافظ على فرص الحمل المستقبلية. ❤️

ربنا يكتب لها الخطوة الجاية خبر حمل يفرّح قلبها. 🤲

12/08/2026

من اليمن إلى مصر 🇾🇪🇪🇬… رحلة علاج بدأت من السوشيال ميديا وانتهت الحمد لله بالشفاء ❤️

الحالة كانت بتعاني من ورم بالمثانة مع التصاقات شديدة بينها وبين الرحم نتيجة قيصرية سابقة.

وبفضل الله تم التدخل بالمنظار الجراحي:
🔹 استئصال الورم
🔹 فك الالتصاقات
🔹 وإعادة التشريح قدر الإمكان لوضعه الطبيعي

وبعد 14 يوم فقط من العملية رجعت لنا هي وزوجها للاطمئنان والمتابعة… وكلمة الشكر والابتسامة منهم كانت بالنسبة لي أجمل نتيجة للعملية. ❤️

الحمد لله، المريضة الآن بخير.

وأكتر حاجة أسعدتني إن رحلتها بدأت لما شافت محتوى الصفحة من اليمن وقررت تسافر لمصر للعلاج.

السوشيال ميديا مش مجرد أرقام ومشاهدات…
ممكن فيديو يوصل لمريض محتاجك من بلد تانية، ويكون بداية رحلة علاج جديدة. 🙏

📩 للاستفسار عن حالات المناظير الجراحية وحجز التقييم، يمكن التواصل مع الصفحة.

#التصاقات #مصر #اليمن

10/08/2026

عندك كيس بطانة رحم مهاجرة وداخلة على حقن مجهري؟ 🤔
هل لازم نشيل الكيس الأول؟ ولا نبدأ الحقن المجهري مباشرة؟

الإجابة مش واحدة لكل الحالات 👌
لأن القرار بيعتمد على حجم الكيس، الأعراض، مخزون المبيض، وسهولة سحب البويضات.

وأحيانًا التدخل الجراحي قبل الحقن المجهري مش بيكون هو الاختيار الأفضل، خصوصًا لو فيه خوف على مخزون المبيض.

🎥 في الفيديو بشرح العلاقة بين أكياس بطانة الرحم المهاجرة والحقن المجهري وإمتى نفكر في الجراحة وإمتى نحافظ على المبيض ونبدأ رحلة الحقن.

القرار الصح مش علاج الكيس بس… القرار الصح هو اللي يحافظ على فرص الحمل. ❤️

08/08/2026

بطانة الرحم المهاجرة مش معناها ألم وبس! ⚠️

هل كل واحدة عندها بطانة رحم مهاجرة لازم تكون بتتألم؟
وهل ممكن تكون موجودة من غير أعراض… وتكون سبب في تأخر الحمل؟

الحقيقة إن الأعراض بتختلف جدًا من سيدة للتانية، وممكن تظهر في صورة:
🔹 ألم شديد أثناء الدورة
🔹 ألم أثناء العلاقة
🔹 ألم بالحوض أو الظهر
🔹 أو أحيانًا… تأخر في الإنجاب بدون أعراض واضحة

عشان كده التشخيص الصح مهم، خصوصًا لو الألم متكرر أو في تأخر حمل.

🎯 في الفيديو هنتكلم: إمتى الألم يكون علامة؟ وإمتى بطانة الرحم المهاجرة ممكن تأثر على الخصوبة؟

#العقم

06/08/2026

مش كل مضاعفة بتكون متوقعة… لكن المهم إنك تكون مستعد تتعامل معاها في الوقت المناسب. 🩺

حالة لولب تحرّك ووصل إلى داخل البطن، وتسبب في نزيف والتصاقات، والحمد لله قدرنا بالتدخل الجراحي والسيطرة على الموقف، وإنهاء المشكلة بأمان. 🤲🏻

رسالة مهمة: تركيب اللولب إجراء بسيط وآمن في أغلب الحالات، لكن المتابعة بعد التركيب مهمة جدًا، وأي ألم غير طبيعي أو نزيف شديد يستدعي مراجعة الطبيب فورًا.

الحمد لله على لطفه وتوفيقه في كل حالة. ❤️‍🩹

#لولب #الحمدلله

05/08/2026