07/05/2026
Sirna Hirriba Daa'immanii
* Qorannoon garagaaraa akka agarsiisutti ijoolleen yeroo hunda hirriba gahaa rafan xiyyeeffannoo, amala, dandetti barachuu, yaadachuu, fi fayyaa(guddina) sammuu fi qaamaa waliigalaa fooyya'aa qaban.
*Sagantaan hirribaa dhaabataan fayyaa waliigalaa daa'immaniif wantoota barbaachisoo ta'an keessaa isa tokkodha.
* Hammi hirriba fayyaa guutuuf isaan barbaachisu akka umurii isaaniitti garaagarummaa qaba.
*Dhimmi warri hubachuu qaban kan biraan hirriba dhabuun amala rakkisaa akka qabaatanii fi barumsa isaanii irrattillee dhiibbaa hamaa qaba.
Ijoolleedhaaf Hirriba Hammamiituu Isaan Barbaachisaa?
Daa'imman hirriba hangamii akka barbaadan umurii isaaniitiin garaagarummaa qaba. Dhalootarraa kaasee da'iman sa'aatiin rafuudhaan dabarsaan xiqqaachaa ykn hirrachaa deemaa. Daa’imni hundi adda adda ta’us fayyaa daa’immaniif kan Gorfamu
1. Daa'imman (ji’a 0–3): sa’aatii 24 keessaa sa’aatii 14–17 rafuutu gorfama
2. Daa'imman (ji’a 4–12:): sa’aatii 24 keessaa sa’aatii 12–16
3. Daa’imman xixiqqoo (waggaa 1–2): sa’aatii 24 keessaa sa’aatii 11–14
4. Daa’imman (waggaa 3–5): sa’aatii 10–13
5. Ijoolleen waggaa 6-12 jiran giddu galeessaan sa’aatii 9-11 rafuudhaan dabarsu.
6. Dargaggummaatti umrii waggaa 13-18ti hammi hirribaa gorfamu sa’aatii 8-10 dha.
Qaceelfama Bu’uuraa Hirriba Fayyaa Daa’immaniif
1. Yeroo fi haalaa ciisichaa murtaa’e tahee daa’imman akka qabaatan gargaaruu.
2. Daa’imman sagantaa hirribaa dhaabataa hin jijjiramne isaan barbaachisaa. Kunis guyyaan mana barumsaati, halkan manatti rafuus fi guyyaa barumsii hin jirrettillee rafan garaagarummaa sa’aatii tokkoo ol ta’uu hin qabu.
3. Daa’imman sa’aatii ciisuu dura yeroo tasgabbaa'aa taasisuu. Sochiiwwan anniisaa guddaa qaban kan akka tapha garaa garaa, fi waan sammuu isaanii dammaqsan kan akka televijiinii ilaaluu ykn tapha kompiitaraa taphachuu irraa fagaachuu qabu.
4. Mucaa keessan beela'ee osoo jiruu akka ciisuu gochuun sirrii dha miti. Ciisicha dura nyaata salphaa (fkn, aannan) kennufiin gaariidha. Nyaanni ulfaataa yeroo ciisan sa’aatii 1 ykn 2 keessatti nyaachuun garuu hirriba gufachiisuu danda’a.
5. Ijoolleen osoo hin rafiin dura shaayii, buna, chokoleetii, soodaa fi wantoota nama kakaasan biroo fudhachuu hin qabu.
6. Mucaan keessan guyyaa hunda ala akka dabarsuu fi sochii qaamaa irratti akka hirmaatu mirkaneessi.
7. Kutaa ciisichaa daa'ima keessanii callisaa fi dukkanaa'aa taasisuu ykn Ifa halkanii sadarkaa gadi aanaa qabaachuu danda’a. Kutaaleen guutummaatti dukkanaa’oo ta’an daa’immanif sodaachisoo ta’uu waan danda'uuf fudhatama hin qabuu.
8. Kutaan ciisichaa daa’ima keessanii halkan ho’a mijataa tahee qabachu qaba.
9. Kutaa ciisichaa daa'ima keessanii yeroo boqonnaaf ykn adabbiidhaaf hin fayyadaminaa.
10. Kutaan ciisichaa daa’immanii televijiinii irraa bilisa ta’uu qaba
Dr Oumer Harun (ogeessa fayyaa daa’immanii )
©️ Eba Pediatrics Specialty Center
