25/02/2026
خاطرتي من سورة طه
🔴أجمل آيتين بيلمسوني أوي فيها هو قوله تعالي : { وَأَلْقَيْتُ عَلَيْكَ مَحَبَّةً مِّنِّي وَلِتُصْنَعَ عَلَىٰ عَيْنِي }
وقوله تعالي : { وَاصْطَنَعْتُكَ لِنَفْسِي }
الآيتين دول كل ماييجوا في بالي أو اسمعهم بحس إن ربنا بيكلمني أنا ..أيوة أنا ..مع إنهم خطاب لسيدنا موسي صلي الله عليه وسلم لكنهم خطاب ليك وليا ولكل واحد بيقرأهم أو بيسمعهم ..ربنا بيتنزل علينا بمعاني الجمال والقرب من خلالهم ..
الآيتين دول بقيوا أساسيين معايا في جلسات العلاج الشعوري سواء لنفسي أو لعملائي لأنها بترجعلنا شعورنا بقيمتنا الذاتية الأصلية اللي شوهتها تركيبة جروح وصدمات كتيرة جوانا ولما ندرك معانيهم ونستشعرهم من كل أعماقنا بيكونوا شفاء حقيقي لينا من الجروح دي.
{ وَأَلْقَيْتُ عَلَيْكَ مَحَبَّةً مِّنِّي وَلِتُصْنَعَ عَلَىٰ عَيْنِي }
✨كل موقف بيحصلنا في حياتنا وكل ابتلاء بنتعرضله وكل الأحداث في حياتنا وكل حاجة بنشوفها قدامنا او بنسمعها ربنا بيربينا فيها علي عناية خاصة منه سبحانه وتعالى.. بيوصل أرواحنا بيه سبحانه أكتر وبيعلمنا إنه هو سبحانه المصدر اللامحدود لكل مانحتاج ..وبيصنعلنا بيها شخصياتنا ..بيصنعلنا بيها نسخة أفضل من ذاتنا.. بيعلمنا دروس مهمة بتقوينا وبتصلح فينا واحنا محتاجين نتطور ونرتقي بالدروس المهمة دي عشان نكمل باقي حياتنا باللي اتعلمناه وهكذا .
{ وَأَلْقَيْتُ عَلَيْكَ مَحَبَّةً مِّنِّي وَلِتُصْنَعَ عَلَىٰ عَيْنِي }
كل حاجة فينا بتدل علي صنع رب العالمين ..لا وكمان بدقة وإتقان وإهتمام وعناية فائقة ..
✨كل حتة فينا بتعبر عن صنع الصانع البديع سبحانه وتعالى ..وأودع فينا صفاته علي قدرنا البشري ومهما الإنسان حاول يقلد صنع الصانع سبحانه وتعالى برضه مش هيعرف يوصل لنفس نتيجة البديع سبحانه وتعالى ..
الكلية مثلا سبحان الله كل كلية عندنا فيها مليون مصفاة مخصصة لكل مادة بتصفي كل حاجة في جسمنا وبعدين تدخل للجسم الكمية اللي هو محتاجها فقط ..تخيلوا الكلية بحجمها الصغير ده تكون مستوعبة جواها لمليون مصفاة! سبحان الخالق البديع سبحانه وتعالي
والإنسان صنع الكاميرا شبه العين بس برضه مهما اتطورت الكاميرات الإنسان ماقدرش يوصل لنفس دقة العين وإبداع البديع فيها وكل جمال فيها ..
والإنسان صنع الكمبيوتر والموبايلات عشان تبقي شبه المخ .. بس برضه عمره ماهيوصل لدقة خلايا المخ والعمليات اللي بتحصل داخل المخ وكل إبداع فيه من رب العالمين ..والعمليات الجراحية دلوقتي مهما بلغت دقتها وتطورها الكبير ونسب نجاحها العالية جدا برضه مش هتوصل دقتها ولنفس الخلق اللي ربنا خلقه بدقة فائقة وعناية خالصة منه سبحانه وتعالى.
🟣قوله تعالي { وَاصْطَنَعْتُكَ لِنَفْسِي } بتفكرني بقوله تعالى: { إنه من عبادنا المخلَصين }
الجملة دي فيها من القرب الشديد والحنية الربانية بطريقة رهيبة اللي تشعرنا إننا مخلوقين عشان نكون خلفائه بحق علي الأرض وعشان نكون قريبين من ربنا وعشان نكون موصولين بيه وبنستمد منه دايما كل اللي محتاجينه عشان يكون هو سبحانه سندنا وقوتنا ومصدر أماننا ومصدر الحب الحقيقي لينا ومصدر كل حاجة في حياتنا
بمعني بسيط جدا كأن ربنا بيقولنا يعني أنا خلقتك واستخلصتك عشان تكون ليا أنا عشان تكون قريب مني أنا مشعارفة أوصف بس هو معني كده بيجعل الإنسان أقرب لربنا وأجمل من الملائكة .
ده سبحانه وتعالى ماوكلش حد يخلقنا لكن سبحانه وتعالى هو بذاته العليا اللي خلق كل حتة فينا بعنايته عشان نحقق مراده مننا .. اللي هو الغرض اللي سبحانه وتعالى خلقنا وجابنا الدنيا عشانه ..يعني الدور اللي المطلوب مننا نقوم بيه والرسالة النورانية رسالتنا في الحياة اللي المفروض نكتشفها وننشرها وننوى بيها الدنيا عشان نحقق بحق { واصطنعتك لنفسي }
مشعارفة أوصف اللي جوايا أكتر من كده ..لكن متأكدة كل واحد منكم هيحس بأحاسيس ومشاعر ماتتوصفش لما يتخيل كده جمال وعظمة رب العالمين وهو بيبلغه بكده .
✨رابعة العدوية قالت إيه ؟
" فليتــك تحـلو والحياة مريـرة **** وليتك ترضى والأنام غضاب
وليت الذي بيني وبينك عامر**** وبينـي وبين العالمين خـراب
إذا صح منك الود فالكل هين*** وكل الذي فوق التراب تراب. "
⭐ ربنا سبحانه وتعالى قال : { أليس الله بكافٍ عبده }
يكفيك ربنا وحده معاك ويكفيك كل حاجة منحهالك ويكفيك تدرك إن كل حاجة بتوصلك من البشر فهي بتوصلك من ربنا من خلال البشر .
بسمة أحمد عبد الرؤوف
باحثة عن النور
سفيرة الحب الحقيقي الغير مشروط
معالج شعوري لتحرير المشاعر وتشافي الصدمات النفسية والجروح العاطفية
كوتش في تشافي العلاقات الإنسانية والعلاقات الروحية
ملحوظة
نفس الآيتين دول اتكلمت عنهم قبل كده في تأملاية طويلة علي جزئين وضحت فيها آثار الجروح العاطفية والصدمات النفسية علي تشويه قيمتنا الذاتية الفطرية الأصلية
مهم تقرأوهم اللينكات موجودة في أول كومنت 👇🏻
