عيادة دكتور أحمد العجمي لطب الأطفال وأمراض الجهاز العصبي للأطفال

18/09/2026

رقم قياسي جديد جدًا… ❤️‍🔥
الحمد لله، مشاهدات الصفحة خلال آخر 90 يوم وصلت لـ (( 101 مليون مشاهدة. ))
🔥🔥🔥🔥🔥
جدير بالذكر يا جماعة إنّي والله العظيم مافيش
ارباح أصلا 😄😄
الارباح صفر أهي قدامكم ...
انا عاملها تحدي وإثبات لنفسي أولا
إن اللي يحط في دماغه حاجه هيوصلها ..
وإن المحتوي الهادف يقدر ينافس جدا جدا ..
فرحتي إن المعلومة الطبية اللي بنحاول نقدمها بشكل محترم وبسيط، وصلت لقطاع كبير جدًا من الناس.
إن أم تقرأ معلومة فتستفيد و تبعتها لغيرها …
أب أو أم يعرفوا التصرف الصح في موقف طارئ…
معلومة تمنع خطأ، أو تطمّن قلق، أو تخلي طفل يروح للطبيب في الوقت المناسب…
ده عندي هو الربح الحقيقي فعلًا. ❤️
الحمد لله دائمًا وأبدًا. ❤️..

18/09/2026

..
الفيديو ده مهم جدا جدا جدا.. و متعوب عليه
بجد ..
لأننا خلينا الشرح فيه فيديو عملي يوضح
الكلام اللي بنقوله علي الطبيعة .. ..
#أتمني فعلا أنه يوصل حرفياً لكل أم ..
#شيييييير...💐💐

18/09/2026

❌ خطأ مشهووور جدا جدا .. ناخد بالنا
من الأخطاء السيئة اللي بقابلها كتير جدًا 👶❗
واللي بتخلي الطفل حديث الولادة يفضل
يعيّط . ومايسكتش لا ليل 🌙ولا نهار ☀️..
ومن غير سبب واضح.
نلف بيه على دكاترة…
نكشف صدره ✔️
نسمع ضربات قلبه ✔️
ونطمن إن كله تمام 👍
ونرجع البيت… ..العياط يبدأ من جديد 😣....
وفي الآخر نكتشف إن السبب بسيط جدًا،
بس مؤلم جدًا للطفل ❗
🔴 لما يكون #مدبب وطويل زي اللي على الشمال ..
بيبقى حرفيًا دبوس 🥺🥺
بيشك الطفل يمين وشمال مع النوم أو أي حركة بسيطة.
ناخد بالنا .
❗ طفل مش عارف يقول
❗ ولا يعبر
❗ ولا يفهم إن اللي بيوجعه هو الحلق
🔵 عشان كده ناخد بالنا جدًا
ويُفضّل دايمًا نختار
حلق قصير – مقفول كويس – من غير سن مدبب
🩵🩵زي اللي على اليمين 🩵🩵. شفت بقي حاجة صغيره خالص
ممكن تخلي أسرة كاملة تلف كتير وطفل برئ
يتعذب ومش عارف يقول 💔💔

راحة الطفل تبدأ من تفاصيل صغيرة…
بس فرقها كبير ❤️👶.
#شييييير ..ونبهوا غيركم يمكن تكون
سبب في راحة طفل مش قادر يعبر
عن ألمه 🩵🩵💐💐.
لصاحبتك اللي عندها طفل مولود
و مبينيمهااش 👌👌
واعملي save للبوست علشان لما تجيبوا حلق
يكون زي ده

18/09/2026

متخيل إن وظيفة الأسنان في الطفل ده هيفقدها طول فترة الطفولة؟

متخيل مدى المعاناة؟

متخيل إن الطفل مش هيكون عنده القواطع اللي يقطع بيها حتى رغيف العيش أو ياكل تفاحة أو ساندويتش بشكل طبيعي؟

طيب... إيه اللي يخلي طفل لسه أسنانه اللبنية بتطلع، تتسوس وتتاكل بالشكل الكارثي ده؟

السبب في أغلب الحالات هو تسوس الأسنان المبكر في الطفولة (Early Childhood Caries).

