20/08/2026
امبارح كنت بحكيلكم عن حاجة فهمتها مع الوقت ومع التجربة
و إن تدريب أولادنا على المسؤولية مش بالسهولة اللي بنبقى متخيلينها، ورغم ان أحيانًا إحنا كأمهات بنكون عارفين إن الصح إن الولد يشيل مسؤولية، لكن تطبيق ده محتاج صبر ونَفَس طويل.
فاكرة كويس لما كنت في الجامعة
كان عندي صديقة هي واخواتها ٩ ..معظم مقابلاتنا مع بعض بتكون مصطحبة اختها اللي عمرها ٧ سنين
ولما سألتها عن الموضوع من باب الفضول قالت لي ان هي وكل حد من اخواتها الكبار مسئولين عن اخواتهم الصغيرين
مش المسئولية اللي هي مجرد تخليه يجيب له حاجة أو يساعده في المذاكرة
لأ...
كان عارف برنامجه، مواعيده، دراسته، واحتياجاته.
وفي آخر اليوم، كان بيبقى في شبه تقرير يومي لمامتهم:
إيه اللي حصل؟
إيه اللي اتعمل؟
وهل فيه حاجة محتاجة تدخل منها؟
ما كانتش بتجري ورا كل تفصيلة صغيرة.لكن ملمة بالمواضيع اجمالا
كانت مركزة أكتر على الصورة الكبيرة للأسرة وقراراتها وتوجهها.
والأجمل إن مامتهم ما كانتش شخصية هادية أو منعزلة أو بعيدة عن أولادها.
بالعكس تمامًا...
كانت شخصية جميلة جدًا، نشيطة، اجتماعية، ولبقة بشكل يخليكي تحبي تقعدي معاها وتسمعيها.
مكانش المهم بالنسبة ليها انها تعمل الاريح ليها وللاولاد
كانت بتعمل حاجة أصعب:
**كانت بتعرف مين يشيل إيه.**
كانت بتربي أولادها على إنهم مش مجرد أطفال في بيت الأم بتخدمهم...
لكن أفراد في كيان واحد، وكل واحد فيهم له دور ومسؤولية.
وده خلاني أفكر إن يمكن المرحلة اللي بنتكلم عنها من امبارح مش هدفها في النهاية إن ابني "يساعدني".
الهدف أعمق من كده بكتير...
**إني أربي إنسان يعرف يشيل مسؤولية نفسه، وبعدها يعرف يشيل مسؤولية غيره.**
يمكن ده الفرق بين إن أولادي يساعدوني في البيت...
وإنهم يتعلموا **إزاي يكونوا جزءًا من إدارة البيت.**
وهنا بقى السؤال اللي حابة أعرف رأيكم فيه:
شاركينا في التعليقات بكل صراحة …شايفة ان تدريب ابنك على المسئولية دورك …ولا هتسيبي الايام هي اللي تدربه عليها؟؟