Hawary Saad - هواري سعد

22/08/2026

الواحد طول ما هو ماشي في الشارع في اسبانيا بيشم رائحة غريبة تحس انها رائحة ملوخية محروقة 🤣 وأنا هنا مش قصدي على الملوخية
بتعمل دماغ ببلاش

06/08/2026

الدراسة في رومانيا-2026 & الدليل الشامل للدراسة والمعيشة في رومانيا -تجربتي في الدراسة في رومانيا
هل تحلم بالدراسة في أوروبا ولكن تواجهك عقبات المصاريف الفلكية أو الشروط التعجيزية؟ في هذا الفيديو، نفتح معاً بوابة وأسهل طريق للحصول على شهادة أوروبية معترف بها عالمياً بأقل تكلفة ممكنة! 🌍✈️
في الفيديو اتكلمنا عن مؤسسة او فريق ممكن يساعدكم في حل المشاكل المتعلقة بالتقديم والترجمة ومراسلة الجامعات والحصول على القبول
لأن الأخطاء الورقية قد تضيع عليك سنة دراسية كاملة، بالتعاون مع الفريق الذي اشارنا عنه في الفيديو لتأمين قبولك الجامعي وتسهيل إجراءات بكل موثوقية.
لمعلومات اكتر للتواصل معهم
لطلب استشارة خاصة أو البدء في تجهيز ملفك والتقديم، تواصل فوراً عبر:
مؤسسة EduMaster
وادخل على موقعهم الالكتروني لتسجيل معهم من خلال الرابط موقعهم الالكتروني
EduMaster365.com
📧 البريد الإلكتروني: [email protected]
📱 واتساب

+34 612 23 13 93
+201010115514
مجرد التسجيل معهم لك خصم من خلال الكود التالي لا تنسى الكود
EduRH926
🔔 لا تنسَ الاشتراك في القناة وتفعيل الجرس لتصلك الحلقة الأولى من السلسلة فور نزولها! شارك الفيديو مع أصدقائك المهتمين بالسفر والدراسة بالخارج.

أهلاً بكم، معكم الهواري سعد، باحث دكتوراه في بين رومانيا واسيانبا في هذا الفيديو التمهيدي، نطلق رسمياً "الدليل الشامل الأول للدراسة والمعيشة في رومانيا لعام 2026". سنتعرف على رومانيا كدولة في الاتحاد الأوروبي، ولماذا أصبحت الوجهة الأفضل للطلاب العرب (خاصة في مجالات الطب، الهندسة، وتكنولوجيا الأغذية والزراعة زالقانون وجميع العلوم ).

ماذا سنتعلم في السلسلة القادمة؟
خلال الحلقات القادمة من هذه السلسلة المكثفة، سنجيب عن كل التفاصيل التي تشغل بالك:

مميزات وعيوب الدراسة والحياة في رومانيا (بكل صراحة!).

أهم التخصصات المتاحة ولغات الدراسة (الإنجليزية والرومانية).

فرص العمل الطلابي وكيف تصرف على نفسك هناك؟

خطوات استخراج الفيزا والإقامة الرسمية وضمان القبول.

جولة في أفضل 10 مدن وجامعات رومانية (ومدن يجب تجنبها!).

الأوراق والمستندات المطلوبة لتجهيز ملفك من الآن.
🔔 لا تنسَ الاشتراك في القناة وتفعيل الجرس لتصلك الحلقة الأولى من السلسلة فور نزولها! شارك الفيديو مع أصدقائك المهتمين بالسفر والدراسة بالخارج.

23/02/2026

ثواب إفطار صائم.. هل بنوزع عصير ولا معمل كيمياء؟ 🧪🥤
الحلقة الرابعة من سلسلة 🌙
كلنا بنحب فعل الخير في رمضان، وسباق "إفطار صائم" دي أجمل روح بنشوفها في شوارع مصر وفعلاً رمضان في مصر حاجة تانية والسر في العصير .🧐

من يومين وأنا راجع البيت وقت الأذان، لقيت الشباب الجدعان واقفين بيوزعوا عصائر صحية وبردوا روحت أصلي المغرب في المسجد لاقيت نفس الشباب بيوزعوا عصائر ألوانها تفتح النفس (أصفر، أخضر، بني) كلة موجود برتقال عنب تمر هندي.. شكل يفرح القلب فعلا يسلام
استنى شويه انت صدقت 🤷