وده بيحصل بسبب عادات بسيطة لكنها خطيرة، مثل:
🦷 النوم بزجاجة اللبن أو العصائر.
🦷 كثرة الحلويات والمشروبات السكرية.
🦷 عدم تنظيف الأسنان من أول ظهورها.
🦷 تأجيل أول زيارة لطبيب الأسنان.

المشكلة إن الأسنان اللبنية مش "هتقع وخلاص" زي ما ناس كتير فاكرة...دي مسؤولة عن المضغ، والنطق، وشكل الفك، وحفظ مكان الأسنان الدائمة.

إهمالها ممكن يسبب ألم شديد، وخراجات، وصعوبة في الأكل، وسوء تغذية، وقد ينتهي بخلع الأسنان في سن صغيرة.

الوقاية أسهل بكتير من العلاج.ابدأ بتنظيف أسنان طفلك من أول سن، وقلل السكريات، وخليه يزور طبيب الأسنان بانتظام.

... يمكن تنقذ ابتسامة طفل.
👌👌👌

17/09/2026

الفيديو ده من سنة 2017…
ولكن بصراحة من الحالات الجميلة اللي قابلتني ....
الطفل ده كان بيشرق حرفيًا مع كل رَضعة، ومعاه كحة مستمرة مش بتروح…
وأخد أدوية كتير، وأدوية للارتجاع وغيره… وبرضه مفيش تحسن!
الشرقة كانت ملازماه تقريبًا طول الوقت، ودخل الحضانة مرات كتير بسببها.
وطبعًا أنتم عارفين إن فحص حديثي الولادة مش دايمًا بيكون سهل… الطفل مش بيفتح بقه كويس، والرؤية داخل الفم والحلق ممكن تكون صعبة.
لكن هنا… حظي الحلو خلاني أشوف السبب من أول لحظة فتحت فيها بقه! 😃
لقيت قطعة لحمية زائدة نازلة من منطقة اللهاة (Uvula)، وكانت طويلة ومتحركة بشكل غير طبيعي، وكأنها بندول بيتحرك داخل الحلق.
ومع كل رضعة أو لمس للمنطقة، كانت بتثير Gag reflex… يعني منعكس القيء والشرقة، وده كان مفسر جزء كبير من اللي بيحصل للطفل.
وهنا كانت لحظة التشخيص الحقيقي…
المشكلة مش ارتجاع، ومش محتاجة نجرب دواء ورا دواء!
تم تحويل الطفل لطبيب الأنف والأذن والحنجرة، وتمت إزالة الجزء الزائد جراحيًا في وقت قصير جدًا، وانتهت معاناة الطفل. والأستاذ أحمد
دلوقتي في المدرسة 💐💐🩵🩵..
#الارتجاع

17/09/2026

أعتذر لحضراتكم عن عدم تواجدي بالعيادة اليوم الخميس، وذلك بسبب مشاركتي في أحد المؤتمرات الطبية.
وبإذن الله أكون متواجدًا بالعيادة بدءًا من يوم السبت القادم، وأتشرف باستقبال حضراتكم.
شكرًا لتفهمكم وثقتكم الدائمة 🌷.
وبقى رجاءً محدش من الأطفال يتعب النهارده… رجاءً لو سمحتم 😃😃😃😃

يعني كبرنا شوية يا جماعة… مش كل شوية العيال دي تتعب وأنا مش موجود 😂😂😂
خلّونا نعدّي الخميس والجمعة على خير، ونبدأ السبت إن شاء الله بكل الخير ❤️😂

16/09/2026

الشعب كله بياخد كولشيسين 😅😅

16/09/2026

16/09/2026

Which type of cough??..
هنشوف تعليقات الزملاء ومشاركتهم وهنكتب الاجابه في بوست لاحق باذن الله

16/09/2026

..
الناس اللي بتقول مش بنعرف نقرأ الترمومتر
الزئبقي اسمعوا الفيديو ده 👌👌.
متبخلوش علي نفسكم بالمعلومة لأن
والله اكيد مليون في المية هتحتاجوها .. ..
خدوا اسكرين بقي ورونا في التعليقات
شطارتكم .. و عرفتوا تقروها ولا لا . .
صاحب افضل صورة له جايزة 👌👌💐💐