26/08/2026
موقف حصل في العيادة وخلاني أوضح نقطة مهمة جدًا…
حضرت حالة، وكانت مقرره من قبل ما تدخل إن ابنها «جاي يغسل ومش هيدفع كشف» لان زميله راح لدكتور تاني ( بدون ذكر اسماء) غسله بس عادي ، ولما المساعدة وضحت إن ده مش نظام العيادة، حصل تطاول عليها لمجرد إننا رفضنا نعمل الإجراء من غير كشف.
تنضيف الأذن مش معناه غسيل وخلاص.
التنظيف ممكن يكون غسيل أو شفط، وده بيتحدد حسب حالة الأذن بعد الكشف بالمنظار.
لأن في حالات ممكن يكون فيها ثقب في طبلة الأذن والمريض مش حاسس بيه، أو حالات الغسيل فيها ممنوع، وأحيانًا الأذن أصلًا مش محتاجة تنظيف.
والأهم: لو حصلت مضاعفات بسبب إجراء اتعمل من غير تقييم سليم، أول اتهام هيكون: «الدكتور مش فاهم!»
عشان كده دي قواعد العيادة: مفيش غسيل أو شفط من غير كشف وتقييم للحالة أولًا.
وطبعًا كل دكتور له طريقة ونظام شغل، ومن حق أي مريض يختار المكان اللي يناسبه، مع كامل الاحترام للجميع.
لكن في عيادتي تحديدًا:
مفيش غسيل من غير كشف.
مش تعقيد، ومش مجرد تحصيل كشف… دي سلامة مريض ومسؤولية طبيب.
والاختلاف في طريقة الشغل عمره ما يبرر التطاول على أي حد من فريق العيادة. ❤️
سلامة المريض أولًا… مش تنفيذ طلبه وخلاص. ❤️