في الحقيقة القصة حقيقية وصدق بس العصائر مش صحيه

أنت عارف العصير ده عبارة عن إيه؟

كالعادة احنا مش هنجيب حاجه من عندنا لو قرأت مكونات كيس العصير البودرة ده، هتلاقي نفسك قدام معمل كيمياء حرفياً
ألوان صناعية: عشان تدي الألوان الزاهية اللي بتخدع العين. 🎨
مكسبات طعم ونكهة: برتقال، مانجو، عنب.. كله كيمياء، مفيش فاكهة شمت ريحة الكيس ده 😸🧪
ستريك أسيد ومنظمات حموضة
ومواد حافظة: زي "بنزوات الصوديوم". دي كارثة لوحدها
كيماويات "مريبة": مواد لمنع التكتل، ومواد لمنع الرغوة.. وليلة كبيرة أوي سعادتك! 🤦‍♂️وانا في الحقيقة اختصرت لك المكونات لان فيه اسماء ومكونات غريبة ومعقدة
الموضوع مخلصش لغاية هنا لسه طريقة تحضير العصير دا يالهووووي
المعروف اللي يكلفناصحتنا
اشتري كيس عصير بودر "معفن" بربع جنيه، يتخلط بجردل مية و3 كيلو سكر، ونقدمه للناس على إنه ثواب

جدار المعدة بعد ساعات الصيام بيكون حساس جداً، وأول حاجة نصدمه بيها هي كمية السكر الفظيعة والألوان دي؟ ده حرفياً هجوم كيميائي على الكبد والبنكرياس. ⛔️
أنا شخصياً اعتذرت لكل الشباب وقلت لهم: آسف.. بصوت حسام موافي 😂😂
مش هقدر أدخل معمل كيمياء معدتي على الريق✋

وقبل ما تقول ياعم هتقرفنا في عيشتنا ليه ونعمل اي
يا سيدي إحنا مش عايزين نقرفك، إحنا بنعرض المشكلة وبنطرح الحل اللي يرضي ربنا وصحتنا

بدل السكر والعصير البودرة: بتمنهم اشتري كيلو تمر (بلح).
غلف كل 3 تمرات مع بعض: ووزعهم على الناس في الشارع.

التمر هيدي الصايم طاقة، معادن، وألياف، وهيروي عطشه مع شوية مية.. وده السنة وده الصح. 🌴💧
كده أنت عملت ثواب حقيقي، وأفطرت الصائم على حاجة ترجع فيه الروح" مش تتعبه

المرة الجاية هنتكلم عن العصائر (المعلبة والفريش).. المشاكل والحلول. انتظرونا
قولولنا في التعليقات.. لسه بتشوفوا ظاهرة العصير وكم مرة اخذت معاك عصائر وتمر وانت مروح البيت هههه

#رمضانيات

(مدرس مساعد بقسم علوم الأغذية)
متخصص في سلامة الغذاء وحماية المستهلك والخضروات العضوية

21/02/2026

خديعة الجبنة في السحور.. هل بتاكل بروتين ولا .زيت نخيل؟ 🧀⚠️
الحلقة الثالثة من سلسلة 🌙
البوست ده ممكن يكون طويل شوية، فلو وقتك ضيق خد الخلاصة: لا تأكل أي جبنة مكتوب عليها (نباتي الدهن)، والبديل المثالي هو الجبنة القريش." ✋✅

لو حابب تثقف نفسك غذائياً وتعرف التفاصيل.. أهلاً بك في رحلتنا النهاردة:
الجبن تعتبر طبق رئيسي في معظم البيوت في السحور
ليه الجبنة طبق رئيسي؟ 🤔
الجبنة في الأصل وجبة خفيفة، بروتين كامل، وفيتامينات ومعادن..
أستنى أنت صدقت 🤷

ده طبعاً لو مصدرها صحي. لكن الحقيقة إن السوق مليان أنواع بعيدة كل البعد" عن اللبن! 🥛

خلينا نقسم الجبن في السوق علشان نعرف الجبن الجيدة من السيئة
لـ 4 أنواع عموما احنا ممكن نقسمها إلى اكتر من كدا لكن دي اهم الفئات

