16/06/2026
Este ano cumpro 18 anos como quiromasaxista.
Botando contas, realicei aproximadamente máis de 23.000 masaxes.
Cando vin a cifra impresionoume, pero o certo é que detrás dela hai moito máis ca un número.
Son miles de encontros, de historias compartidas en silencio, de emocións que atoparon un espazo seguro e de confianza depositada entre as miñas mans.
Desde moi nova tiña un soño: crear un espazo propio, un lugar cheo da miña enerxía, a miña alma, a miña ilusión e a miña forma de entender o benestar.
Antes de que nacese SPAzo Namasté percorrin Galicia traballando nalgúns dos balnearios, spas, centros de masaxe, albergues e paradores máis recoñecidos. Fixen moitos quilómetros de coche e moitos quilómetros de pel.
Tiven o privilexio de traballar con todo tipo de persoas, aprendendo de cada experiencia, de cada historia e de cada corpo que pasou polas miñas mans.
Coa chegada da maternidade sentín que era o momento de botar raíces. De deixar de percorrer camiños para crear o meu propio fogar profesional.
Así naceu SPAzo Namasté.
Un espazo creado con amor, luz e propósito.
Pero se algo acompañou cada paso deste camiño foi a formación.
Sempre sentín que nunca sei o suficiente, porque soster a unha persoa entre as mans é unha gran responsabilidade. Ás veces chega con dor física. Outras veces con cansazo emocional. Outras con feridas invisibles da alma.
Por iso nunca deixei de estudar.
Durante estes 18 anos dediquei máis de 2.592 horas a seguir formándome para ofrecer o mellor de min a cada persoa que entra pola porta.
E despois de todo este tempo, os meus valores seguen sendo os mesmos:
Escoitar con todos os meus sentidos.
Ver coas miñas mans.
Palpar coa alma.
Sentir co corazón.
Grazas a todas as persoas que confiastes en min durante estes 18 anos.
Cada masaxe deixou pegada na vosa vida, pero tamén na miña. ❤️
