26/05/2026
GOSA NYAATA LUKKUU FI MADDOOTA ISAANII WALIIN
Horsiisni lukkuu carraa hojii uumuu fi madda galii ariifataa ta'uun beekamus, bu'aan gaariin kan argamu yoo sirni nyaataa (Nutrition) haala saayinsaawaa ta'een dhiyaate qofadha. Akkuma beekamu, baasii horsiisa lukkuuf baasnu keessaa 60% hanga 70% kan ta'u baasii nyaataati. Kanaafuu, gosa nyaataa, faayidaa isaa fi madda isaa sirriitti hubachuun faayidaa diinagdee olaanaa qaba.
1️⃣. PIROOTIINII (IJAARSA QAAMAA fi MADDA OOMISHAA)
Pirootiiniin bu'uura lubbuuti. Lukkuun tokko yeroo xobbiitti qaama ishee guddifachuuf, maashaa ijaarrachuu fi yeroo ga'eessummaa ammoo hanqaaquu qulqullina qabu baay'inaan oomishuuf pirootiinii ishee barbaachisa. Pirootiiniin baasii nyaataa keessaa isa qaaliidha, garuu isa hunda caalaa murteessaadha.
⚡️ MADDOOTA PIROOTIINII:
● Madda Biqiltootaa: Sooyaa yookaan Soyaabiinii (sooyaan yeroo kennamu akka gaariitti affeelamuu yookaan akaayamuu qaba, sababiin isaas sooyaa dheedhii keessa summii guddina danqu Anti-nutritional factors tu jira), kan biroo ammoo baaqelaa, atara fi nyaatawwan adda addaa irraa argama.
Madda Beeyladaa: Nyaata qurxummii (Fish meal) daakame. Kun madda pirootiinii sadarkaa olaanaa (High-quality amino acids) qabudha.
● Mala Ammayyaa (Madda Baasii Xiqqaa): Raammoo maagootii (Black Soldier Fly Larvae). Indastirii ammayyaa keessatti, raammoo kana kosii irraa horsiisuun lukkuudhaaf kennuun baasii pirootiinii hir'isuu fi hanqaaquu oomishuu keessatti jijjiirama guddaa fidaa jira.
2️⃣. KAALSHIYEEMII FI ALBUUDOTA (IJAARSA LAFEE fi QOLA HANQAAQUU)
Kaalshiyeemiin lafeen lukkuu akka hin lallaafne (Rickets) fi qolli hanqaaquu akka hin caphne dhoorkuuf gargaara. Hanqaaquun qolli isaa haphii ta'e daldalaafis ta'e cuccii baasuuf hin ta'u.
⚡️ MADDOOTA KAALSHIYEEMII:
■ Dhagaa Kaalshiyeemii (Limestone) daakame.
Qola hanqaaquu (kunuunsa cimaan erga affeelamee jarmii irraa qulqullaa'ee fi daakamee booda qofa kennama; yoo kanaan ala ta'e dhukkuba daddabarsuu danda'a).
■ Lafee beeyladootaa gubatee daakame (Bone meal).
3️⃣. VIITAAMIINII (HUMNA ITTISA QAAMAA FI FARRA-DHIPHINAA)
Viitaamiinonni dhibee ittisuuf, qaamni nyaata bifa sirrii ta'een akka fayyadamu gochuu fi dhiphina yeroo ho'aa yookaan dhukkuba (Stress) hir'isuuf baay'ee barbaachisaadha. Hanqinni viitaamiinii lukkuun akka qaama hir'attu, iji ishee akka boku fi guddinni ishee akka suutaa'u taasisa.
⚡️ Maddoota Viitaamiinii:
■ Margoota lallaafaa, raafuu fi kaarrootii.
Boqqolloo keelloo (Viitaamiin A baay'inaan of keessaa qaba).
■ Mala Ammayyaa: Yeroo ammaa qonnaan bultoonni gurguddoon fi dhaabbileen nyaata lukkuu oomishan 'Vitamin Premix' (Viitaamiinii warshaadhaan qindaa'e) fayyadamu. Kunis hamma sirrii ta'een nyaata keessatti makuun dhibee hir'isa.
4️⃣. INERJII / KAARBOOHAYIDIREETII (MADDA HUMNAA FI HO'A QAAMAA)
Inerjiin motora qaama lukkuuti. Lukkuun akka socho'uuf, ho'a qaama ishee sirreessituu fi sirni bullaa'insa nyaataa ishee haalaan akka hojjetu humna jabaa kennaaf. Nyaata lukkuu keessaa harki caalaan (gara 60-70%) madda inerjii irraa ijaarrama.
⚡️ MADDOOTA INERJII:
● Boqqolloo (Madda humnaa isa guddaa fi addunyaa irratti baay'inaan fayyadamamudha).
●Qamadii, misingaa, garbuu.
●Galabaa qamadii (Wheat bran) - kun madda humnaa ta'uun cinatti daakuu gargaara, garuu baay'inaan yoo kenname lukkuun akka mooftu (furdattu) godha.
✍️ Dr. Galataa, DVM (Ogeessa Fayyaa Beeyladaa)
Gaaffii fi yaada dabalataaf, akkasumas gorsa ogummaa horsiisa beeyladaa wajjin walqabatu kamiyyuu argachuuf karaa teessoo koo na qunnamuu dandeessu.
Call 📞: 092 185 9393
TG channels:
Https://t.me/drgalataa
Https://t.me/DrofVetMed
WhatsApp group:
https://chat.whatsapp.com/KDj3cL5rWc7IdaKYsIJ3pl?mode=gi_t