1-جبن العلب الكرتون (بكل أسمائها). وأشكالها وأحجامها بدون ذكر اسماء
2- الجبنة المثلثات. بكل الاشكال والأحجام والأسماء ضارة جدا
3- الجبن المستورد (سويسري وفرنساوي) وده غالي ومكلف. 💸 مش هنتكلم عنها أصلا بالإضافة إلى الجبن المصرية الغالية الأخرى دي بتاع الناس الريتش مش موضوعنا النهارده نبقى نخصص لها بوست كامل بعدين
4- الجبن القريش والدمياطي والملح الخفيف (الأصل البلدي). 🐄 وغيرها من الأنواع الأخرى
النوع الاول والثاني"العلب الكرتون" والمثلثات:
للأسف 90% منها أو اكتر غير صحي وللأمانة الشركات "مكذبتش" علينا، كاتبين المكونات بكل صراحة زي شركات السجاير.. بص في ظهر العلبة كدا وانا عايزك تعمل كدا علشان تعيش معايا التجربة هتلاقي: المكونات
- لبن بنسبة ضئيلة: (من 10 لـ 30% فقط) والباقي لبن بودرة. 🚫 منزوع الدسم
-زيوت نباتية أو دهن نباتي الكارثة الزيت المستخدم اسوء الأنواع علشان رخيص (زيت النخيل): وانت لازم تعرف الزيت دا نباتي مشبع بالكلسترول الضار والمضر للقلب. 🌴💔
واحد الوقت يسأل ليه بيضيفوا زيت نباتي علشان أنا قولت لك فوق نسبة اللبن قليلة جدا ولبن منزوع الدسم بيضيفوا دهن نباتي وزيت علشان تحس بالطعم اومال هيضيف لك لبن كامل غالي في علبة جبنة تمنها ربع جنيه 🤣
-خلطة الكيمياء: منظم حموضة (E575)، مستحلبات (E471) عشان الزيت ميفصلش، ومثبتات (E407 - E412) عشان القوام يفضل متماسك. 🧪
- المواد الحافظة: الجبنة دي ممكن تقعد شهور مفتوحة ومتبوظش! عارف ليه؟ لأن البيئة فيها ميتة كيميائياً لدرجة إن البكتيريا نفسها مترضاش تعيش فيها! ❌🔬

سامعك اللي بتقول طيب لو هي ضارة.. ليه موجودة في السوق؟ 🤷‍♂️

الإجابة ببساطة: المواد دي مسموح بها "بنسب قليلة"، لكن لما تاكلها كل يوم في السحور، المواد دي بتتراكم في جسمك ومع الوقت بتسبب مشاكل في القلب، الضغط، والجهاز الهضمي. جسمنا مش سلة مهملات للكيمياء! ✋ خلي بالك

💡 إيه البديل طيب ؟ (الحل في 3 خطوات):
كالعادة احنا مش بنقرفك في عيشتك احنا بنعرض المشكلة ونطرح الحل

الحل الأول: لو هتشتري علب كرتون، ابحث عن كلمة "طبيعي 100%" أو "خالي من الزيوت النباتية". في شركات مصرية محترمة بدأت توفر ده فعلاً (زي دومتي وعبورلاند وجهينة) الخ الشركات دي مؤخرا بدأت تنزل جبن طبيعي كامل بس سعرها بيكون أغلى لأنها لبن حقيقي. وعلشان الميزانية معاك انا شوفت لك الحل الثاني
الحل الثاني اشتري من معامل الألبان الصغيرة والموثوقة في منطقتك. المعامل دي إمكانياتها بسيطة، فبتستخدم (لبن + ملح + منفحة) وبس.. وده المطلوب! 🐄👌 مفيش عندهم إمكانيات المصانع الكبيرة ومعامل الكيمياء اللي بتعمل مواد ملونة مكتسبات طعم ومثبت قوام وبردوا اقرأ المكونات في أسفل طبق الجبنة لو لاقيت مكتوب اكتر من لبن وملح ومنفحة وبادئ لا تشتري وعلشان أكون صادق معاك أنا بتاع فود سيفتي وحماية مستهلك المعامل دي معظمها تحت السلم خلي بالك من النظافة
الحل الثالث (الأضمن): الجبنة القريش والبلدي من أهالينا في الريف 90% من أهل الريف يصنعوا الجبن القريش والدمياطي والبيضا خفيفه الملح بخيرها وغيرها معظم الناس اللي عايشين في المدن عندهم قرايب في الريف انزل بنفسك واشتري منهم

أو اصنعها في بيتك.. الموضوع أبسط مما تتخيل (لبن وملح ومنفحة).
قولولنا في التعليقات.. بتعرفوا تفرقوا بين الجبنة الطبيعي ونباتي الدهن وأنتم بتشتروا؟ وإيه النوع اللي مبيفارقش سحوركم؟ 👇
اعمل شير ومتابعة علشان يوصل لك باقي السلسلة
#رمضانيات

(مدرس مساعد بقسم علوم الأغذية - متخصص سلامة الغذاء وحماية المستهلك والخضروات العضوية .

19/02/2026

ثاني حلقة في سلسلة 🌙
المخلل أو الطرشي: فاتح شهية أم قنبلة أملاح؟ 🧐🧂
كلنا بنحب طبق "الطرشي" المشكل في نص السفرة الرمضانية، وبنعتقد إنه هو اللي "بيفتح النفس" ويخلينا نخلص الأكل كله.
الحقيقة العلمية: المخلل لو معمول صح هو "غذاء متخمر" غني بالبكتيريا النافعة (Probiotics)، لكن للأسف، أغلب اللي في السوق "عك" كيميائي! 🧪
ليه بنحذرك من "طرشي الشارع" (تحت السلم)؟

- الملح القاتل: عامل الحفظ الأساسي هو الملح، وفي الجاهز بتكون النسبة مرعبة ونوع الملح سيء جداً. تخيل كمية الصوديوم اللي بتدخل جسمك "فجأة" بعد ساعات صيام طويلة
- ألوان صناعية ومواد حافظة: بعض التجار بيضيفوا صبغات ومواد كيميائية خطرة جداً على الكبد والكلى عشان اللون يفضل زاهي
- تخمير غير صحي: طرق النضج في الأماكن غير الموثوقة بتتم في بيئة ملوثة وبعيدة تماماً عن شروط سلامة الغذاء.
سامعك اللي بتقول ياعم قرفتنا نأكل ايه ونعمل ايه

طيب إيه الحل؟ (مش هنحرمك بس هنوعيك)
إحنا مش بنطرح مشكلة ونمشي، دي حلول عملية بديلة:

الحل الأول انت لازم تسأل نفسك احنا ليه بناكل مخلل أصلا علشان فاتح شهيه وعلشان غداء متخمر طيب ما احنا ممكن نستبدل طبق المخلل بـ "سلطة خضراء فريش" وعززها بالبصل، الفلفل الألوان، والليمون والخل. هتاخد طعم لازع وفائدة جبارة. ونفتح نفسك 🥗
ولو هدفك الهضم والبكتيريا النافعة اللي في المخلل كوب زبادي واحد مع السحور أو الفطور يغنيك عن ألف مخلل، لأنه ملك الأغذية المتخمرة. 🥛 وبشكل عام موضوع الأغذية المتخمرة محتاج مننا بوستات كتير في المستقبل

الحل الثاني اعمل المخلل في بيتك بمكونات نظيفة وملح بحري أو صخري، وبطريقة تخمير صحيحة. ✅

الحل الثالث : لو كان ولابد من المخلل المصنوع اشتري من مصدر موثوق وعلشان الاحتياط واجب خد "قطعة بسيطة" جداً تفتح الشهية فقط، مش طبق كامل..

ملحوظه أنا مش بحارب الصناعات الغذائية أعرف أن فيه مصانع مخلل جيدة أنا أقصد المخللات المصنوعة تحت السلم

عموماً احنا كمتخصصين في "سلامة غذاء" ننصح دائماً في أي مطعم، تجنب تماماً أكل المخلل المجاني اللي بينزل مع الأكل، نتيجة سوء التداول والحفظ اللي ممكن يسبب تلوث بكتيري أنت في غنى عنه.
كل عام وأنتم بخير وصحة! 🌙✨
اعمل متابعة و شير وانتظر باقي السلسلة
#رمضانيات ـنصائح #ـغذائية
#الهواري سعد
مدرس مساعد بقسم علوم الأغذية
متخصص في سلامة الغذاء وحماية المستهلك والخضروات العضوية

18/02/2026

أول حلقة في سلسلة 🌙
تفتكر إيه أفضل حاجة تكسر صيامك عليها؟ 🧐
ان شاء الله هحاول أنزل سلسلة مكتوبة هنا عن بعض النصائح الغذائية في شهر رمضان
الحلقة الأولى.

يا ترى ايه أفضل حاجه ممكن أفطر عليها بعد ساعات الصيام
هل العصائر الصناعية البودرة وتمر الهندي الصناعي.
أو العصائر الفريش الطبيعة. أو نكسر صيامنا على أي بالظبط🤷🤔

علشان نجاوب على الأسئلة دي لازم نعرف أن العصائر الصناعية 🥃كلها مواد ملونة مكتسبات طعم وبعضها بها مواد حافظة دا غير السكر فأعتقد أنه خيار كسر صيامنا على المواد الكيميائية دي بعد ساعات الصيام ضار جدا على صحتنا .

اه سامعك اللي بتقول نفطر على شراب طبيعي مصنوع من الكركديه و الفاكهة الطازجة ومفيش فيها مواد ملونة و مكتسبات طعم ومعمول في البيت🍹 👌
في الحقيقة دا خيار سئ أيضا اه مفيش فيها مواد ملونة لكن العصائر دي منزوعة الألياف ومضاف عليها كميات كبيرة من السكر الصناعي واعتقد دا هيكون ضار جدا بعد ساعات الصيام .
طيب قبل ما تقول ياعم نفطر على أي خلاص قفلتها علينا
الإجابة بسيطة جدا شويه ماء و عدد واحده فقط من فاكهة التمر . البلح

لان ببساطة جسمنا عايز يتروي ماء علشان الخلايا كلها بعد ساعات الصيام عايزة ترجع للحياة تاني والعمليات تشتغل ومفيش حاجه حيوية اهم من الماء لأنه هو أصل الحياة وأهم عنصر فيها ودا كلام ربنا. وجعلنا من الماء كل شيء حي
والتمر بقى دا قصة كبيرة انا كمتخصص في علوم الأغذية بقف حيران قدام الفاكهة دي مش ممكن تحتوي على كمية رهيبة من فيتامينات ومعادن وألياف وطاقة وسكر مفيد وان شاء الله هنعمل سلسلة كاملة عن التمر في رمضان
اعمل متابعة و شير وانتظر باقي السلسلة
#رمضانيات ـنصائح #ـغذائية
#الهواري سعد
مدرس مساعد بقسم علوم الأغذية
متخصص في سلامة الغذاء وحماية المستهلك والخضروات العضوية.

05/02/2026

السياسة مهمة جدا ان تفهمها علشان ترتاح
أنا شخصيا بحب السياسة جدا جدا.
مش لازم تعمل في السياسة بس أفهم وعلشان تفهم السياسة بدون ما تدرس في كليات العلوم السياسية وعلم الاجتماع ممكن تلخص كل دا في مقولة
وينستون تشرشل
عمنا تشرشل بيقول.
في السياسة ليس هناك صديق دائم أو عدو دائم هناك مصالح دائمة.
وبالمناسبة السطر دا أفضل من خمسين محاضرة في كليات السياسة والاقتصاد وممكن نشرح فيه كتب.
علشان تعرف الدنيا مصالح في 2016 كانت الدنيا بين مصر و تركيا مولعه تلفزيونياً و سوشيال لكن في نفس ذات الوقت لم يتوقف الاستيراد والتصدير بين البلدين والتجارة رايحه جايه زي الفل والسفارة هنا وهناك لم تغلق يوم واحد يعني إقتصاديا و دبلوماسياً الدنيا ماشيه تمام .
مفيش غير أحمر جاموسة بس قاعد يحزق وخلاص .
ومن هنا يأتي ترجمة جملة هناك مصالح دائمة.
نرجع لموضوعنا عن السياسة
طبق بقى كل دا في حياتك اليومية عدو النهاردة ممكن يبقى صديق الغد والعكس .
فبلاش في العدوات نغلق كل الطرق سيب حته صغيرة كدا نقعد نتفاوض منها علشان نوصل لمقولة أوتو فون السياسة فن الممكن .
لكن دا مش معناه أن ترضى وتسكت.
علشان نروح لمقولة
لا تستسلم أبداً ل وينستون. علشان لو استسلمت مش هنوصل لمقولة فن الممكن ولا المصالح الدائمة ومحدش هيقولك تعال نقعد نتفاوض.

01/01/2026

28/02/2025

كل عام والأرض كلها في خير وسعادة وبركة وسلام و أمان وطاعة
#رمضان-مبارك 💙

23/02/2025

تعالوا أنتم بس وأحنا نفرش لكم الأرض تلج مفيش عندنا ورد